އުރީދޫގެ ކަލަންޑަރު "ޓީ ވިތު އުރީދޫ" ނެރެފި

އުރީދޫ މޯލްޑިވްސްއިން މި އަހަރަށް ހާއްސަކޮށްގެން ތައްޔާރުކުރި ކަލަންޑަރު "ޓީ ވިތު އުރީދޫ" ގެ ނަމުގައި ރަސްމީކޮށް ނެރެފިއެވެ.

ކޮންމެ އަހަރަކުވެސް ދިވެހި ސަގާފަތާއި އާދަކާދައާ ގުޅުވައިގެން ތަފާތު ކަލަންޑަރުތަކެއް ނެރޭ އުރީދޫން މިއަހަރުގެ ކަލަންޑަރު ހާއްސަކޮށްފައިވަނީ ދިވެހިންގެ ތެރޭގައި އޮންނަ ސައި ބުއިމުގެ މުއްސަނދި ސަގާފަތަށެވެ.

ޒަމާނުއްސުރެ ރާއްޖޭގައި ސަޔަކީ ހަމައެކަނި ބުއިމަކަށްވުރެ ބޮޑަށް، އާއިލާ އާއި ރަހުމަތްތެރިން ބައްދަލުވެ ގުޅުން ބަދަހިކުރާ ވަގުތެކެވެ. "ހިނގާ ސަޔަށް؟" މި ލަފުޒަކީ ދިވެހިންގެ ތެރޭގައި ކޮންމެ ގުޅުމަކަށް އަދި ކޮންމެ މުނާސަބަތަކަށް ފަހިވެފައިވާ ސުވާލެކެވެ. އެެހެންކަމުން މިއަހަރުގެ ކަލަންޑަރުގައި ކޮންމެ މަހަކުވެސް ރާއްޖޭގެ އެކި ކަންކޮޅުތަކުން ލިބޭ މޭވާ އާއި މާމެލާމެލީގެ ރަހަތައް ހިމެނޭ ތަފާތު ސައިގެ ބާވަތްތައް ދައްކުވައިދޭނެ ކަމަަށް އުރީދޫން ވިދާޅުވެއެވެ.

މި ކަލަންޑަރާ ގުޅޭގޮތުން އުރީދޫ މޯލްޑިވްސްގެ ސީއީއޯ އަދި މެނޭޖިންގ ޑިރެކްޓަރ ޚާލިދު އަލް ހަމާދީ ވިދާޅުވީ، އުރީދޫން ގަބޫލުކުރާ ގޮތުގައި ގުޅުންތަކަކީ ހަމައެކަނި ޓެކްނޮލޮޖީގެ ޒަރީއާއިން ބަދަހިވާ އެއްޗެއް ނޫން ކަމަށެވެ. އަދި ސައި ބުއިމުގެ ސަގާފަތަކީ ދިވެހިން އެކަކު އަނެކަކާ ގުޅުން ބަދަހިވުމުގެ އެއް މެދުވެރިއެއް ނޫން ކަމަށްވާއިރު، މި އަހަރުގެ ކަލަންޑަރުގެ ޒަރިއްޔާއިން މި އާދަކާދަ ދިރުވަން ބޭނުންވި ކަމަށެވެ.

މިއަހަރުގެ ކަލަންޑަރު ތިން ގޮތަކަށް ވަނީ ފަރުމާކޮށްފައެވެ. އެއީ ޑެސްކް ކަލަންޑަރުގެ އިތުރުން، ފާރުގައި އަޅުވާ ކަލަންޑަރާއި ޑިޖިޓަލް ކަލަންޑަރެވެ. ހާއްސަ ކަމެއްގެ ގޮތުން، ޑެސްކް ކަލަންޑަރާއެކު ކޮންމެ މަހަކުވެސް ދިވެހި ރަހަތައް ހިމެނޭ ގްރީންޓީ ބްލެންޑެއްގެ ޓީ ކޭކެއް ލިބިގެންދާނެ ކަމަށް އުރީދޫން މައުލޫމާތުދެއެވެ.

އުރީދޫން ވިދާޅުވީ، އުންމީދަކީ މި އަހަރުގެ ކަލަންޑަރަކީ ޑެސްކް، ފާރު އަދި ސްކްރީނުން ކޮންމެ ދުވަހެއްގެ އާދަކާދައިގެ ތެރޭގައި ހިމެނޭ، ދިވެހިވަންތަކަން ރަމްޒުކޮށްދޭ އެއްޗަކަށް ވެގެންދިއުން ކަމަށެވެ.