އިނގިރޭސި ޕްރިމިއާ ލީގުގައި ރޭ ނިއުކާސަލް ޔުނައިޓެޑް އާއި ދެކޮޅަށް އެސްޓަން ވިލާ ކުޅުނު މެޗު 2-0 ގެ ނަތީޖާއަކުން އެސްޓަން ވިލާ މޮޅުވެއްޖެ އެވެ.
މި މެޗުން އެސްޓަން ވިލާ މޮޅުވިއިރު މިއީ 2005 ވަނަ އަހަރު ސެއިންޓް ޖޭމްސް ޕާކްގައި ކުޅުނު މަޝްހޫރު މެޗުން އެސްޓަން ވިލާ މޮޅުވި ފަހުން މި ދަނޑުގައި އެ ޓީމު ނިއުކާސަލް އަތުން މޮޅުވި ފުރަތަތަމަ ފަހަރެވެ.
2005 ވަނަ އަހަރު ކުޅުނު އެ މެޗުގެ ކުޅުން ނިމުނުއިރު ނިއުކާސަލްގައި ތިބީ އަށް ކުޅުންތެރިންނެވެ. ނިއުކާސަލްގެ ދެ ކުޅުންތެރިން ކަމުގައިވާ ލީ ބޯވަރ އާއި ކިރޮން ޑަޔާ ތަޅައިގަތުމާއި ގުޅިގެން ރެފްރީ ވަނީ އެ ދެ ކުޅުންތެރިންނަށްވެސް އެ މެޗުގައި ރަތް ކާޑު ދައްކާފަ އެވެ.
އެސްޓަން ވިލާ އިން މި މެޗުގައި ލީޑު ނަގާފައިވަނީ މެޗުގެ 19 ވަނަ މިނިޓުގައި އެމިލިއާނޯ ބުއެންޑިއާ ކާމިޔާބުކޮށްދިން ލަނޑުންނެވެ.
ނިއުކާސަލް އަށް މި މެޗުގައި ލަނޑު ޖަހަން ރަގަޅު ފުރުސަތުތަކެއް ވަނީ ލިބި ނާކާމިޔާބުވެފަ އެވެ. އެގޮތުން ސެންޑްރޯ ޓޮނާލީ އާއި ލެވިސް މިލޭ ފޮނުވާލި ނުރައްކާތެރި ދެ ހަމަލާވެސް އެސްޓަން ވިލާގެ ގޯލުކީޕަރު އެމިލިއާނޯ މާޓިނޭޒް ވަނީ މަތަކޮށްފަ އެވެ.
އެސްޓަން ވިލާ އިން މި މެޗުގައި ޖެހި ދެވަނަ ލަނޑަކީ މެޗުގެ ފުރިހަމަ ވަގުތު ހަމަވާން ދެ މިނިޓަށް ވެފައިވަނިކޮށް އޮލީ ވޮޓްކިންސް ކާމިޔާބުކޮށްފައިވާ ލަނޑެކެވެ.
މި ނަތީޖާ އާއިއެކު އެސްޓަން ވިލާ އަށް ވަނީ ލީގުގައި މިހާތަނަށް ކުޅުނު 23 މެޗުން 46 ޕޮއިންޓާއެކު ތާވަލުގެ ތިންވަނަ މަގާމް ލިބިފަ އެވެ. ދެވަނައިގައި އޮތް މެންޗެސްޓަރ ސިޓީ އަސްވެސް 46 ޕޮއިންޓް ލިބިފައިވާއިރު އެ ޓީމަށް ކުރި ލިބެނީ ފައިދާ ގޯލުގެ ތަފާތުންނެވެ. ނިއުކާސަލް ޔުނައިޓެޑް އަށް ލިބިފައިވާ 33 ޕޮއިންޓާއެކު އެ ޓީމު އޮތީ ތާވަލުގެ ނުވަ ވަނައިގަ އެވެ.