މަގުމަތީގައި ހިނގާ އެކްސިޑެންޓުތައް މަދުކޮށް، މަގުމަތި ބޭންކުރުމުގައި ސަމާލުވުމަށް ބާރު އެޅެއްވުމުގެ ގޮތުން އަމާނާ ތަކާފުލް އަދި މޯލްޑިވްސް ޕޮލިސް ސަރވިސް ގުޅިވަޑައިގެން ހުޅުމާލޭގައި ރޯޑް ސޭފްޓީ ކެމްޕެއިނެއް ހިންގަވައިފިއެވެ.
މި ކެމްޕެއިނަކީ، މަގުމަތި ބޭނުންކުރުމުގައި ޓްރެފިކް ނިޝާންތަކަށް ސަމާލުވުމަށާއި، މަގުމަތީގައި ހިނގާ އެކްސިޑެންޓް މަދުކުރުމަށް ބާރު އެޅުއްވުމުގެ ގޮތުން ހިންގެވި ކެމްޕެއިނެކެވެ. މި ކެމްޕެއިން ހުޅުމާލޭގެ 3 ސަރަޙައްދެއްގައި ހިންގަވާފައިވެއެވެ. އަދި، 6 ވައްތަރެއްގެ ސްޓިކާއެއް ބޭނުންކޮށް، ތަފާތު މެސެޖުތަކެއް ފޯރުކޮށްދީފައިވާ ކަމަށް އަމާނާ ތަކާފުލް އިން ބުނެއެވެ.
އަމާނާ ތަކާފުލްގެ ސީނިއަރ އެގްޒެގެޓިވް އަޙުމަދު ޝަމޫލް ޢަބްދުﷲ ވިދާޅުވީ، މި ކެމްޕޭން ސިލްސިލާކޮށް މުޅި ރާއްޖޭގައި ހިންގުމަށް ހަމަޖެހިފައިވާ ކަމަށެވެ.
'' ހުޅުމާލޭގައި މިއަދު ކެމްޕޭން ފެށީ، އެހެންނަމަވެސް މުޅި ރާއްޖޭގައި ހިންގަން ނިންމާފައި އޮތީ، އެގޮތުން ކުރިއަށް އޮތް ދެ މަސްތެރޭގައި އައްޑޫ އަދި ލާމުގައި މި ކެމްޕޭން ފަށަން ނިންމާފައި އޮތީ''. އަޙުމަދު ޝަމޫލް އަބްދުﷲ ވިދާޅުވިއެވެ.
ހުޅުމާލޭ ޕޮލިސް ސްޓޭޝަންގެ ޓްރެފިކް ހެޑް ޗީފް ސްޓޭޝަން އިންސްޕެކްޓަރ އޮފް ޕޮލިސް މުޙައްމަދު ނަޢީމް ވިދާޅުވީ، މި ކެމްޕެއިންގައި ބޭނުންކުރާ ސްޓިކާ މެދުވެރިކޮށް މަގުމަތި ބޭނުންކުރުމުގައި ސަމާލުކަން ދޭންވީ ކަންތައްތަކާ ގުޅޭ ގޮތުން ޢާންމުންނަށް ގިނަ މެސެޖްތަކެއް ފޯރުކޮށްދެއްވާފައިވާކަމަށެވެ.
ޢާންމުން ޙޭލުންތެރިކުރުމުގެ ގޮތުން ހިންގާ މި ކެމްޕެއިން ވަރަށް އަވަހަށް އަތޮޅު ތެރޭގައި ފެށުމަށް ހަމަޖެހިފައިވާ ކަމަށް އަމާނާ ތަކާފުލްއިން މަޢުލޫމާތު ދެއެވެ.