ލިވަޕޫލްގެ ފޯވަޑް މުހައްމަދު ސަލާހް އެ ކުލަބުގެ ކުޅުންތެރިންގެ ކިބައިން މައާފަށް އެދިފައިވާ ކަމަށް މިޑްފީލްޑަރު ކާޓިސް ޖޯންސް ބުނެފި އެވެ.
އޭނާ މިހެން ބުނީ ކުލަބާއި ކޯޗާ މައްސަލަ ޖެހި ސަލާހް މީޑިއާ އަށް އިންޓަވިއުދިނުމުން އޭނާ ޓީމުން އުނިކުރި ހާދިސާ އަށް އިޝާރާތްކޮށްށެވެ. މިއަށްފަހު ކޯޗާއެކު އަލުން ވާހަކަ ދެކެވި ސަލާހް ވަނީ ލިވަޕޫލް އެންމެ ފަހުން ކުޅުނު މެޗުގައި ޓީމުގައި ހިމަނާފަ އެވެ.
ލިވަޕޫލަށް ތިން ވަނަ އަށް އެންމެ ގިނަ ލަނޑު ޖަހައިދިން ކުޅުންތެރިޔާއާ ކޯޗާ މައްސަލަ ޖެހުނީ އޭނާ ބެންޗުގައި ބައިދަން ފެށުމުންނެވެ.
"އޭނާ އަކީ އަމިއްލަ ގޮތެއް ހުންނަ މީހެއް. އޭނާ އަބަދުވެސް ހުންނާނީ ހެވިފައި އެހެން މީހުންނާ ކުރމަތިލާއިރު. އޭނާ ވަނީ އޭނާ މީޑިއާގައި ދެއްކި ވާހަކަތަކުގެ ސަބަބުން ކުޅުންތެރިންނަށް އަސަރުކޮށްފައިވާތީވެ އެކަމާ މައާފަށް އެދިފައި. އޭނާ ފަދަ ކުޅުންތެރިއަކު އެފަދަ ކަމެއް ކުރާނީ މޮޅުވާން ބޭނުންވާތީވެ. ޗެމްޕިއަނަކަށް ވާން ބޭނުންވާތީވެ. އެފަދަ ކުޅުންތެރިއަކު ބެންޗުގައި އިންނަން ބޭނުމެއްނުވާނެ،" ޖޯންސް ބުންޏެވެ.
ސަލާހް މިވަގުތުވީ އެފްރިކާ ކަޕް ކުޅެން ގައުމީ ޓީމާއެކުގަ އެވެ. އިނގިރޭސި ޕްރެމިއާ ލީގުގައި 3-3އިން ލީޑްސްއާ ކުޅެ ލިވަޕޫލް އެއްވަރުވި މެޗުގައި ސަލާހް އިނީ ބެންޗުގަ އެވެ. މިއީ ވިދިވިދިގެން އޭނާ ބެންޗުގައި އިން ތިން ވަނަ މެޗެވެ. އޭނާ އިންޓަވިއު ދިނީ މި މެޗަށް ފަހު އެވެ.
"އަހަރެންނަކަށް ނޭނގެ އަހަރެންނަށް މިހެން ހަދަންވީ ސަބަބެއް. ކޯޗާ އެއްކޮށް ކުޅުން ކެނޑިއްޖެ. ކުރިން ވަރަށް ގާތް ގުޅުމެއް އޮތް. މިހާރު އެއްކޮށް ގުޅުން ކެނޑިއްޖެ. އަހަރެންނަށް (ލީޑްސް) މެޗަށް އައިއިރު ވެސް އަހަރެންނަށް އެނގޭ އަހަރެން ނާރުވާނެކަން. އަހަރެންނަށް ނުވިސްނޭ މިހެން ހަދަންވީ ސަބަބެއް. ހުރިހާ ކަމެއްގެ ޒިންމާ ނަގަންޖެހޭ މީހަކަށް މިވަނީ އަހަރެން. އަހަރެންނަށް އިހުސާސް ކުރެވެނީ ކުލަބުން އަހަރެން ބަހުގެ ދަށަށް އެއްލާލައިފިހެން. ކޮންމެވެސް މީހަކު ބޭނުންވަނީ މިހާރު އަހަރެން މި ކުލަބުން ދާން،" ސަލާހް މެޗަށް ފަހު ބުންޏެވެ.
ހުސްވި ސީޒަނުގެ ޕްރެމިއާ ލީގުގެ ރަންބޫޓާއި މޮޅު ކުޅުންތެރިޔާގެ މަގާމު ހޯދި ކުޅުންތެރިޔާ ބުނީ ކޮންމެ ދުވަހަކު ފުރަތަމަ 11އިން ޖާގަ ހޯދަން އޭނާ ވާދަކުރަން ނުޖެހޭނެ ކަމަށެވެ.
"އަހަރެން ސާބިތުކޮށްދީފިން އަހަރެންގެ މަގާމު. މިހެންވީމާ ކޮންމެ ދުވަހަކު އަހަރެން ނުޖެހޭނެ ވާދަ ކުރާކަށް. އެއީ އަހަރެން ގަބޫލު ކުރާ ގޮތް. އެކަމަކު މިހާރު ކޮންމެވެސް މީހަކު ބޭނުންވަނީ އަހަރެން ކުލަބުން ދާން،" ސަލާހް ބުންޏެވެ.
ލިވަޕޫލާއެކު މިދިޔަ ސީޒަނަށް ފަހު ކޮންޓްރެކްޓް އާ ކުރި 33 އަހަރުގެ ފޯވަޑް ބުނީ އެކަން ކުރުމަކުން އޭނާ ދެރަ ނުވާ ކަމަށާއި ނަމަވެސް މިހާރު ބާކީކުރާކަން އިހުސާސްވެއްޖެ ކަމަށެވެ.
"އަހަރެން މި ކުލަބުގެ ކޮންޓްރެކްޓް އާކޮށްގެން ދެރައެއްނުވޭ. އަހަރެން ދެރަވަނީ އަހަރެންނާމެދު ކަންތައްތައް ކުރާ ގޮތުން. އަހަރެން ކުލަބާ ގުޅުން ރަނގަޅު ކުރަން ވަރަށް މަސައްކަތް ކޮށްފިން. ކޯޗާ ވެސް އެތައް ފަހަރަކު ވާހަކަ ދައްކައިފިން. އެކަމަކު ދެން މިކަމެއް ނުވާނެ. އަހަރެންނަށް މިދިޔަ ސީޒަނަށް ފަހު ވީ ވައުދުތައް ކޮންމެވެސް މީހަކު ހަނދާން ނައްތާލައިފި. އަހަރެންނަކި ޕްރެމިއާ ލީގުގެ ރަންބޫޓޫ ހޯދި މީހާ. އެންމެ މޮޅު ކުޅުންތެރިޔާ. އަދި މި މަގާމުގައި ހުރީ އަހަރެން. އެކަމަކު ކަންތައްތައް މިހާރު މި ކުރާ ގޮތުން ވަރަށް މާޔޫސްވެއްޖެ،" ސަލާހް ބުންޏެވެ.
ސައޫދީ އަރަބިއާގެ ކުލަބުތަކުން ސަލާހް ގެންދަން ބޭނުންވެ އެވެ. ނަމަވެސް އޭނާ ބުނީ މިކަމާ މެދު ވާހަކަ ދައްކަން ބޭނުން ނުވާ ކަމަށާއި އުއްމީދު ކުރީ ލިވަޕޫލްގައި ރިޓަޔާކުރަން ނަމަވެސް ބޭނުންވާ ހުރިހާ ކަމެއްވެސް ނުވާނެ ކަމަށެވެ. އަދި އޭނާ ވަނީ ލިވަޕޫލްގެ ލެޖެންޑް އަދި މިހާރު ޓީވީ އެނަލިސްޓް ޖެމައިން ކޮންމެ މެޗަށްފަހު އޭނާ އަށް ފާޑުކިޔާތީވެ އެއީ ވެސް ލިވަޕޫލުން އޭނާއާ ދެކޮޅަށް ކުރުވާ ކަމެއް ކަމަށް ތުހުމަތުކޮށްފަ އެވެ.