ރާއްޖޭގެ ފަތުރުވެރިކަން އިޝްތިހާރުކޮށް ކުރިއެރުވުމަށްޓަކައި އަންނަ އަހަރުތެރޭ ބައިނަލްއަޤްވާމީ ގިނަ ފެއަރތަކެއްގައި ބައިވެރިވުމަށް މޯލްޑިވްސް އެސޯސިއޭޝަން އޮފް ޓުއަރ އޭޖެންޓްސް އެންޑް ޓުއަރ އޮޕަރޭޓަރސް، މަޓާޓޯއިން ނިންމައިފިއެވެ.
މި އަހަރު 7 ފެއަރއެއްގައި ބައިވެރިވުމަށް ހަމަޖައްސާފައިވާއިރު، އަންނަ އަހަރު 10 ވަރަކަށް ފެއަރގައި ބައިވެރިވުމަށް ނިންމާފައިވާ ކަމަށް އެ އެސޯސިއޭޝަނުން ބުނެއެވެ.
މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއަރ އޮޕަރޭޓަރސް، މާޓާޓޯއިން މިއަހަރުގެ މިހާތަނަށް 4 ފެއަރއެއްގައި ބައިވެރިވެފައިވެއެވެ. އަދި އަހަރުގެ ކުރިއަށް އޮތް ދުވަސްތަކުގައި އިތުރު 3 ފެއަރއެއްގައި ބައިވެރިވުމަށް އެ އެސޯސިއޭޝަނުން ވަނީ ނިންމާފައެވެ.
އެ 3 ފެއަރއަކީ ސެޕްޓެމްބަރު މަހު މެލޭޝިއާގައި ބާއްވާ މާޓާ ފެއަރއާއި، އިންޑޮނޭޝިއާގެ ޖަކާޓާގައި ބާއްވާ ޕާޓާ މާރޓްގެ އިތުރުން އިންޑިއާގައި ބާއްވާ ފެއަރއެކެވެ.
ޕީއެސްއެމްއަށް ދެއްވި އިންޓަރވިއުއެއްގައި މާޓާޓޯގެ ރައީސް ޢަބްދުﷲ ޤިޔާޞް ވިދާޅުވީ އަންނަ އަހަރު މަޓާޓޯއިން ބައިވެރިވާނެ ފެއަރތައް އަހަރު ފެށުމުގެ ކުރިން އިޢުލާނު ކުރާނެ ކަމަށާއި ޢަމާޒަކީ 10 ށް ވުރެ ގިނަ ފެއަރގައި ބައިވެރިވުން ކަމަށެވެ.
ބޭރު ޤައުމުތަކުގައި ބާއްވާ ފެއަރތަކުގައި ރާއްޖޭގެ ފަތުރުވެރިކަމުގެ ސިނާޢަތުގައި ޙަރަކާތްތެރިވާ ފަރާތްތަކަށް ބައިވެރިވުމުގެ ފުރުޞަތު މަޓާޓޯއިން ފަހިކޮށްދިނުމަކީ ރާއްޖޭގެ ފަތުރުވެރިކަން އިތުރަށް އިޝްތިހާރުވެ، ރާއްޖޭގެ ފަތުރުވެރިކަމުގެ ސިނާއަތުގައި ޙަރަކާތްތެރިވާ ފަރާތްތަކާއި ބޭރު ޤައުމުތަކުގެ ޓުއަރ އޮޕަރޭޓަރުންނާއި ގުޅުން ބަދަހިކޮށްދޭނެ ކަމެކެވެ.