އެވްރެޖްކޮށް ކޮންމެ ދުވަހަކު 6579 ފަތުރުވެރިން، މިދިޔަ 6 މަހަށްވުރެ އިތުރު!

އެވްރެޖްކޮށް ކޮންމެ ދުވަހަކު ރާއްޖެއަށް އަންނަ ފަތުރުވެރިންގެ އަދަދު މިހާރު އިތުރުވެފައިވާކަމަށް ފަތުރުވެރިކަމާ ބެހޭ ވުޒާރާގެ ތަފާސްހިސާބުތަކުން ދައްކައިފިއެވެ.

ފަތުރުވެރިކަމާ ބެހޭ ވުޒާރާއިން އާންމުކޮށްފައިވާ ތަފާސްހިސާބުތައް ދައްކާގޮތުން ނޮވެމްބަރ މަހުގެ ފުރަތަމަ 5 ދުވަހު ރާއްޖެ އައި ފަތުރުވެރިންގެ އަދަދު މިދިޔަ އަހަރުގެ އެ މުއްދަތާއި އަޅާބަލާއިރު ވަނީ %12.3 އިތުރުވެފައެވެ.

ފަތުރުވެރިކަމާ ބެހޭ ވުޒާރާއިން އާންމުކޮށްފައިވާ ތަފާސްހިސާބުތައް ދައްކާގޮތުން މިމަހުގެ 5 ވަނަ ދުވަހުގެ ނިޔަލަށް ރާއްޖެއަށް 1.8 މިލިޔަން ފަތުރުވެރިން ވަނީ ޒިޔާރަތްކޮށްފައެވެ. މިއީ އޭގެ ކުރީ އަހަރާއި އަޅާބަލާއިރު %9.8 އިތުރު އަދަދެކެވެ.

މި ހިނގާ ނޮވެމްބަރ މަހުގެ ފުރަތަމަ 5 ދުވަހު ރާއްޖެއަށް 32،895 ފަތުރުވެރިން ވަނީ އައިސްފައެވެ. މިއީ އޭގެ ކުރީ އަހަރާއި އަޅާބަލާއިރު %12.3 އިތުރު އަދަދެކެވެ.

ރާއްޖެ އަންނަ ފަތުރުވެރިންގެ އަދަދު އިތުރުވަމުން އަންނައިރު ނޮވެމްބަރ މަހު އެވްރެޖްކޮށް ދުވާލެއްގެ މައްޗަށް ފަތުރުވެރިން އަންނަ އަދަދުވެސް ހުރީ ފާއިތުވެދިޔަ 8 މަސްދުވަހާއި އަޅާބަލާއިރު އިތުރުވެފައެވެ.

އެވްރެޖްކޮށް ދުވާލެއްގެ މައްޗަށް ރާއްޖެ އައިސްފައިވާ ފަތުރުވެރިން:

* ޖަނަވަރީ: 6931 ފަތުރުވެރިން
* ފެބްރުއަރީ: 7646 ފަތުރުވެރިން
* މާރޗް: 6563 ފަތުރުވެރިން
* އޭޕްރީލް: 6611 ފަތުރުވެރިން
* މެއި: 4375 ފަތުރުވެރިން
* ޖޫން: 4726 ފަތުރުވެރިން
* ޖުލައި: 6024 ފަތުރުވެރިން
* އޮގަސްޓް: 6195 ފަތުރުވެރިން
* ސެޕްޓެމްބަރ: 4985 ފަތުރުވެރިން
* އޮކްޓޫބަރ: 6143 ފަތުރުވެރިން
* ނޮވެމްބަރު މަހުގެ ފުރަތަމަ 5 ދުވަސް: 6579 ފަތުރުވެރިން

ރާއްޖެއަށް މިހާރު އެންމެ ގިނަ ފަތުރުވެރިން އަންނަނީ ޗައިނާއިންނެވެ. އެ ގައުމުން މިހާތަނަށް ރާއްޖެއަށް 3 ލައްކައާއި ގާތްކުރާ އަދަދަކަށް ވަނީ ފަތުރުވެރިން އައިސްފައެވެ. 2 ވަނައަށް އެންމެ ގިނަ ފަތުރުވެރިން އައީ ރަޝިއާއިންނެވެ. އެ ގައުމުން ރާއްޖެއަށް 233،000 އަށްވުރެ ގިނަ ފަތުރުވެރިން ވަނީ އައިސްފައެވެ.

މިއަހަރު ސަރުކާރުން އަމާޒުހިފާފައިވަނީ ރާއްޖެއަށް 2.3 މިލިޔަން ފަތުރުވެރިން ގެނައުމަށެވެ. މިއީ ރާއްޖޭގެ ފަތުރުވެރިކަމުގެ ހައި ސީޒަންއެވެ. އަދި ވީއައިއޭގެ އައު ޓާމިނަލް ހުޅުވައި މިހާރު ވަނީ 20 އަށްވުރެ ގިނަ އެއަރލައިންގެ އޮޕަރޭޝަންސް އައު ޓާމިނަލްއަށް ބަދަލުކޮށްފައެވެ.