ސްރީލަންކާގެ ސްނައިޕަރެއް ބޭނުންކޮށްގެން ރައީސުލްޖުމްހޫރިއްޔާ އަވަހާރަކޮށްލުމަށް މަސައްކަތްކުރިކަމުގެ ތުހުމަތުގައި ދައުލަތުން ދަޢުވާކުރެއްވި 4 މީހުންވެސް ދަޢުވާއަށް އިންކާރުކޮށްފިއެވެ.
ސްރީލަންކާގެ ސްނައިޕަރެއް ބޭނުންކޮށްގެން ރައީސުލްޖުމްހޫރިއްޔާ އަވަހާރަކޮށްލުމަށް މަސައްކަތްކުރިކަމުގެ ތުހުމަތުގައި ދައުލަތުން ދަޢުވާ އުފުއްލަވާފައިވަނީ ކުރީގެ ނާއިބުރައީސް އަޙްމަދު އަދީބުގެ އިތުރުން ރައީސް އަވަހާރަކޮށްލުމަށް ސްރީލަންކާއިން ގެނައިކަމަށް ތުހުމަތުކުރެވޭ ސްނައިޕަރ ލަހިރު މަޑުޝަންކަރުގެ މައްޗަށާއި، ގ. އޮއިވާލީ އިސްޙާޤް ޙުސައިނާއި، މ. ލިލީ ޕާރކް ފަޟީލް ޙަމީދުގެ މައްޗަށެވެ.
މި 4 މީހުންގެ މައްޗަށްވެސް ދައުލަތުން އުފުއްލަވާފައިވަނީ އެނގިހުރެ މީހަކު މަރަން ރޭވުމާއި، މަރަން ރޭވުމުގައި ބައިވެރިވިކަމުގެ ކުށުގެ ދަޢުވާއެވެ. މިއަދު ބޭއްވެވި އަޑުއެހުމުގައި ދަޢުވާލިބޭ ފަރާތުން ދިފާޢީ ހެކި ހުށައެޅުމުގެ ފަހު ފުރުޞަތު ޤާޟީ ދެއްވާފައިވެއެވެ. މި 4 މީހުންގެ މައްޗަށް ދައުލަތުން ދަޢުވާ އުފުއްލަވާފައިވަނީ މިއަހަރުގެ އޮކްޓޫބަރު މަހުގެ ތެރޭގައި އިތުރު ބަޔަކާއި ގުޅިގެން ރައީސުލްޖުމްހޫރިއްޔާ އަވަހާރަކޮށްލުމަށް ރާވާ، އެކަމުގައި ބައިވެރިވެ، ރޭވިގޮތުގެ މަތިން އެކަން ފުރިހަމަ ކުރުމަށް މަސައްކަތްކޮށްފައިވާ ކަމަށް ތުހުމަތުކުރައްވައެވެ.