މާމިގިލީ ފަޔަރ ސްޓޭޝަން ރައީސުލްޖުމްހޫރިއްޔާ ހުޅުވައިދެއްވައިފި
-
މާލެ އޭރިއާ ކޮމާންޑުގައި ހުޅުވި 6ވަނަ ފަޔަރ ސްޓޭޝަން
-
ފަޔަރ ސްޓޭޝަންތަކުގެ ޖުމްލަ އަދަދު 15އަށް ވަނީ އިތުރުވެފައި
އދ. މާމިގިލީގައި ތަަރައްޤީ ކުރި ފަޔަރަ ސްޓޭޝަން ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ، ޑރ. މުޙައްމަދު މުޢިއްޒު ހުޅުވައިދެއްވައިފިއެވެ.
އދ. މާމިގިލީގައި މިއަދު ހެނދުނު ހުޅުވި މި ފަޔަރ ސްޓޭޝަނަކީ، އެމްއެންޑީއެފް މާލެ އޭރިއާ ކޮމާންޑަށް ނިސްބަތްވާ ސަރަހައްދުގައި ހުޅުވި 6ވަނަ ފަޔަރ ސްޓޭޝަނެވެ. އަދި މި ފަޔަރ ސްޓޭޝަން ހުޅުވުމުން، ދިވެހިރާއްޖޭގައި ޤާއިމު ކުރި ފަޔަރ ސްޓޭޝަންތަކުގެ އަދަދު 15އަށް ވަނީ އިތުރުވެފައެވެ. މާމިގިލީގައި ހުޅުވި ފަޔަރ ސްޓޭޝަންގެ ސަބަބުން ދިވެހިރާއްޖޭގެ އަލިފާން ނިއްވުމުގެ ޚިދުމަތަށް އިތުރު ކުރިއެރުންތަކެއް ލިބިގެންދާނެކަމަށް ޤައުމީ ދިފާޢީ ބާރުން ވިދާޅުވިއެވެ.
މި ފަޔަރ ސްޓޭޝަން ހުޅުވުމަށްޓަކައި ކުރި ބޮޑެތި މަސައްކަތްތައް ނިންމާލުމުގައި މާމިގިލީ ޕޮލިސް ސްޓޭޝަނާއި، ރޯޑް ޑިވެލޮޕްމަންޓް ކޯޕަރޭޝަން އަދި މާމިގިލީ ކައުންސިލް އިދާރާއާއި، ވިލާ ގްރޫޕްގެ ފަރާތުން ވަނީ އެހީތެރި ފޯރުކޮށްދެއްވާފައިކަމަށް ޤައުމީ ދިފާޢީ ބާރުން ވިދާޅުވިއެވެ.
އެމްއެންޑީއެފް މާލޭ އޭރިއާ ކޮމާންޑް، އދ.މާމިގިލީ ފަޔަރ ސްޓޭޝަން ހުޅުވުމުގެ ރަސްމިއްޔާތުގައި ދައުލަތުގެ ވަޒީރުންނާއި، ރައްޔިތުން މަޖިލީހުގެ މާމިގިލީ ދާއިރާގެ ޢިއްޒަތްތެރި މެންބަރު އަދި ނިޝާން ޢިއްޒުއްދީނުގެ ޢިއްޒަތުގެ ވެރިޔާ، އޮނަރަބަލް ޤާސިމް އިބްރާހީމާއި، ޗީފް އޮފް ޑިފެންސް ފޯސް، މޭޖަރ ޖެނެރަލް އިބްރާހީމް ޙިލްމީއާއި، އެމްއެންޑީއެފް ފަޔަރ އެންޑް ރެސްކިޔު ސަރވިސްގެ ކޮމަޑާންޓް، ކާނަލް އަޙްމަދު ޠާހިރާއި، ސަރވިސް ކޯރގެ ކޮމަޑާންޓް، ކާނަލް އިސްމާޢީލް ނަޞީރާއި، އެ ރަށުގައި ޤާއިމްކޮށްފައިވާ ސަރުކާރު އިދާރާތަކުގެ އިސްވެރިން ބައިވެރިވެވަޑައިގެންނެވިއެވެ.