އެފްއޭއެމް ލީގު ކަޕުގެ ޗެމްޕިއަންކަން ހޯދި މާޒިޔާގެ ކުޅުންތެރިން --- ފޮޓޯ: ޕީއެސްއެމް ނިއުސް
އަލަށް ފެށި ފުޓްބޯޅަ ސީޒަނާއެކު ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އެވޯޑްސް ތައާރަފުކޮށް، އެކަން އިއުލާންކޮށްފިއެވެ.
މިއީ ކުޅިވަރުގެ ރޫހު އިތުރަށް އާލާކުރުމާއި، ކުޅިވަރުގެ ވާދަވެރިކަން އިތުރުކުރުމާއި ފުޓްބޯޅައިގެ ޙިދުމަތްތެރިންގެ އަގުވަޒަންކުރުމުގެ މަޤްސަދުގައި، ފުޓްބޯޅަ އެސޯސިއޭޝަންގެ ފަރާތުން ދޭ އެވޯޑުތަކެކެވެ.
މި ސީޒަންގައި އެވޯޑް ދިނުމަށް އެފްއޭއެމްއިން ހުށަހަޅާފައިވަނީ:
- އެންމެ މޮޅު ފުޓްބޯޅަ ކުޅުންތެރިޔާ (1، 2 އަދި 3)
- އެންމެ މޮޅު ފުޓްބޯޅަ ކޯޗު
- އެންމެ މޮޅު ފުޓްބޯޅަ ކުލަބު
- 21 އަހަރުންދަށުގެ އެންމެ މޮޅު ފުޓްބޯޅަ ކުޅުންތެރިޔާ
- ރާއްޖޭއިން ބޭރުގެ އެންމެ މޮޅު ފުޓްބޯޅަ ކުޅުންތެރިޔާ
- ރަން ބޫޓް (އެންމެ ގިނަ ގޯލް ޖެހި ކުޅުންތެރިޔާ)
- ރަން އަންގި (އެންމެ މޮޅު ގޯލްކީޕަރު)
- އެންމެ މޮޅު ފުޓްބޯޅަ ރެފުރީ
- އެންމެ މޮޅު އަންހެން ފުޓްބޯޅަ ކުޅުންތެރިޔާ
- އެންމެ މޮޅު ފުޓްސަލް ކުޅުންތެރިޔާ
- އެންމެ މޮޅު ގޯލް
އެފްއޭއެމް އެވޯޑްސް އިއުލާންކުރައްވައި އެ އިދާރާގެ ރައީސް އަޙްމަދު ޠާރިޤު ވަނީ އަލަށް ފެށި ފުޓްބޯޅަ ސީޒަންގައި ވާދަކުރާ ކުޅުންތެރިންނާއި، ކޯޗުންނާއި، ކުލަބުތަކާއި، މެޗްތަކުގައި އިންސާފުކުރާ ރެފްރީންނަށް ކާމިޔާބު އަދި ވާދަވެރި މުބާރާތްތަކަކަށް އެދިވަޑައިގެންފައެވެ.