ދިވެހި ޕްރެމިއާ ލީގަށް ނިއުރޭޑިއަންޓް ސްޕޯޓްސް ކުލަބު ޕްރޮމޯޓްކޮށް، ކުރިން ޕްރެމިއާ ލީގުގައި އޮތް ސުޕަ ޔުނައިޓެޑް ސްޕޯޓްސް (ސަސް) ތިން ވަނަ ޑިވިޝަނުގެ ރެލިގޭޝަނުގައި ކުޅެން ޖެހޭ ގޮތަށް އެފްއޭއެމުން ނިންމައިފި އެވެ.
މި ގޮތަށް ނިންމީ މިއަދު ބޭއްވި ގައުމީ ފުޓްބޯޅަ އިދާރާގެ އެކްސްކޯ ބައްދަލުވުމުގަ އެވެ.
ސަސް އަށް މި އަދަބު ދިނީ އަންނަ މަހުގެ 18 ވަނަ ދުވަހު ފަށާ ދިވެހި ޕްރެމިއާ ލީގުގައި ނުކުޅޭނެ ކަމަށް އެފްއޭއެމަށް އެންގުމުންނެވެ. އެ ކުލަބުން މި ގޮތަށް ނިންމި ސަބަބެއް ކަމަށް ބުނެފައިވަނީ މާލީ ހާލަތު ހުރި ގޮތުން ކަމަށެވެ. ސަސް އަކީ 2021 ވަނަ އަހަރުން ފެށިގެން ޕްރެމިއާ ލީގުގައި ވާދަކުރަމުން އައި ޓީމެކެވެ.
ބިދޭސީ ކުޅުންތެރިންގެ މުސާރައިގެ މައްސަލާގައި ރެލިގޭޓްކުރުމުން ހުސްވި ދެ އަހަރު ދެ ވަނަ ޑިވިޝަނުގައި ވާދަކުރި ނިއު އަށް އަލުން ޕްރެމިއާ ލީގުގެ ޖާގަ ދޭން ނިންމީ ސަސް ހުސްކުރި ޖާގަ އަށެވެ.
އެފްއޭއެމުން މިއަދު ބުނީ ދެ ވަނަ ޑިވިޝަނުގެ ސެމީ ފައިނަލުން ބަލިވި ދެ ޓީމު ކަމަށްވާ ނިއު އާއި ޓެންޓް ސްޕޯޓްސް ކުލަބުގެ ތެރެއިން އެފްއޭއެމުގެ މުބާރާތުގެ ގަވާއިދުގެ ދެ ވަނަ މާއްދާ އާއި 12 ވަނަ މާއްދާގެ ދަށުން ނިއު އަށް ފުރުސަތު ދޭން ނިންމީ ދެ ވަނަ ޑިވިޝަނުގައި އެ ދެ ޓީމުގެ ޖުމުލަ ނަތީޖާ އަށް ބަލާއިރު ނިއު އަށް ކުރި ލިބޭތީ ކަމަށެވެ.
ނިއު އަންނަނީ އަންނަ އަހަރު ފުރަތަމަ ޑިވިޝަނުގައި ވާދަ ކުރުމަށް ޓީމު ވަރުގަދަ ކުރަން ފަށައިފަ އެވެ. މި ގޮތުން އެ ޓީމުގެ ކުރީގެ ކެޕްޓަން އަލީ އަޝްފާގް (ދަގަނޑޭ) އާއި މާޒިޔާ އަށް ކުޅުނު ތިން ކުޅުންތެރިން ކަމަށްވާ އަލީ ފާސިރު (ސެންޓޭ) އާއި އަހުމަދު އިރުފާން އާއި ހަސަން ރާއިފް އަހުމަދު (ހަންނަ) ލައްވައި ވަނީ ސޮއިކޮށްފަ އެވެ.
މީގެ އިތުރުން ސަސް އަށް ކުޅުނު ޕީކޭ އާއި އައިހަމްގެ ސޮއި ވެސް ނިއުއިން ވަނީ ހޯދައިފަ އެވެ. ޓީމުގެ ކޯޗަކަށް ހަމަޖައްސާފައިވަނީ އެންމެ ފަހުން ގައުމީ ޓީމުގައި ހުރި ކޯޗު އަލީ ސުޒޭނެވެ.
ނިއުރޭޑިއަންޓަކީ ރާއްޖޭގެ ފުޓްބޯޅައިގެ އެންމެ ކާމިޔާބު އެއް ކުލަބެވެ. މި ގޮތުން ވިކްޓަރީ އާއި ވެލެންސިއާ އާއި ނިއު ހިމެނެނީ ރާއްޖޭގެ ފުޓްބޯޅައިގައި އެންމެ ގިނަ ތަށި ހޯދި ތިން ކުލަބުގެ ތެރޭގަ އެވެ.