އިނގިރޭސި ގައުމީ ފުޓްބޯޅަ ޓީމުން ކަނާތު ބެކް ޓްރެންޓް އެލެގްޒެންޑަރ-އާނޯލްޑް ބާކީކޮށްފިއެވެ.
ފީފާ ވޯލްޑް ކަޕް ކޮލިފައިންގައި އެންޑޯރާ އާއި ސާބިއާއާ ދެކޮޅަށް ކުޅެން އެކުލަވާލި އިނގިރޭސި ސްކޮޑުން އާނޯލްޑް ބާކީ ކުރީ ރެއާލް މެޑްރިޑްގެ ފުރަތަމަ 11 އިންވެސް އޭނާއަށް ހުސްވި ހަފުތާގައި ޖާގަ ގެއްލިފައިވަނިކޮށެވެ.
ގައުމީ ކޯޗު ތޯމަސް ޓުޗެލް ބުނީ އޭނާ އަކީ އާނޯލްޑްގެ ސަޕޯޓަރެއް ކަމަށާއި ނަމަވެސް ކުޅުންތެރިޔާ ޓީމުގައި ނުހިމެނީ ވަރަށް ގިނަ ގޮތްގޮތަށް ބަލާފައި ކަމަށެވެ.
"އޭނަ އަށް އަދިވެސް ފުރުސަތު އެބައޮތް. އެކަމަކު އަހަރުމެން ތައްޔާރުމިވަނީ އަންނަ އަހަރު ވޯލްޑް ކަޕް ކުޅެން. އެ ފަދަ މުބާރާތެއްގައި ކުޅެން ނަގަން ޖެހޭނީ ރަނގަޅަށް ޑިފެންސިވް ޕާޓް އަދާ ކުރެވޭ ކުޅުންތެރިން. ޑިފެންސުން ހެދޭ އެންމެ ގޯހަކުން މުޅި މުބާރާތް ހަރާބުވެދާނެ. މިހެންވެ އަހަރުމެން އެބަޖެހޭ ރަނގަޅު މަގާމުތަކަށް އެންމެ ރަނގަޅު ކުޅުންތެރިން ހޯދަން،" ކޯޗު ބުންޏެވެ.
ލިވަޕޫލް ދޫކޮށް ރެއާލް މެޑްރިޑަށް ބަދަލުވި ފަހުން އާނޯލްޑަށް އަދި ހަމަޖެހުމެއް ނެތެވެ. އޭނާގެ ކުޅުން ދުވަހެއް ދުވަހަކަށް ދަށްވަމުންދާއިރު ރެއާލްގެ ކޯޗު ޒަބީ އަލޮންސޯގެ ފުރަތަމަ 11 އިން ވެސް އޭނާ އަށް ވަނީ ޖާގަ ގެއްލިފަ އެވެ. މިކަމާ ބެހޭ ގޮތުން އަލޮންސޯ ބުނީ އާނޯލްޑުގެ ވަގުތު އަދި އަންނާނެ ކަމަށާއި މި ވަގުތު ކަނާތު ބެކަށް ކުޅެން ރަނގަޅީ ޑެނީ ކަވަހާލް ކަމަށެވެ.
ޓުޗެލް އެކުލަވާލި ޓީމުގައި މެންޗެސްޓާ ސިޓީގެ ޖޯން ސްޓޯންސް ވަނީ ހިމަނާފައެވެ. އަނިޔާގައި ގިނަ ދުވަސްތަކެއް ހޭދަ ކުރި ނަމަވެސް ޓުޗެލް ބުނީ ސްޓޯންސް ޓީމަށް ނެގުމަކީ ދަތި ކަމަކަށް ނުވި ކަމަށެވެ. ކަނާތު ބެކަށް ކުޅުވަން ޓުޗެލް ވަނީ ތިން ކުޅުންތެރިން ނަގައިފަ އެވެ. އޭގެ ތެރެގައި ޗެލްސީގެ ރީސް ޖޭމްސް އާއި ލިވަރަމެންޓޯ ވެސް ހިމެނެ އެވެ.
ޓީމުން ޖާގަ ދީފައިވާ އެހެން ކުޅުންތެރިންގެ ތެރޭހައި ޖޯޑަން ހެންޑަސަން އާއި ޑިކްލައިން ރައިސް އަދި މާކަސް ރަޝްފޯޑް ހިމެނެ އެވެ. ނަމަވެސް ޖެކް ގްރީލިޝްއަށް ޖާގަ އެއް ނެތެވެ.