ޖެންޑަރ ފޯކަލް ޕޮއިންޓުންނަށް ޚާއްޞަކުރައްވައިގެން ބާއްވަވާ ޖެންޑަރ ރެސްޕޮންސިވް ބަޖެޓިންގް ޓްރެއިނިންގް މިއަދު ފަށްޓަވައިފިއެވެ.
މިއީ ޖެންޑަރ މިނިސްޓްރީއާއި ޔޫ.އެން ވިމެން ގުޅިގެން، ބާއްވަވާ ބައްދަލުވުމެކެވެ. ޖެންޑަރ ރެސްޕޮންސިވް ބަޖެޓިންގް ޓްރެއިނިންގްއަކީ، އިޖްތިމާޢީ މައްސަލަތައް ޙައްލުކުރުމުގައި އިޤްތިޞާދީ ދާއިރާ ބޭނުންކުރާނެ ގޮތާއި، މިހާރުވެސް ދެމުން އަންނަ ފުރުޞަތުތަކުގެ ބޭނުން އެންމެ ރަނގަޅުގޮތުގައި ހިފޭނޭ މަޢުލޫމާތު ހިމަނުއްވައިގެން ކުރިޔަށް ގެންދަވާ ޕްރޮގްރާމެކެވެ.
މި ޕްރޮގްރާމްގެ މައިގަނޑު މަޤްޞަދަކީ، އަންހެނުންގެ ޙައްޤުތައް ކުރިއެރުވުމާއި، ރައްކާތެރިކުރުމަށް ތަޞްދީޤް ކުރެވިފައިވާ މުޢާހަދާ ކަމަށްވާ ސީޑޯ ހަރުދަނާކޮށް ތަންފީޒް ކުރެއްވުމަށާއި، އަދި ދެމެހެއްޓެނިވި ތަރައްޤީގެ ލަނޑުދަނޑިތަކުގައި އެއްބަސްވެފައިވާ ކަންތައްތައް އެކަށީގެންވާ ހަރުދަނާ ގޮތެއްގައި ތަންފީޒް ކުރެއްވުމަށް އެހީތެރިވެދިނުމެވެ.
ރާއްޖޭގައި ޖެންޑަރ ފޯކަލް ޕޮއިންޓުން ޢައްޔަންކުރެވިފައިވަނީ 2015 ވަނަ އަހަރުގައެވެ. މިއީ އަންހެނުންނަށް ކުރާ ނޭދެވޭ ތަފާތުކުރުންތައް ނައްތާލުމާބެހޭ މުޢާހަދާ ހަރުދަނާ ގޮތެއްގައި ތަންފީޒް ކުރުމަށާއި، އެކި ދާއިރާތަކުން ކުރިޔަށްގެންދަވާ ޕްރޮގްރާމްތަކާއި މަޝްރޫއްތައް ތައްޔާޔާރުކުރުމުގައްޔާއި ތަންފީޒްކުރުމުގައި، ޖެންޑަރގެ ނަޒަރިއްޔާތަކުން އެ ޕްރޮގްރާމްތަކާއި، މަޝްރޫޢުތައް އެކުލަވާލުމުގެ މަޤްޞަދުގައި ޢައްޔަންކުރައްވާފައިވާ ބައެކެވެ.
މިނިސްޓްރީ އޮފް ޖެންޑަރ އެންޑް ފެމިލީއާއި ޔޫ.އެން ވިމެން ގުޅިގެން ފެއްޓެވި "ޖެންޑަރ ރެސްޕޮންސިވް ބަޖެޓިންގް ޕްރޮގްރާމް މިމަހުގެ 11 ވަނަ ދުވަހާ ހަމަޔަށް ކުރިޔަށް ގެންދަވާނެއެވެ. މި ޕްރޮގްރާމްގައި ޖެންޑަރ ފޯކަލް ޕޮއިންޓުންގެ ގޮތުގައި ޢައްޔަންކުރައްވާފައިވާ ފަރާތްތަކުގެ ތެރެއިން 25 ފަރާތަކުން ބައިވެރިވެފައިވެއެވެ. މީގެތެރޭގައި ތަޢުލީމާއި، ޞިއްޙަތު، އިޖްތިމާޢީ އަދި ތަންފީޒީ އިދާރާތަކަށް ނިޞްބަތްވާ އެ އިދާރާތަކުގެ އިސް މަސްއޫލުވެރިން ހިމެނިވަޑައިގަންނަވައެވެ.
މޫކައި ހޮޓެލްގައި ބޭއްވެވި މި ބައްދަލުވުމުގައި، ވާހަކަފުޅު ދައްކަވަމުން މިނިސްޓަރ އޮފް ޖެންޑަރ އެންޑް ފެމިލީ ޒެނީޝާ ޝަހީދު ޒަކީ ވިދާޅުވީ، ޖެންޑަރ މެއިން ސްޓްރީމް ކުރުމުގެ ސިޔާސަތު ތަންފީޒްކުރެއްވުމަށް ސަރުކާރުން ވަރަށް ބޮޑު އަހައްމިއްޔަތުކަމެއް ދެއްވާ ކަމަށާއި، އެކަން ދެމެހެއްޓުމަށް ހުރިހައި ފަރާތެއްގެ އެއްބާރުލުން ބޭނުންވާކަމަށެވެ.
"ދިވެހި މުޖުތަމަޢުގައި ދެ ޖިންސުގެ ދެމެދުގައި ހުންނަ ތަފާތުތައް ކުޑަކުރުމާއި، ޖެންޑަރ މެއިންސްޓްރީމް ކުރުމުގެ މަސައްކަތަކީ ވަރަށް މުހިންމު ކަމެއް. މިގޮތުން މިއަދު ޖެންޑަރ ފޯކަލް ޕޮއިންޓުންނަށް އަމާޒުކޮށްގެން ފެށި " ރެސްޕޮންސިވް ބަޖެޓިންގް" ޕްރޮގްރާމަކީ، ޖެންޑަރ މެއިންސްޓްރީމް ކުރުމުގެ ސިޔާސަތުގެ ދަށުން ކުރިޔަށްގެންދާ ވަރަށް ޚާއްޞަ ޙަރަކާތެއް. އެގިވަޑައިގަންނަވާނޭ ފަދައިން ހުރިހާ ދާއިރާތަކެއްގައި، ޢަމަލުކުރުމަށް ކަނޑައަޅާ ސިޔާސަތުތަކާއި، ޤަވާއިދުތަކާއި މަޝްރޫއްތަކުގައި ޖެންޑަރގެ ނަޒަރުގައި ބެލިފައިވާ މިންވަރު މޮނިޓަރކޮށް، މިސިޔާސަތު ދެމެހެއްޓުމަށް ބާރު އެޅުމަކީ، މިމިނިސްޓްރީން ވަރަށް ބޮޑު އަހައްމިއްޔަތުކަމެއްދޭ ކަމެއް. އަދި ޖެންޑަރ މެއިންސްޓްރީމް ކުރުމުގެ މަސައްކަތަކީ މިނިސްޓްރީގެ މޭންޑޭޓްކުރެވިފައިވާކަމެއް ކަމުގައިވީނަމަވެސް މިއީ ތިޔަ އެންމެހައި މުއައްސަސާތަކުގެ އެއްބާރުލުން ލިބިގެން ނޫނީ ކާމިޔާބު ކުރެވޭނޭ މަސައްކަތެއް ނޫން. މިއަދު މި ޓްރެއިންނިންގައި ގިނަ އަދަދަކުން އެކި އެކި ވުޒާރާތަކުން ބައިވެރިވެފައިވާކަމީ އަޅުގަނޑު ވަރަށް އުފާކުރާ ކަމެއް" މިނިސްޓަރ އޮފް ފެމިލީ އެންޑް ޖެންޑަރ ޒެނީޝާ ޝަހީދު ޒަކީ ވިދާޅުވިއެވެ.
މި ބައްދަލުވުމުގެ ބައިވެރިންނާއި މަޢުލޫމާތު ޙިއްޞާކުރަމުންދަނީ، ޔޫ.އެން ވިމެންގެ ކަމާބެހޭ ފަންނީ މާހިރުންނެވެ. މި ބައްދަލުވުމުގައި، އިޤްތިޞާދީ އަދި އިޖްތިމާޢީ ކަންކަން ޒިންމާދާރުކަމާއެކު ކުރިޔަށް ގެންދިއުމަށް، އަމާޒުކަނޑައަޅާނޭ ގޮތްތަކާއި، ހަރުދަނާ ކަމާއެކު ޖެންޑަރ މެއިންސްޓްރީމް ކުރުމުގެ ކަންކަން ކުރިޔަށްގެންދާނޭ ގޮތްތައް ބައިވެރިންނާ ޙިއްޞާ ކުރެވިގެންދާނޭކަމަށް ޖެންޑަރ މިނިސްޓްރީން ވިދާޅުވެއެވެ. އެގޮތުން ސިޔާސަތުތައް ކަނޑައެޅުމާއި، މަޝްރޫޢުތައް އެކުލަވާލުމުގައި ޖިންސުގެ ހަމަހަމަކަން ހިފަހައްޓާނޭ ގޮތް ބައިވެރިންނާ ޙިއްޞާކޮށްފައިވެއެވެ.