ދިވެހިރާއްޖޭގެ ޖުމުހޫރިއްޔާގެ ޤާނޫނުއަސާސީގެ 231 ވަނަ މާއްދާގެ (ނ) އަށް ކުޑަހުވަދޫ ދާއިރާގެ މެންބަރު އަޙްމަދު އާމިރު، ހުށައެޅުއްވި އިސްލާޙަކީ، ލޯކަލް ކައުންސިލުތަކުގެ އުމުރު 3 އަހަރުގެ ދައުރަކުން 5 އަހަރުގެ ދައުރަކަށް ބަދަލުކުރެއްވުމަށް ޤާނޫނުއަސާސީއަށް ހުށަހެޅުއްވި އިޞްލާޙެކެވެ، މި އިސްލާހް މަޖިލީހަށް ބަލައިގަނެ ގައުމީ ސަލާމަތާބެހޭ ކޮމެޓީއަށް ފޮނުވުމުން އެކޮމެޓީން ވަނީ ބިލް ހުށައެޅުއްވިގޮތަށް ފާސްކުރައްވައި މަޖިލީހުގެ ތަޅުމަށް ފޮނުއްވާފައެވެ.
މިއިސްލާހުގައި ވަނީ ކޮންމެ ތިން އަހަރަކުން ލޯކަލް ކައުންސިލުތަކުގެ އިންތިޚާބު ބާއްވަން ޖެހުމުން މާލީ ގޮތުންނާއި އިދާރީ ގޮތުން ބޮޑެތި ތަކުލީފްތަކެއް ދައުލަތަށް ކުރިމަތިވާކަމަށެވެ. އަދި ކޮންމެ ފަސް އަހަރަކުން އިންތިޚާބު ބޭއްވުމުން މިހާރު ހިނގާ ޚަރަދުގެ ބޮޑު ބައެއް ސަލާމަތްކުރެވި ރައްޔިތުންގެ ތަރައްޤީއަށް އެފައިސާ ޚަރަދުކުރެވޭނެކަމަށާއި، ކައުންސިލުތަކުގެ ދައުރު ތިން އަހަރަށް އޮތުމަކީ، ޤާބިލް ފަރާތްތައް ކައުންސިލްތަކަށް ކުރިމަތިލުމަށް އޮތް ހުރަހެއްކަމަށްވެސް މިއިސްލާހުގައިވެއެވެ. އަދި ފަސް އަހަރަށް ކައުންސިލުތަކުގެ ދައުރު އިތުރުކުރުމަކީ އިޤްތިޞާދީ ގޮތުންނާއި އިޖްތިމާއީގޮތުންވެސް ޤައުމަށް އެންމެ ފައިދާހުރިގޮތް ކަމަށްވެސް މިބިލުގައިވެއެވެ.
img:http://s3.psmnews.mv/images/660x400/6025.jpg|ޤާނޫނުއަސާސީއަށް އިސްލާހު ހުށަހެޅުއްވި ކުޑަހުވަދޫ ދާއިރާގެ މެމްބަރު އަހުމަދު އާމިރު / ފޮޓޯ:ޕީއެސްއެމް
މި ބިލަކީ ޤާނޫނު އަސާސީއަށް ގެންނަވަން ހުށައަޅުއްވާފައިވާ މިއިސްލާހަކަށްވުމުން، ބިލްފާސްކުރެއްވުމަށް 64 މެމްބަރުންގެ ވޯޓް ބޭނުންވެއެވެ. އެހެން ނަމަވެސް މިއަދު ބޭއްވި ޖަލްސާގައި ލޯކަލް ކައުންސިލުތަކުގެ ދައުރު 3 އަހަރުން 5 އަހަރަށް ބަދަލުކުރެއްވުމަށް އިސްލާހު ގެނައުމަށް ނުފެންނަކަމަށް ވޯޓުގައި ބައިވެރިވި 17 މެންބަރުން، ވޯޓުދެއްވާފައިވެއެވެ. މިއިސްލާހު ގެންނަން ފެންނަކަމަށް ވޯޓުދިނީ 51 މެންބަރުންނެވެ.
މިއަދުގެ ޖަލްސާގައި ދިވެހިރާއްޖޭގެ ޖުމުހޫރިއްޔާގެ ޤާނޫނުއަސާސީގެ 231 ވަނަ މާއްދާގެ (ހ) އަދި (ށ) އަށް އިސްލާހް ގެނައުމަށްވެސް ކުޑަހުވަދޫ ދާއިރާގެ މެންބަރު ހުށައަޅުއްވާފައިވާ އިސްލާހަށްވެސް ވޯޓަށް އައްސަވައި، ބޭނުންވާ އަދަދަށް މެންބަރުންގެ ވޯޓު ނުލިބުމުންވަނީ މަޖިލީހުން ބޭރުވެފައެވެ. މިއިސްލާހަކީ އާންމު ރައްޔިތުންގެ ތެރޭގައި ނަގާ ވޯޓަކުން ކައުންސިލްތަކުގެ ރައީސް އާއި ނައިބު ރައީސް އިންތިހާބު ކުރަން ހުށަހެޅުއްވި އިސްލާހެކެވެ.