ކުޅިވަރު

ފުޓްބޯޅަ ކަލަންޑަރު ފައިނަލްކުރާނީ ކޮމިޓީތައް ހޮވައި ނިމުމުން: އެފްއޭއެމް


ކުރިއަށް އޮތް ފުޓްބޯޅަ ސީޒަނުގެ ކަލަންޑަރު ފައިނަލްކުރާނީ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ކޮމިޓީތަކަށް މެންބަރުން ހޮވައި ނިމުމުން ކަމަށް އެ އިދާރާއިން ބުނެފިއެވެ.

ހޮނިހިރު ދުވަހު މަގާމާ ހަވާލުވި ރައީސް އަޙްމަދު ޠާރިޤު (ޓޮމް) ބޭއްވި ފުރަތަމަ އެކްސްކޯ ބައްދަލުވުމުގައި ނިންމާފައިވަނީ އެ އިދާރާގެ ކޮމިޓީތަކަށް އަންނަ މަހުގެ ތިން ވަނަ ދުވަހުގެ ކުރިން މީހުން ހޮވައި ނިންމުމަށެވެ. އަދި މި ފުރުސަތު މެމްބަރު ކުލަބުތަކަށް ހުޅުވާލުމަށެވެ.

އެފްއޭއެމުގެ ކަލަންޑަރުގައި ހިމަނާނެ ކަމަށް ބެލެވޭ މައިގަނޑު މުބާރާތްތަކަކީ ގައުމީ ފުޓްބޯޅަ މުބާރާތާއި އެފްއޭކަޕް އަދި ދިވެހި ޕްރެމިއާ ލީގެވެ. މީގެ އިތުރުން އަތޮޅު އަދި ޒޯން ފުޓްބޯޅަ މުބާރާތްތަކާއި ދެ ވަނަ ޑިވިޝަނާއި ތިން ވަނަ ޑިވިޝަން ފުޓްބޯޅަ މުބާރާތް ހިމެނެ އެވެ.

އެފްއޭއެމުގެ ހިންގުން ބޮއްސުންލައި، އިދާރީ އަދި މާލީ މައްސަލަތަކާ ހުރެ ފުޓްބޯޅައިގެ މުހިންމު ހަރަކާތްތައް ހުއްޓިފައި އޮންނަތާ މިހާރު ދޮޅު އަހަރަށްވުރެ ގިނަ ދުވަސްވެއްޖެ އެވެ.