ރާއްޖޭގެ ފަޚުރުވެރި 51 ވަނަ މިނިވަންދުވަސް ފާހަގަކުރަމުންދާއިރު، މިނިވަންކަމުގެ ދިފާޢުގައި މަސައްކަތް ކުރެއްވި ޤައުމީ އަބްޠާލުން ކުރެއްވި މަސައްކަތްޕުޅަކީ ފާހަގަކޮށްލެވޭ މަސައްކަތްޕުޅެކެވެ. ރާއްޖެފަދަ ދުނިޔޭގެ ނިސްބަތުން ކުޑަޤައުމެއް، މިނިވަންކަންމަތީ 51 އެއްވަނަ އަހަރު ގުނަމުންދާއިރު މި މިނިވަންކަން ޙިމާޔަތްކުރައްވާ ބޭރުގެ ދައުލަތްތަކުން ރާއްޖެއަށް ޚާރިޖީ ގޮތުން ނުފޫޒު ފޯރުވުމުގެ ފުރުޞަތު ނުދެއްވުމަށް ރާއްޖޭގެ ރައީސްކަން ކުރެއްވި ބޭބޭފުޅުން މުހިންމު މަސައްކަތްޕުޅެއް ކުރައްވާފައިވެއެވެ. ބޭރުގެ ނުފޫޒުން ރާއްޖެ ދިފާޢުކުރައްވާ ޚާރިޖީ ސިޔާސަތު އަހަރަކަށްވުރެ އަހަރެއް ވަރުގަދަކުރައްވަމުން ގެންދެވިއެވެ.
ރާއްޖެއަށް މިނިވަންކަން ހޯއްދަވައިދެއްވުމުގައި އެންމެ މުހިންމު ދައުރެއް އަދާކުރެއްވި ދިވެހިޖުމްހޫރިއްޔާ ދެވަނަ ރައީސް ސުމުއްވުލް އަމީރު އިބްރާހީމް ނާޞިރުއެވެ. އެމަނިކުފާނުގެ ވެރިކަމުގައި ބޭރު ދުނިޔޭގައި ރާއްޖެއަކީ މިނިވަން ދައުލަތެއްގެ ގޮތުގައި އިޢުލާންކުރައްވައި، އދ. ގެ މެންބަރު ޤައުމެއްގެ މަޤާމު ރާއްޖެއަށް ހޯއްދަވައިދެއްވައި މިނިވަންކަމުގެ ފުރިހަމަ ފޮނިމީރުކަން ދިވެހިންނަށް ހޯއްދަވައިދެއްވިއެވެ. ރާއްޖެއަކީ މިނިވަން ދައުލަތެއްގެ ގޮތުގައި ބައިނަލްއަޤްވާމީ ދުނިޔެ ބަލައިގަތް ހިސާބުން އަވައްޓެރި ޤައުމުތަކާއެކު ޚާރިޖީ ގުޅުން ޤާއިމުކުރެއްވުމުގެ މުހިންމު މަސައްކަތްޕުޅު ފެއްޓެވީވެސް އެމަނިކުފާނުގެ އިސްނެންގެވުމުގެ މަތިންނެވެ.
ދިވެހިރާއްޖޭގެ މިނިވަންކަމުގެ 51 ވަނަ އަހަރު ފާހަގަކުރަމުންދާއިރު މިނިވަންކަމުގައި ރާއްޖެ ހޭދަކުރެއްވި 51 އަހަރުގެ ތެރެއިން 30 އަހަރު ދިވެހިރާއްޖޭގެ ރައީސުލްޖުމްހޫރިއްޔާގެ މަޤާމުގައި ހުންނަވައި ކުރީގެ ރައީސުލްޖުމްހޫރިއްޔާ، އަލްއުސްތާޛް މައުމޫން ޢަބްދުލްޤައްޔޫމް މިނިވަންކަމުގެ ދިފާޢުގައި ކުރެއްވި މަސައްކަތްޕުޅަކީ މިނިވަންކަމުގެ ދަތުރުގައި ދިވެހިން ޝުކުރުވެރިކަމާއެކު ފާހަގަކުރާ މަސައްކަތްޕުޅެކެވެ. ދިވެހިރާއްޖޭގެ ޚާރިޖީ ސިޔާސަތު ވަރުގަދަކުރައްވައި، އަސްކަރީ އަދި ދާޚިލީ، އިޤްތިޞާދީ ގޮތުން ރާއްޖެ ވަރުގަދަކުރެއްވުމަށް އެމަނިކުފާނުގެ ޒަޢާމަތުގައި ކުރެއްވި މަސައްކަތްޕުޅު ރާއްޖެއަށް ލިބުނު މިނިވަންކަން އަޅުގަނޑުމެންނާ ހަމައަށް ވާޞިލުވުމުގައި މުހިންމު ދައުރެއް އަދާކުރިއެވެ.
ދިވެހިރާއްޖެ ޤައުމެއްގެ ގޮތުގައި ބޭރުދުނިޔޭގައި ތަޢާރުފްކުރައްވައި، އެކަހެރިވެފައި އޮތް އޮތުން ނިމުމަކަށް ގެންނަވައި، ރާއްޖެއަކީ ދުނިޔެއަށް މަޝްހޫރު ޤައުމެއްގެ ގޮތުގައި ހެއްދެވިއެވެ. މިނިވަންކަން ލިބުމަށްފަހު ދިވެހިރާއްޖޭގެ މިނިވަންކަމަށް ކުރިމަތިވި ނޮވެމްބަރު 3 ގެ ނުރައްކާތެރި ޙަމަލާގައި ޢަދުއްވުންގެ މައްޗަށް ރާއްޖެއަށް ނަޞްރު ލިބިގެންދިޔައީ ރައީސް މައުމޫންގެ ޒަޢާމަތުގައެވެ. މިޙަމަލާއިން ރާއްޖެ ސަލާމަތް ކުރުމުގައި މުހިންމު ދައުރެއް އަދާކުރި އިންޑިއާ ސިފައިންގެ އެހީތެރިކަން ހޯއްދެވުމުގައި ރައީސް މައުމޫން މުހިންމު ދައުރެއް އަދާކުރައްވާފައިވެއެވެ. އެމަނިކުފާނުގެ ޒަޢާމަތުގައި ރާއްޖޭގެ ދާޚިލީ މިނިވަންކަން ވަރުގަދަ ކުރައްވައި، ޚިޔާލުފާޅުކުރުމުގެ މިނިވަންކަމާއެކު ޒަމާނީ ޑިމޮކްރަސީއެއް ރާއްޖެއަށް ތަޢާރަފްކޮށްދެއްވުން ވެގެންދިޔައީ މިނިވަންކަމުގެ ދަތުރުގައި ރާއްޖެއަށް ލިބިގެންދިޔަ ފާހަގަކޮށްލެވޭ ކުރިއެރުމަކަށެވެ.
މިނިވަންކަމުގެ ދަތުރުގައި ޤައުމުގެ ވަލިއްޔުލް އަމްރުގެ މަޤާމުގައި 3 އަހަރުދުވަހު ހޭދަކުރެއްވި ކުރީގެ ރައީސް މުޙައްމަދު ނަޝީދުވެސް ވަނީ ޚާރިޖީ މިނިވަންކަން ވަރުގަދަ ކުރެއްވުމަށް މުހިންމު މަސައްކަތްޕުޅުތަކެއް ކުރައްވާފައެވެ. އެގޮތުން ޒަމާނުއްސުރެ ރާއްޖެއިން ޢަމަލުކުރަމުންދާ، ބޭރުގެ ފަރާތްތަކަށް ރާއްޖޭގެ ދާޚިލީ ކަންކަމުގައި ބަސްބުނުމުގެ ފުރުޞަތު ނުދެއްވުމުގެ ސިޔާސަތު އެމަނިކުފާނުވެސް ދެމެހެއްޓެވިއެވެ.
ކުރީގެ ރައީސުލްޖުމްހޫރިއްޔާ ޑރ. މުޙައްމަދު ވަޙީދު ޙަސަންމަނިކު ދިވެހިރާއްޖޭގެ ޒަޢާމަތާ ޙަވާލުވެވަޑައިގެންފައިވަނީ ދާޚިލީގޮތުން ވަރަށް ޚުޠޫރައްތެރި ދަނޑިވަޅެއްގައި ރާއްޖެވަނިކޮށެވެ. އެހެންނަމަވެސް އެމަނިކުފާނުގެ ސަރުކާރުން ދިވެހިރާއްޖޭގެ މިނިވަންކަމާ ސިޔާދަތު ރައްކާތެރިކުރައްވައި، ބޭރުޤައުމުތަކުގެ ނުފޫޒުން ރާއްޖެ ސަލާމަތްކުރެއްވުމަށް ކުރެއްވި މަސައްކަތްޕުޅަކީ ހިތްވަރުގަދަ މަސައްކަތްޕުޅެކެވެ. އެހެން ރައީސުންނެކޭ އެއްގޮތަށް އެމަނިކުފާނުވެސް ނުހަނު ޤައުމީ ޖޯޝުގައި ޤައުމުގެ މިނިވަންކަން ދަމަހައްޓަވައި، ދިފާޢުގައި މަސައްޕުޅު ކުރެއްވިއެވެ.
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވެރިކަމާ ޙަވާލުވެވަޑައިގަތުމަށްފަހު އެންމެ އިސްކަމެއް ދެއްވައިގެން ކުރެއްވި އެއްމަސައްކަތްޕުޅަކީ ރާއްޖޭގެ ޚާރިޖީ ސިޔާސަތު އިތުރަށް ވަރުގަދަ ކުރެއްވުމެވެ. ދިވެހި ދައުލަތުގެ މައްޗަށް ހުޅަނގާއި އަވައްޓެރި އެތައް ޤައުމެއްގެ ޕްރެޝަރު ކުރިމަތިވެފައިވާ ދަނޑިވަޑެއްގައި ޒަޢާމަތާ ޙަވާލުވެވަޑައިގަތުމަށްފަހު ކެރިވަޑައިގެން އެފަދަ އެއްވެސް ޕްރެޝަރަކަށް ޖާގަ ނުދެއްވާނެކަމަށް ބައިނަލްއަޤްވާމީ މައިދާނުގައި ތަކުރާރުކޮށް އިޢުލާނުކުރެއްވިއެވެ. ދިވެހިރާއްޖެއަކީ ކިތަންމެ ކުޑަ ޤައުމެއްނަމަވެސް ދާޚިލީ މިނިވަންކަމުގައި ބޮޑެތި ޤައުމުތަކާ އެއް ހަމައެއްގައި ޙައްޤުތައް ލިބެންޖެހޭނެކަމަށް ވިދާޅުވާ ވިދާޅުވުން އެތައް ފަހަރަކު ތަކުރާރުކުރެއްވައި، ބޮޑެތި ޤައުމުތަކަށް އެމެސެޖް ރައްދުކޮށްދެއްވީ ޤައުމީ މިނިވަންކަމުގެ ދިފާޢުގައި ކެރިވަޑައިގެން ހުންނަވައެވެ. ބައިނަލްއަޤްވާމީ ޤައުމުތަކުން ރާއްޖޭގެ ކަންކަމުގައި ބަސްބުނުމުގެ ފުރުޞަތުވެސް ނުދެއްވާނެކަމަށް ވިދާޅުވެ އަޅުގަނޑުމެންގެ ކަންކަން ނިންމާނީ އަޅުގަނޑުމެން އަމިއްލައަށް ކަމަށާއި، އެ ފެންވަރު އަޅުގަނޑުމެންގެ އެބަހުރިކަމަށް ވިދާޅުވެ ޤައުމީ މިނިވަންކަމުގެ ޝުޢޫރު ރައްޔިތުންގެ ހިތްތަކުގައި އާލާކުރެއްވިއެވެ.
ފަންސާސް އެއްވަނަ މިނިވަންދުވަސް އަޅުގަނޑުމެން ފާހަގަކުރަމުންދާއިރު މިނިވަންކަން ދަމަހައްޓައި ދިވެހި ޤައުމު ބޭރުގެ ނުފޫޒުން އެއްކިބާވެގެންވާ ފުރިހަމަ މިނިވަން ދައުލަތެއްގެ ގޮތުގައި އަޅުގަނޑުމެންނާހަމައަށް ވާޞިލުކޮށްދެއްވުމުގައި ރެއާއި ދުވާލު މަސައްކަތްކުރެއްވި ބޭބޭފުޅުންގެ ޒިކުރާއާކޮށް އެބޭބޭފުޅުންގެ މުހިންމު މަސައްކަތްޕުޅުގެ އަގު ވަޒަންކުރަންޖެހެއެވެ. އަޅުގަނޑުމެންގެ ދުޢާއަކީ އިސްލާމް ދީނުގެ މާތް ހިދާޔަތުގެ ދަށުގައި، އުފާވެރި ޖީލެއް ދިރިއުޅޭ މިނިވަން ޤައުމެއްގެ ގޮތުގައި މާތްﷲ ސުބުޙާނަހޫ ވަތަޢާލާ އަޅުގަނޑުމެން އަބަދަށް ލެހެއްޓެވުމެވެ.