ކ.ގުރައިދޫގައި ހުންނަ ދައުލަތުގެ ޚާއްޞަ އެހީއަށް ބޭނުންވާ މީހުންގެ މަރުކަޒުގެ އިންފްރާސްޓްރަކްޗަރ ތަރައްޤީކުރެއްވުމަށް ސަރުކާރުން ކުރައްވަމުންގެންދަވާ މަސައްކަތުގެ ދަށުން އެމަރުކަޒުގައި، ސާފުބޯފެން ފޯރުކޮށްދިނުމަށާއި، އެ މަރުކަޒުގެ ވޯކް-ވޭތަކުގައި ގާ އެތުރުމުގެ މަސައްކަތް ހެލްތު މިނިސްޓްރީން ދެކުންފުންޏަކާ ޙަވާލުކުރައްވައިފިއެވެ.
މަސައްކަތް ޙަވާލުކުރެއްވުމަށް މިއަދު ބޭއްވި ރަސްމިއްޔާތުގައި، ދައުލަތުގެ ޚާއްޞަ އެހީއަށް ބޭނުންވާ މީހުންގެ މަރުކަޒުގައި ސާފު ފެން ރައްކާކުރެވޭނެ ނިޒާމެއްް ޤާއިމް ކުރުމުގެ މަސައްކަތް ޙަވާލުކުރައްވާފައިވަނީ، ޔުމަން ކޮންސްޓްރަކްޝަން ޕްރައިވެޓް ލިމިޓެޑް ނަމަކަށް ކިޔާ ކުންފުންޏަކާއެވެ. ދައުލަތުގެ ޚާއްޞަ އެހީއަށް ބޭނުންވާ މީހުންގެ މަރުކަޒުގައި މިހާރު ބޭނުންކުރާ ފެން ވަރަށް ބޮޑަށް ތަޣައްޔަރުވެފައިވާތީ މިކަން ޙައްލު ކުރެއްވުމުގެ ގޮތުން ޙަވާލު ކުރި މި މަސައްކަތް 37 ދުވަހުގެ ތެރޭގައި ނިންމަންޖެހެއެވެ. މަސައްކަތް އެ ކުންފުންޏާ ހަވާލުކުރައްވާފައިވަނީ 952،399.00 ( ނުވަ ލައްކަ ފަންސާސް ދެހާސް ތިންސަތޭކަ ނުވަދިހަ ނުވަ) ރުފިޔާއަށެވެ.
މިއެއްބަސްވުމުގައި ސަރުކާރުގެ ފަރާތުން ސޮއިކުރެއްވީ، މިނިސްޓަރ އޮފް ހެލްތު އަބްދުﷲ ނާޒިމެވެ. އަދި ޔުމަން ކޮންސްޓްރަކްޝަންގެ ފަރާތުން ސޮއިކުރެއްވީ، އެކުންފުނީގެ މެނޭޖިންގް ޑިރެކްޓަރ މުޙައްމަދު ނަސީރެވެ.
މި ޕްރޮޖެކްޓުގެ ދަށުން އެ މަރުކަޒުގައި 80،000 ލީޓަރުގެ ފެން ރައްކާ ކުރެވޭނޭ ނިޒާމެއް ޤާއިމް ކުރެވިގެންދާނެއެވެ. އަދި މަރުކަޒުގެ ހުރިހައި ޢިމާރާތަކައް މިފެން ލިބޭނޭ އިންތިޒާމް ހަމަޖެހިގެންދާނޭކަމަށް ހެލްތު މިނިސްޓްރީން ވިދާޅުވެއެވެ.
މިއަދު ސަރުކާރުން ވަނީ، ދައުލަތުގެ ޚާއްޞަ އެހީއަށް ބޭނުންވާ މީހުންގެ މަރުކަޒުގެ ވޯކްވޭގައި ގައު އެޅުމަށް، ވެހިކޮން ބިލްޑާސް ޕްރައިވެޓް ލިމިޓެޑް ނަމަކަށް ކިޔާ ކުންފުންޏަކާއިއެކުވެސް އެއްބަސްވުމެއްގައި ސޮއި ކުރައްވާފައެވެ. މިއެއްބަސްވުމުގައި ސަރުކާރުގެ ފަރާތުން ސޮއިކުރެއްވީ، މިނިސްޓަރ އޮފް ހެލްތު އަބްދުﷲ ނާޒިމެވެ. އަދި ވެހިކޮން ބިލްޑާސް ޕްރައިވެޓް ލިމިޓެޑްގެ ފަރާތުން ސޮއިކުރެއްވީ، އެކުންފުނީގެ މެނޭޖިންގް ޑިރެކްޓަރ އަޙްމަދު ރަޝީދެވެ. 55 ދުވަހުގެ ތެރޭގައި މިމަސައްކަތް ނިންމުމަށް އެކުންފުންޏާއި ޙަވާލު ކުރައްވާފައިވަނީ 1،446،742.50 ( އެއްމިލިޔަން ހަތަރު ލައްކަ ސާޅީސް ހަހާސް ހަތްސަތޭކަ ސާޅީސް ދެރުފިޔާ ފަންސަވީސް ލާރި)އަށެވެ.
އެއްބަސްވުންތަކުގައި ސޮއިކުރެއްވުމަށް ފަހު ވާހަކަފުޅު ދައްކަވަމުން މިނިސްޓަރ އޮފް ހެލްތު އަބްދުﷲ ނާޒިމް އިބްރާހިމް ވިދާޅުވީ، މަރުކަޒުގެ ވޯކްޕޭވްގައި ގާ އެތުރުމުން ޚާއްޞަ ޙާލަތްތަކުގައި ތިބޭ މީހުންނަށް ހިގާބިގާވެ އުޅުމަށް ފަސޭހަވެ، ވިއްސާރަވެ ފެންބޮޑުވާ މައްސަލައަށް ދާއިމީ ޙައްލެއް އަންނާނޭކަމަށެވެ. އަދި މަރުކަޒުގައި ބުއިމަށާއި، އަދި އެހެނިހެން ޒަރޫރީ ބޭނުންތަކަށް ސާފުފެން ލިބޭނޭ އިންތިޒާމް ހަމަޖެހިގެންދާނޭކަމަށެވެ.
މިރަސްމިއްޔާތުގައި ހެލްތް މިނިސްޓަރ ދެއްކެވި ވާހަކަފުޅުގައި، މި ސަރުކާރު ވެރިކަމަށް އައިއިރު، ޚާއްސަ އެހީ އަށް ބޭނުންވާ މީހުންގެ މަރުކަޒުގެ ޙާލަތު ދަށްކަން ފާހަގަކުރައްވާ، މިސަރުކާރުގެ ސިޔާސީ ވައުދުތަކުގެ ތެރޭގައި ހިމަނުއްވައިގެން އެތަން ތަރައްޤީކުރައްވަން ގިނަ މަސައްކަތްތަކެއް ކުރަމުންގެންދަވާކަން ފާހަގަކުރެއްވިއެވެ. އެގޮތުން މިހާރުވެސް ގާތްގަނޑަކަށް ދެ މިލިއަނެއްހާ ރުފިޔާގެ މަޝްރުއޫތައް ހިނގަމުންދާކަމަށް މިނިސްޓަރ ވިދާޅުވިއެވެ.