އިރުއަރާ އިރުއޮއްސޭ ކޮންމެ ދުވަހަކީ ރާއްޖޭގައި އިސްލާމް ދީން ނޫންދީންތަކަށް ޖާގަދޭން އެކިފަރާތްތަކުން ޕްރެޝަރ ކުރާ ދުވަހެއްކަމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ.
މިނިވަންދުވަހުގެ މުނާސަބަތުގައި ބޭއްވި ދިދަނެގުމުގެ ރަސްމިއްޔާތުގައި ވާހަކަފުޅުދައްކަވަމުން ރައީސް ޔާމީން ވިދާޅުވީ ރާއްޖޭގައި އިސްލާމީ ޝަރީޢަތް ތަންފީޒު ކުރާތީ އެކަމާމެދު ޙަސަދަވެރިވާ ޚިޔާނާތްތެރީންތަކެއް އެބަތިބިކަމަށެވެ. އަދި ދިވެހިރާއްޖޭގައި އެހެންދީންތަކަށް ފުރުޞަތު ދިނުމަށް އެކިފަރާތްތަކުން ތަކުރާރުކޮށް ސަރުކާރަށް ޕްރެޝަރ ކުރަމުންދާކަމަށެވެ. އެހެންނަމަވެސް އެފުރުޞަތު އެއްވެސް ހާލެއްގައި ނުދެއްވާނެކަމަށް އެމަނިކުފާނުވިދާޅުވިއެވެ.
ރާއްޖޭގައި އިސްލާމް ދީން ނޫން އެހެން ދީނަކަށް ޖާގަ ނުދެއްވުމަކީ ރާއްޖޭގެ ޤާނޫނީ ނިޒާމުގެ މައިގަނޑު އަސާސްކަން ފާހަގަކުރައްވައި މިއީ ދިވެހިންގެ ދާޚިލީ ކަމެއް ކަމުގައި އެމަނިކުފާނު ވިދާޅުވިއެވެ. އަދި ބޭރުގެ އެއްވެސް ދައުލަތަކަށް ދިވެހިންގެ ދާޚިލީ ސިޔާސަތުތަކުގެ މައްޗަށް ބާރުފޯރުވައި ބަސްބުނުމުގެ ފުރުޞަތު ނުދެއްވާނެކަމަށާއި، އެފުރުޞަތު ދެއްވުމަކީ ހީނުކުރާވަރުގެ ނުފޫޒުތަކަށް ޤައުމު ހުޅުވިގެންދާނެކަމެއްކަމަށް އެމަނިކުފާނު ވިދާޅުވިއެވެ.
ރައީސްގެ ވާހަކަފުޅުގައި ސިޔާސީ ފައިދާ ޙާސިލްކުރުމަށްޓަކައި ރާއްޖޭގެ ދާޚިލީ މިނިވަންކަމަށް ގެއްލުންވާގޮތަށް ބައެއް ސިޔާސީ ފަރާތްތަކުން މަސައްކަތް ކުރާކަމަށް ވިދާޅުވެ އެކަން ކުށްވެރިކުރެއްވިއެވެ.
ބޭރުގެ ޕްރެޝަރތައް އެގޮތަށް ހުރި ނަމަވެސް އިސްލާމީ ބިންގާ ރާއްޖޭގައި ވަރުގަދަ ކުރައްވައި، އިސްލާމީ ޝަރީޢަތް ރާއްޖޭގައި ތަންފީޒުކުރައްވާނެކަމަށް ރައީސުލްޖުމްހޫރިއްޔާ ވިދާޅުވިއެވެ. އެގޮތުން މަރުގެ އަދަބުވެސް އިސްލާމީ ޝަރީއަތާއި، ޤާނޫނުގައި ބަޔާންކޮށްފައިވާ ގޮތުގެ މަތިން ރާއްޖޭގައި ތަންފީޒުކުރައްވާނެކަމަށް ވިދާޅުވިއެވެ.
ދީނުގައި ހައްދުފަހަނައަޅައި ދިއުމާއި، ހަރުކަށި ފިކުރުތަކަށް ރާއްޖޭގައި ފުރުޞަތު ނުދެއްވާނެކަމަށާއި އެފަދަ ފިކުރުތައް ރާއްޖެއިން ނައްތާލެއްވުމަށް ބައިނަލްއަޤްވާމީ މުޖުތަމައާ ގުޅިވަޑައިގެން މުހިންމު މަސައްކަތް ތަކެއް ކުރައްވަމުންދާކަމުގައި ރައީސުލްޖުމްހޫރިއްޔާ ވިދާޅުވިއެވެ.
ޝަރުޢީ ދާއިރާ ހަރުދަނާ ކުރައްވައި، ބާރުވެރި ކުރުވުމުގެ މުހިންމު މަސައްކަތްތަކެއް ސަރުކާރުން ކުރައްވައި ކާމިޔާބުކުރައްވާފައިވާކަމަށާއި، މިއީ ސަރުކާރުގެ ކާމިޔާބީއެއްގެ ގޮތުގައި އެމަނިކުފާނު ސިފަކުރެއްވިއެވެ. ރާއްޖެއަށް ދިމާވެފައިވާ އިޖްތިމާޢީ މައްސަލަތައް ޙައްލުކުރެއްވުމަށްޓަކައި ވަކިމީހަކަށް ބެލުމެއްނެތި ޤާނޫނު ތަންފީޒުކުރެއްވުމުގެ މަސައްކަތް ކުރައްވަމުންދާކަމަށާއި، މިއީ މުޅި ރާއްޖެއަށް ލިބުނު ކާމިޔާބީއެއްކަމަށް ރައީސް ވިދާޅުވިއެވެ.
ޤާނޫނުގެ ބާރު އެއްވެސް އިސްތިސްނާއެއް ނެތި ހުރިހާ ރައްޔިތުންގެ މައްޗަށް ހިނގާނެކަމަށް ރައީސް ވިދާޅުވިއެވެ. އަދި އިސްލާމީ ވެރިކަމެއްގެ އުސޫލުތައް އިތުރުރަށް އާލާކުރައްވައި، އިސްލާމީ ޝަރީޢަތް ރާއްޖޭގައި ވަރުގަދަކުރައްވާނެކަމަށް ރައީސުލްޖުމްހޫރިއްޔާ ވިދާޅުވިއެވެ.