ޤާނޫނީ އެހީތެރިކަން ބޭނުންވާ ފަރާތްތަކަށް އެހީތެރިކަން ފޯރުކޮށްދިނުމަކީ ޢަދުލު އިންސާފަށް ވާސިލުވުމުގެ މައިގަނޑު އެއް އަސާސް ކަމަށާއި، އެކަން ކަށަވަރު ކުރެއްވުމަށް ޝަރުޢީ ދާޢިރާއިން ކެނޑިނޭޅި މަސައްކަތް ކުރައްވަމުންދާކަމަށް ދިވެހިރާއްޖޭގެ އުއްތަމަ ފަނޑިޔާރު އަލްއުސްތާޛް ޢަބްދުﷲ ސަޢީދު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ޤާނޫނީ އެހީތެރިކަން ބޭނުންވާ ފަރާތްތަކަށް ލީގަލް އެއިޑް ފޯރުކޮށްދިނުމާ ގުޅޭގޮތުން މަޝްވަރާ ކުރެއްވުމަށް ބަންޑޮސް އައިލެންޑް ރިސޯޓްގައި ކުރިއަށްގެންދެވި "ޤާނޫނީ އެހީތެރިކަން ފޯރުކޮށްދިނުމާބެހޭ ޤައުމީ މަހާސިންތާ" ފެއްޓެވުމުގެ ރަސްމިއްޔާތު ޝަރަފްވެރިކޮށްދެއްވާ ވާހަކަފުޅު ދައްކަވަމުންނެވެ.
ބަންޑާރަނައިބުގެ އޮފީހާއި، ޔޫ.އެން.ޑީ.ޕީއާއި ފެމިލީ ޕްރޮޓެކްޝަން އޮތޯރިޓީ ގުޅިވަޑައިގެން ކުރިއަށްގެންދެވި ނޭޝަނަލް ލީގަލް އެއިޓް ކޮންފަރެންސަކީ، އެކިއެކި މައްސަލަތަކުގައި ޤާނޫނީ އެހީތެރިކަން ބޭނުންވާ ފަރާތްތަކަށް އެހީތެރިކަން ފޯރުކޮށް ދެއްވުމުގައި ދިމާވާ ގޮންޖެހުންތައް ދެނެގަނެ، އެކަންކަން ހައްލުކުރެއްވުމަށް ކުރެވިދާނެ ކަންކަމާ ގުޅޭގޮތުން ޤާނޫނީ ދާއިރާގައި ހަރަކާތްތެރިވާ ބޭބޭފުޅުންނާ މަޝްވަރާކުރެއްވުމަށް ކުރިއަށްގެންދެވި ކޮންފަރެންސެކެވެ.
ޤާނޫނީ އެހީތެރިކަން ފޯރުކޮށްދިނުމާގުޅޭ ޤައުމީ މަހާސިންތާ ފެއްޓެވުމުގެ ރަސްމިއްޔާތު ޝަރަފްވެރިކޮށްދެއްވައި ވާހަކަދައްކަވަމުން ދިވެހިރާއްޖޭގެ އުއްތަމަ ފަނޑިޔާރު އަލްއުސްތާޛް ޢަބްދުﷲ ސަޢީދު ވިދާޅުވީ އެކިއެކި މައްސަލަތަކުގައި ޤާނޫނީ އެހީތެރިކަން ބޭނުންވާ ފަރާތްތަކަށް އެހީތެރިކަން ފޯރުކޮށްދިނުމަކީ ޢަދުލު އިންސާފަށް ވާޞިލުވުމަށް މުހިންމު ދައުރެއް އަދާކުރާ ކަމެއްކަމަށެވެ. އަދި ޖިނާޢީ މައްސަލައެއްގެ ތުހުމަތު މީހެއްގެ މައްޗަށް ކުރެވިއްޖެނަމަ މާލީ ތަނަވަސްކަމެއް ނެތް މީހާއަށްވެސް މާލީ ތަނަވަސްކަން ހުރި މީހަކާ އެއްފެންވަރެއްގައި ދައުލަތުން އެހީތެރިކަން ފޯރުކޮށްދެއްވަން ޖެހިވަޑައިގަންނަވާނެކަމަށެވެ.
މި ރަސްމިއްޔާތުގައި ވާހަކަދައްކަވަމުން ބަންޑާރަނައިބު މުޙައްމަދު އަނިލް ވިދާޅުވީ، ޤާނޫނީ އެހީތެރިކަން ބޭނުންވާ ފަރާތްތަކަށް އެހީތެރިކަން ފޯރުކޮށްދިނުމަށް ޤާނޫނީ ވަކީލުން ނުލިބުމަކީ ކުރިމަތިވާ ބޮޑު ގޮންޖެހުމެއްކަމަށެވެ. އެގޮތުން ބޮޑު އަދަދުން ފައިސާ ހުށައަޅައިގެންވެސް ވަކީލުން ނުލިބޭކަން ބަންޑާރަނައިބު ފާހަގަކުރެއްވިއެވެ. އެހެންކަމުން ލީގަލް އެއިޑްގެ ހަރުދަނާ ނިޒާމެއް ޤާއިމުކުރެއްވުމުގައި ޤާނޫނީ ދާއިރާގައި މަސައްކަތް ކުރައްވާ ފަރާތްތަކުގެ އެއްބާރުލުން ބޭނުންވާކަމުގައި ވިދާޅުވިއެވެ.
ފެމިލީ ޕްރޮޓެކްޝަން އޮތޯރިޓީގެ ބޯޑުގެ ރައީސް އަނީސާ އަޙްމަދު ވިދާޅުވީ ގެވެށި އަނިޔާގެ މައްސަލަތަކާއި، އާއިލީ އެހެނިހެން މައްސަލަތަކުގެ ޝަރުޢީ މަރުހަލާ ފެށުމުގެ ކުރިންވެސް ޤާނޫނީ އެހީތެރިކަން ބޭނުންވާކަމަށެވެ. އަދި ލީގަލް އެއިޑްގެ ނިޒާމެއް ޤާއިމުކުރެވި ދެމެހެއްޓެނިވި ގޮތެއްގައި ހިންގެވުމުގެ މުހިންމުކަން ފާހަގަކުރެއްވިއެވެ.
މިރަސްމިއްޔާތުގައި ޔޫ.އެން.ޑީ.ޕީގެ ރެޒިޑެންޓް ކޯޑިނޭޓަރ ޝޯކޯ ނޯޑާ ވިދާޅުވީ މާލީ އެހީތެރިކަން ނެތް ފަރާތްތަކަށްވެސް ޤާނޫނީ އެހީތެރިކަން ފޯރުކޮށްދެއްވުމަކީ އިންސާނީ ޙައްޤެއް ކަމަށާއި މިފަދަ ހަރުދަނާ ނިޒާމެއް ކޮންމެ ޤައުމެއްގައިވެސް ޤާއިމުކުރެވިފައި އޮންނަންޖެހޭނެކަމަށެވެ.
ޤާނޫނީ އެހީތެރިކަން ފޯރުކޮދިނުމާބެހޭ ޤައުމީ މަހާސިންތާގައި ޤާނޫނީ ދާއިރާގައި ތަޖުރިބާކާރު ބޭބޭފުޅުން ވަނީ ބައިވެރިވެވަޑައިގެންފައެވެ. އަދި ޤާނޫނީ އެހީތެރިކަން ފޯރުކޮށްދެއްވުމުގައި ހަރަކާތްތެރިވާ އެކި މުއައްސަސާތަކުންވެސް މި މަހާސިންތާގައި ބައިވެރިވެވަޑައިގެންފައިވެއެވެ.