އިންޑިޔާއާއި ޕާކިސްތާނާ ދެމެެދު ބަދަލުކުރަމުންދިޔަ ޙަމަލާތައް ހުއްޓާލުމުން ރާއްޖެއިން މަރުޙަބާ ކިޔައިފި

އިންޑިޔާއާއި ޕާކިސްތާނާ ދެމެެދު ބަދަލުކުރަމުންދިޔަ ޙަމަލާތައް ހުއްޓާލުމަށް ނިންމުމާއި ގުޅިގެން ރާއްޖެއިން އެކަމަށް މަރުޙަބާ ކިޔައިފިއެވެ.

ސޯޝަލް މީޑިޔާގައި ޙިއްސާކުރެއްވި ޕޯސްޓެއްގައި ޚާރިޖީ ވަޒީރު ޑރ. ޢަބްދުﷲ ޚަލީލް ވަނީ ޕާކިސްތާނާއި އިންޑިޔާއިން އަމާންކަން ޚިޔާރުކޮށް މައްސަލަ ހައްލުކުރަން ނިންމުމުން ތަޢުރީފުކުރައްވާފައެވެ. އަދި މިއީ ސަރަހައްދީ ހަމަޖެހުމަށް އެޅުނު މުހިންމު ފިޔަވަޅެއްކަމަށް ޚާރިޖީ ވަޒީރު ވިދާޅުވިއެވެ.

ޚާރިޖީ ވަޒީރު ވަނީ ޙަމަލާ ބަދަލުކުރުން ހުއްޓާލުމާ ގުޅިގެން ދެ ޤައުމަށްވެސް މަރުޙަބާ ވިދާޅުވެފައެވެ.

I welcome the announcement of an immediate ceasefire between #India and #Pakistan. We commend the leadership of both countries for choosing the path of peace & dialogue, and for taking steps towards regional stability.

— Abdulla Khaleel (@abkhaleel) May 10, 2025

އިންޑިއާ އާއި ޕާކިސްތާނުން ހަމަލާ ބަދަލުކުރުން ހުއްޓާލަން އެއްބަސްވިކަން ހާމަކުރެއްވީ އެމެރިކާގެ ރައީސް ޑޮނަލްޑް ޓްރަމްޕްއެވެ.

ދެކުނު އޭޝިޔާ ސަރަޙައްދުގެ މައި ދެ ބާރުގެ ގޮތުގައި ބެލެވޭ އިންޑިޔާއާއި ޕާކިސްތާނާ ދެމެދު ބަދަލު ކުރަމުންދާ ޙަމަލާތައް ހުއްޓުމަކަށް ގެނައުމަށް ދުނިޔޭގެ ބާރުތަކުން ދިޔައީ މަސައްކަތް ކުރަމުންނެވެ. ޙަމަލާ ބަދަލު ކުރުން މެދުކަނޑައިލައި، މަޝްވަރާއާއި ސުލްޙަ އިސް ކުރުމަށް ބާރު އަޅަމުންދިޔައީ އެމެރިކާއާއި ޗައިނާ ފަދަ ޤައުމުތަކުންނެވެ.