އިޓަލީގެ ސެރިއާގައި ރޭ ލެއްޗެ އާއި ދެކޮޅަށް ކުޅުނު މެޗުން 1-0 ގެ ނަތީޖާއަކުން މޮޅުވެ ތާވަލުގެ ކުރީގައި ތިން ޕޮއިންޓުގެ ލީޑެއް ނާޕޮލީން ނަގައިފި އެވެ.
މި މެޗުން ނާޕޮލީ މޮޅުވުމާއިއެކު އެ ޓީމަށް ވަނީ 35 މެޗުން 77 ޕޮއިންޓާއެކު ތާވަލުގެ އެއްވަނަ މަގާމް ލިބިފަ އެވެ. ދެވަނައިގައި އޮތް އިންޓަރ މިލާނަށް ލިބިފައިވަނީ 74 ޕޮއިންޓެވެ. އަދި މި މެޗުން ބަލިވި ލެއްޗެ އަށް ލިބިފައިވާ 27 ޕޮއިންޓާއެކު އެ ޓީމު އޮތީ ތާވަލުގެ 17 ވަނައިގައި ރެލިގޭޝަނުގެ ޒޯނުގަ އެވެ.
ރަށުން ބޭރުގައި ނާޕޮލީ ކުޅުނު މި މެޗުގައި ފެނިގެންދިޔަ ހަމައެކަނި ލަނޑު މެޗުގެ 24 ވަނަ މިނިޓުގައި އެ ޓީމަށް ކާމިޔާބުކޮށްދީފައިވަނީ ޖިއާކޯމޯ ރަސްޕަޑޯރީ އެވެ.
އެންޓޯނިއޯ ކޮންޓޭގެ އިރުޝާދުގެ ދަށުން ކުޅެމުންދާ ނާޕޮލީ އިން މި މެޗުގައި ރަގަޅު ކުޅުމެއް ދައްކާފައިވާއިރު މެޗުގެ ކުރީކޮޅު ފޯވަޑް ރޮމެލޯ ލުކަކޫ ލަނޑެއް ޖެހިނަމަވެސް ރެފްރީ ވަނީ އެ ނިންމުން ބަދަލުކޮށްފަ އެވެ.
އަދި މެޗުގެ ފުރަތަމަ ހާފުގެ ފަހު ވަގުތުގައި ނާޕޮލީގެ ޑިފެންޑަރ ކިއަލޮންޑާ ބޮލުން ފޮނުވާލި ހަމަލާ ލެއްޗެގެ ގޯލުގެ ހުރަސް ދަނޑީގައި ޖެހިފައިވަނީ ބޭރުވެފަ އެވެ.
ދެވަނަ ހާފުގައިވެސް ލަނޑު ޖަހަން ރަގަޅު ފުރުސަތުތަކެއް ނާޕޮލީއަށް ލިބިފައިވީ ނަމަވެސް އެ ފުރުސަތުތަކުގެ ބޭނުން އެންމެ އެދެވޭ ގޮތުގައި ހިފޭ ގޮތް ވަނީ ނުވެފަ އެވެ.
ސެރިއާގައި ރޭ ވާދަވެރި އިންޓަރ މިލާން ވެރޯނާ އާއި ދެކޮޅަށް ކުޅުނު މެޗު 1-0 ގެ ނަތީޖާއަކުން އިންޓަރ މިލާން ވަނީ ކާމިޔާބުކޮށް ލީގު ހޯދުމުގެ ފުރުސަތު ބޮޑުކޮށްފަ އެވެ.
ލީގުގައި ބާކީ ތިން މެޗު ކުޅެން އޮތްއިރު ކުރިއަށް އޮތް ތިން މެޗުން މޮޅުވި ނަމަވެސް އެންމެ ފަހުގެ ޗެމްޕިއަން އިންޓަރ މިލާނަށް މި އަހަރު ލީގު ޗެމްޕިއަންކަން ލިބޭނީ އެއްވަނައިގައި އޮތް ނާޕޮލީއަށް ޕޮއިންޓުތަކެއް ގެއްލިގެންނެވެ.