23 އަހަރުން ދަށުގެ ގައުމީ ފިރިހެން ވޮލީބޯޅަ ޓީމަށް ކުޅުންތެރިން ހޮވުމަށްޓަކައި ފަށާ ޓްރައިއައުޓް މި މަހުގެ 17 ވަނަ ދުވަހު ފަށަން ހަމަޖެހިއްޖެއެވެ. މިކަމާ ގުޅޭގޮތުން "ޕީއެސްއެމް ނިއުސް" އަށް މައުލޫމާތުދެއްވަމުން ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) ގެ ރައީސް މުޙައްމަދު ލަތީފް ވިދާޅުވީ މިއީ އެންމެންނަށްވެސް ބައިވެރިވެވޭނެހެން ހުޅުވާލައިގެން ކުރިއަށްގެންދާ ހަރަކާތެއް ކަމަށާއި، ވޮލީ ކުޅުމަށް ޝައުގުވެރިކަން ހުރި 23 އަހަރުން ދަށުގެ ކޮންމެ ފިރިހެން ކުޅުންތެރިއަކަށްވެސް މި ފުރުސަތު ހުޅުވިފައިވާ ކަމަށެވެ.
ގައުމީ ޓީމަށް ކުޅުންތެރިން ހޮވުމަށްޓަކައި ކުރިއަށްގެންދާ މި ޓްރައިއައުޓުތައް ކުރިއަށްދާނީ މި މަހުގެ 17 އިން 29 ގެ ނިޔަލަށް ކޮންމެ ދުވަހެއްގެ މެންދުރުފަހު 1:45 އިން ހަވީރު 4:00 އާ ހަމައަށް ޒުވާނުންގެ މަރުކަޒުގެ އެތެރޭ ކޯޓުގައި ކަމަށް ވީއޭއެމްގެ ރައީސް ވިދާޅުވިއެވެ. ވޮލީބޯޅަ ރާއްޖޭގައި އިތުރަށް ތަރައްގީކޮށް، މި ކުޅިވަރުން އައު އުސްމިންތަކަކަށް ވާސިލުވުމަށް ވީއޭއެމްއިން އަމާޒު ހިފާފާވާއިރު، މިހާރު ކުރާ އެންމެ ބޮޑު އުންމީދަކީ ވޮލީން ރާއްޖެއަށް މެޑެއްޔެއް ހޯދަދިނުން ކަމަށް ލަތީފް ވިދާޅުވިއެވެ.
"ގައުމީ ޓިމަށް ކުޅުންތެރިން ހޮވުމަށްޓަކައި މިފަށާ ދަތުރަކީ 2027 ވަނަ އަހަރުގެ އިންޑިއަން އޯޝަން އައިލަންޑް ގޭމްސްއިން މެޑަލެއް ރާއްޖެއަށް ކަށަވަރުކުރުމަށް ހިފާފައިވާ އަމާޒަށް ވާސިލުވުމަށް އަޅަމުންދާ ފިޔަވަޅުތަކުގެ ތެރެއިން މުހިންމު ފިޔަވަޅެއް" ލަތީފް ވިދާޅުވިއެވެ.
23 އަހަރުން ދަށުގެ ގައުމީ ޓީމު އެކުލަވާލުމުގެ މަސައްކަތް ފެށުން ގާތްވެފައިވާއިރު، ކުރިއަށް އޮތް ދުވަސްތަކުގައި އެކި އުމުރުފުރާތަކުން ގައުމީ ޓީމަށް ކުޅުންތެރިން ހޯދުމުގެ މަސައްކަތް ފެށޭނެ ކަމަށްވެސް ލަތީފް ފާހަގަކުރެއްވިއެވެ. އެގޮތުން 12 އަހަރުންދަށާއި، 14 އަހަރުން ދަށާއި، 16 އަހަރުން ދަށުގެ އިތުރުން، 19 އަހަރުން ދަށާއި 23 އަހަރުން ދަށުގެ ދެ ޖިންސުގެ ޓީމުތައް، އެކުލަވާލުމުގެ މަސައްކަތް ކައިރި މުސްތަގްބަލެއްގައި ފެށިގެން ކުރިއަށްދާނެކަމަށް ލަތީފް ވިދާޅުވިއެވެ.
23 އަހަރު ދަށުގެ ގައުމީ ފިރިހެން ވޮލީބޯޅަ ޓީމު އެކުލަވާލުމާ ދާދި ގާތްވެފައިވާއިރު، މި ޓީމަށް އިރުޝާދު ދިނުމަށް މިހާރުވަނީ ބިދޭސީ ކޯޗަކުވެސް އައްޔަނުކޮށްފައެވެ. އީރާނަށް ނިސްބަތްވާ އެފްއައިވީބީ ސެޓިފައިޑް ކޯޗު އަލީ ޕޯރް މިމަހުގެ 15 ވަނަ ދުވަހު ގައުމީ ޓީމާ ރަސްމީކޮށް ހަވާލުވުމަށް ހަމަޖެހިފައިވާއިރު، މިއީ ވޮލީބޯޅައިގައި ދިގު ތާރީޚެއް އޮތް، ތަފާތު ގިނަ ކާމިޔާބީތަކެއް މިކުޅިވަރުން ހޯދާފައިވާ ކޯޗެކެވެ. ކޯޗުގެ އިރުޝާދުގެ ދަށުން ސީނިއާ އަންހެން ވޮލީބޯޅަ ޓީމާއި، 23 އަހަރުންދަށުގެ ފިރިހެން ވޮލީބޯޅަ ޓީމު ތަމްރީނުތައް ހެދުމަށް ހަމަޖެހިފައިވާކަމަށް ޕީއެސްއެމް ސްޕޯޓްސްއަށް މައުލޫމާތުދެއްވަމުން ލަތީފް ވަނީ ވިދާޅުވެފައެވެ.