ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން 23 އަހަރުން ދަށުގެ ފިރިހެން ގައުމީ ޓީމު އެކުލަވާލުމަށް އީރާނުގެ ކޯޗެއް ގެންނަން ނިންމައިފިއެވެ. "ޕީއެސްއެމް ނިއުސް" އަށް މައުލޫމާތުދެއްވަމުން ވީއޭއެމްގެ ރައީސް މުޙައްމަދު ލަތީފް ވިދާޅުވީ 23 އަހަރުން ދަށުގެ ޓީމެއް ތައްޔާރުކުރުމަށްޓަކައި ހަމަޖައްސާފައިވާ ކޯޗު ރާއްޖެ އަންނާނީ މި މަހުގެ 15 ގައި ކަމަށެވެ.
23 އަހަރު ދަށުގެ ޓީމު އެކުލަވާލުމަށް ގެންނަނީ ދުނިޔޭގެ ވޮލީބޯޅައިގެ މައި އިދާރާ އެފްއައިވީބީ ކޯޗު އަލީ ޕޯރްއެވެ. އޭނާގެ އިރުޝާދުގެ ދަށުން 23 އަހަރުން ދަށުގެ ޓީމެއް ތައްޔާރުކުރުމަށް ވީއޭއެމް އިން މަސައްކަތް ފަށާނީ 17 އޭޕްރީލްގައެވެ.
އެގޮތުން 17 ން 19 އޭޕްރީލްއަށް ޒުވާނުންގެ މަރުކަޒުގެ އެތެރޭ ހޯލުގައި ކޮންމެ ދުވަހަކުވެސް މެންދުރު 1:45 ގައި ޓްރައި އައުޓްތަކެއް ބާއްވާނެއެވެ.
އަލީ ޕޯރްއަކީ ވޮލީ ބޯޅައިގެ ބައިނަލްއަގްވާމީ ކާމިޔާބީތައް ހޯދާފައިވާ ދުވަސްވީ ތަޖްރިބާކާރެކެވެ. އަލީ ޕޯރްގެ އިރުޝާދުގެ ދަށުން 23 އަހަރުން ދަށުގެ ގައުމީ ފިރިހެން ވޯލީ ޓީމު އެކުލަވާލުމަށް މަސައްކަތް ފެށުމުގެ ތައްޔާރީތައް ވަމުން އަންނައިރު މިއަހަރު ހާއްސަ އިސްކަމެއް ދީގެން ދިވެހިރާއްޖޭގެ ގައުމީ ސްކޮޑްތަކެއް އެކުލަވާލާނެ ކަމަށް ވީއޭމްއެމްގެ ރައީސް ވިދާޅުވިއެވެ.
އެގޮތުން 12 ދަށް، 14 އަހަރުން ދަށް، 16 އަހަރުން ދަށް އަދި 19 އަހަރުން ދަށާއި 23 އަހަރުން ދަށުގެ އަންހެން އަދި ފިރިހެން ގައުމީ ސްކޮޑް ކަނޑައަޅާނެއެވެ.
ރާއްޖޭގައި ވޮލީބޯޅަ ކުރިއަރުވާ ގައުމީ ޓީމުތަކުގެ ފެންވަރު މަތިކުރުމަށް ކުރިޔަށް އޮތްތަނުގައި ބޮޑެތި ހޭދަތަކެއް ކުރުމަށް ވީއޭއެމް އިން ވަނީ ނިންމާފައެވެ. އޭގެތެރޭގައި ޔޫތު ޑިވެލޮޕްމެންޓް ޕްރޮގްރާމް ފެށުން ހިމެނެއެވެ.
ވީއޭއެމްގެ ރައީސް ވިދާޅުވީ ޔޫތް ޑިވެލޮޕްމެންޓް ޕްރޮގްރާމް ކުރިޔަށް ގެންދިއުމުގައި އެސޯސިއޭޝަނުގެ ފުރިހަމަ މެންބަރުންނާއި އާންމުން މެންބަރުންގެ ބައިވެރިވުން ބޭނުންވާކަމަށެވެ.