ސްޕެނިޝް ކަޕުގެ ސެމީ ފައިނަލް ދެވަނަ ލެގުގައި ރޭ އެތުލެޓިކޯ މެޑްރިޑާ ދެކޮޅަށް ކުޅުނު މެޗު 1-0 ގެ ނަތީޖާއަކުން ކާމިޔާބުކޮށް، މުބާރާތުގެ ފައިނަލުގެ ޖާގައެއް ބާސެލޯނާއިން ހޯދައިފިއެވެ.
ސެމީ ފައިނަލުގެ ދެވަނަ ލެގުގައި އެތްލެޓިކޯ މެޑްރިޑްގެ ރިޔާދު އެއަރ މެޓްރޮޕޮލިޓާނޯ ސްޓޭޑިއަމްގައި ރޭ ކުޅުނު މެޗަށް ދެ ޓީމު ނިކުތްއިރު މި ދެ ޓީމު ފުރަތަމަ ލެގުގައި ކުޅުނު މެޗު ނިމިފައިވަނީ 4-4 ގެ ނަތީޖާއަކުން ދެ ޓީމު އެއްވަރުވެގެންނެވެ. އެހެންކަމުން ބާސެލޯނާއިން މި މުބާރާތުގެ ފައިނަލުގެ ޖާގައެއް ހޯދާފައިވަނީ ޖުމްލަ 5-4 ގެ އެގްރިގޭޓް ނަތީޖާއަކުންނެވެ.
މި މެޗުގައި ފެނިގެންދިޔަ ހަމައެކަނި ލަނޑު މެޗުގެ 27 ވަނަ މިނިޓުގައި ލަމީން ޔަމާލް ދިން ޕާހަކުން ބާސެލޯނާއަށް ކާމިޔާބު ކޮށްދީފައިވަނީ ފެރާން ޓޮރޭސް އެވެ. މި މެޗުގައި ލަމީން ޔަމާލްގެ ފަރާތުން ވަނީ މޮޅު ކުޅުމެއް ފެނިގެންގޮސްފަ އެވެ.
ފުރަތަމަ ލެގުގައި މި ދެ ޓީމު ކުޅުނު މެޗާއި އަޅާބަލާއިރު ދެ ޓީމުގެ ފަރާތުންވެސް މިމެޗުގައި ޑިފެންސަށް ވިސްނައިގެން ކުޅެފައިވާކަން ފާހަގަ ކުރެވެ އެވެ.
އެތްލެޓިކޯ މެޑްރިޑަށް މި މެޗުގައި ލަނޑު ޖަހަން ރަގަޅު ފުރުސަތުތަކެއް ލިބިފައިވީ ނަމަވެސް އެ ޓީމަށްވަނީ އެ ފުރުސަތުތަކުގެ ބޭނުން އެންމެ އެދެވޭ ގޮތުގައި ހިފޭ ގޮތް ނުވެފަ އެވެ. އެގޮތުން އެތްލެޓިކޯގެ އެލެކްޒެންޑަރ ސޯލޮތް އަށް ރަގަޅު ފުރުސަތުތަކެއް ލިބިފައިވާއިރު އޭނާ ފޮނުވާލި އެއް ހަމަލާ ގޯލުގެ ތެރެއަށް ވަދެފައިވީ ނަމަވެސް ރެފްރީ ވަނީ އޮފްސައިޑް ލަނޑެއް ކަމަށް ނިންމާފަ އެވެ.
ބާސެލޯނާއިން މި މުބާރާތުގެ ފައިނަލުގެ ޖާގައެއް ހޯދާފައިވާއިރު ފައިނަލުގައި އެ ޓީމާއި ދެކޮޅަށް ނިކުންނާނީ ވާދަވެރި ރެއާލް މެޑްރިޑް އެވެ. މިއީ މި ދެ ޓީމު މި މުބާރާތުގެ ފައިނަލުގައި ބައްދަލުކުރާ އަށްވަނަ ފަހަރެވެ. މި މެޗު އޮންނާނީ އެޕްރިލް މަހުގެ 26 ވަނަ ދުވަހު އެވެ.
މި މެޗުން ބާސެލޯނާ މޮޅުވުމާއިއެކު އެ ޓީމުން ވަނީ ބަލިނުވެ ދަމަހައްޓަމުން އަންނަ ރެކޯޑް 25 މެޗަށް އިތުރުކޮށްފަ އެވެ. އަދި ޔޫރަޕްގެ ނަން މަޝްހޫރު އެންމެ ވަރުގަދަ ފަސް ލީގުގެ ތެރެއިން 2025 ވަނަ އަހަރު ބަލިނުވެ އޮތް ހަމައެކަނި ޓީމަކީ ބާސެލޯނާ އެވެ.
މި މުބާރާތުގެ ފައިނަލުގެ ޖާގައެއް ބާސެލޯނާއިން ހޯދާފައިވާއިރު އެ ޓީމުން ވަނީ މި ސީޒަނުގައި ސްޕެނިޝް ސުޕަރ ކަޕް ކާމިޔާބުކޮށްފަ އެވެ. އަދި ލަލީގާގެ އެއްވަނަ މަގާމުގައި މިވަގުތު އެ ޓީމު އޮތްއިރު ޗެމްޕިއަންސް ލީގުގެ ކުއާޓަރ ފައިނަލުގެ ޖާގައެއް ވަނީ ހޯދާފަ އެވެ.