ޕާކިސްތާނުގެ ހުޅަނގުދެކުނު ބަލޫޗިސްތާން ޕުރޮވިންސުގައި ދަތުރު ކުރަމުން ދިޔަ ރޭލަކަށް ހަތިޔާރު އެޅި ޖަމާޢަތަކުން ޙަމަލާދީ، އޭގައި ދަތުރު ކުރަމުން ދިޔަ ގިނަ އަދަދެއްގެ ފަސިންޖަރުން ރަހީނު ކޮށްފިއެވެ. އެ ޙަމަލާ ދީފައި ވަނީ ބަލޫޗިސްތާންގެ ވެރިރަށް ކުއޭޓާގައި ރޭލު ދަތުރު ކުރަމުން ދަނިކޮށެވެ. މި ޙަމަލާގެ ފަހަތުގައި ތިބީ ބަލޫޗިސްތާންގެ ރައްޔިތުންގެ ޙައްޤުތައް ޙިމާޔަތް ކުރުމުގެ ނަމުގައި ހަނގުރާމަ ކުރަމުންދާ ހަތިޔާރު އެޅި ޖަމާޢަތް، ބަލޯޖް ލިބެރޭޝަން އާމީ (ބީއެލްއޭ)އެވެ.
ބީއެލްއޭގެ ހަނގުރާމަވެރިންގެ އަތްދަށުގައި ތިބި ޖުމުލަ ފަސިންޖަރުންގެ އަދަދު ސާފެއް ނޫނެވެ. ނަމަވެސް، އެ މީހުން ސަލާމަތް ކުރުމަށް ޕާކިސްތާނުގެ އަސްކަރިއްޔާއާއި ސިފައިން ގުޅިގެން ދަނީ ޚާއްޞަ އޮޕަރޭޝަނެއް ހިންގަމުންނެވެ. ބީއެލްއޭން ބުނީ، އެ ޖަމާޢަތުގެ ބެލުމުގެ ދަށުގައި 214 އަސީރުން ތިބި ކަމުގައެވެ. ނަމަވެސް، މި އަދަދު ކަށަވަރު ކުރެވިފައެއް ނެތެވެ.
ކުއޭޓާގެ ފުލުހުންގެ އިސް އޮފިޝަލެއް ކަމުގައިވާ ރާނާ ދިލާވަރް ވިދާޅުވީ، ބިއެލްއޭގެ އަތްދަށުގައި ތިބި ގިނަ އަދަދެއްގެ ރަހީނުން އަދިވެސް ތިބީ ރޭލުގެ ކާރުތަކުގެ ތެރޭގައި ކަމުގައެވެ. އަދި، އެ މީހުން ސަލާމަތްކޮށް، މިނިވަން ކުރުމަށް އަސްކަރިއްޔާގެ ޚާއްޞަ ފައުޖުން މަސައްކަތް ކުރަމުންދާ ކަމުގައެވެ. ރޭލަށް ދިން ޙަމަލާތަކުގައި އޭގައި ތިބި ބައެއް މީހުން މަރުވެފައިވާ ކަމުގައި ވެސް އޭނާ ވިދާޅުވިއެވެ. އޭގެ ތެރޭގައި ރޭލު ދުއްވަން އިން ޑްރައިވަރު ވެސް ހިމެނެއެވެ.
ރަހީނު ކޮށްފައިވާ މީހުން މަރައިލާނެ ކަމުގެ އިންޒާރު ބީއެލްއޭން ވަނީ ދީފައެވެ. އެ ޖަމާޢަތުގެ އަމާޒަކީ، ޕާކިސްތާނުގެ ސަލާމަތީ ބާރުތަކުން ހައްޔަރު ކޮށްފައިވާ އެ ޖަމާޢަތުގެ ބައެއް މެންބަރުން މިނިވަން ކުރުމަށް ޕާކިސްތާނުގެ ސަރުކާރަށް މަޖުބޫރު ކުރުވުމެވެ. މި ގޮތުން، ބީއެލްއޭގެ ސިޔާސީ ކުށްވެރިންނާއި އެކްޓިވިސްޓުން ކުރިއަށް އޮތް 48 ގަޑިއިރުގެ ތެރޭގައި މިނިވަން ނުކޮށްފި ނަމަ، ރޭލުގައި ހިފަހައްޓާއި ތިބި ހުރިހާ ފަސިންޖަރުން މަރައިލާނެ ކަމަށް ބުނެ އެ ޖަމާޢަތުން ވަނީ އިންޒާރު ދީފައެވެ.
ބަލޫޗިސްތާނަކީ ޕާކިސްތާނާއި އަފްޣާނިސްތާން އަދި އީރާން ގުޅޭ ސަރަޙައްދީ ރޮނގު ކައިރީގައި އޮންނަ ޕުރޮވިންސެކެވެ. އެއީ، މިނިވަން ދައުލަތެއްގެ ގޮތުގައި ޤާއިމު ކުރުމަށް ބީއެލްއޭން ބޭނުންވެއެވެ. އެ ޖަމާޢަތުން ބުނީ، ރަހީނު ކޮށްފައި ތިިބި ފަސިންޖަރުންގެ ތެރޭގައި ޕާކިސްތާނުގެ އަސްކަރިއްޔާގެ ގިނަ އަދަދެއްގެ ސިފައިން ވެސް ހިމެނޭ ކަމުގައެވެ. އެއީ، ޗުއްޓީއަށް ދޫކޮށްފައި ތިބި ސިފައިންނެވެ. އޭގެ ތެރެއިން 30 ސިފައިން މަރައިލާފައިވާނެ ކަމުގައި ބީއެލްއޭން ބުންޏެވެ.
ދިލާވަރް ވިދާޅުވީ، 35 ވަަރަކަށް ފަސިންޖަރުން ފަރުބަދަމަތީ ސަރަޙައްދަކަށް ގެންގޮސް ފޮރުވާފައިވާ ކަމުގައެވެ. އަދި، ބާކީ ތިބި ފަސިންޖަރުން ރޭލުގެ ކާރުތަކުގައި ހައްޔަރު ކޮށްފައި ތިބިއިރު، އެ މީހުންގެ އަދަދު 300ށް އަރާ ކަމަށް ބެލެވޭ ކަމުގައި ވެސް އޭނާ ވިދާޅުވިއެވެ. ޕާކިސްތާނުގެ ސަލާމަތީ ބާރުތަކުން ވަނީ 104 ފަސިންޖަރުން މިނިވަން ކޮށްފައެވެ. އޭގެ ތެރެއިން 17 މީހަކަށް ލިބިފައިވާ ޒަޚަމުތަކަށް ފަރުވާ ދިނުމަށް ހަސްފަތާލުގައި ވަނީ އެޑްމިޓު ކޮށްފައެވެ.
ޕާކިސްތާނުގެ ބޮޑުވަޒީރު ޝެހްބާޒް ޝަރީފް ވަނީ މި ހާދިސާ އެންމެ ހަރުކަށި އިބާރާތުން ކުށްވެރި ކުރައްވާފައެވެ. އަދި، ރަހީނު ކޮށްފައިވާ ހުރިހާ އަސީރުން މިނިވަން ކުރުމަށް ޚާއްޞަ އޮޕަރޭޝަނެއް ކުރިއަށް ގެންދާ ކަން ހާމަ ކުރައްވާފައެވެ. ރަހީނު ކޮށްފައިވާ ފަސިންޖަރުންގެ ތެރެއިން 100ށްހާ މީހުން މިނިވަން ކުރެވިފައިވާ ކަން ޕާކިސްތާނުގެ ދާޚިލީ ވަޒީރު މުޙްސިން ނަޤުވީ ވަނީ ކަށަވަރު ކޮށްދެއްވާފައެވެ. ނަމަވެސް، ބީއެލްއޭން ބުނީ، އެއީ އެ ޖަމާޢަތުން މިނިވަން ކޮށްފައިވާ އަންހެނުންނާއި، ކުޑަކުދިންނާ، އުމޫރުންގެ އިތުރުން ބަލޯޖްގެ ރައްޔިތުންނެވެ.
ރޭލުގައި ތިބި ފަސިންޖަރުން ރަހީނު ކުރި ހާދިސާއާ ގުޅިގެން ބަލޫޗިސްތާނުގެ ސަރުކާރުން ވަނީ އެ ސަރަޙައްދުގައި ކުއްލިޙާލަތު އިޢުލާނުކޮށް، ޚާއްޞަ ފިޔަވަޅުތަކެއް އަޅަން ފަށާފައެވެ. ބީއެލްއޭއަކީ އެ ސަރަޙައްދުގައި ހަރަކާތްތެރިވާ ހަތިޔާރު އެޅި ޖަމާޢަތްތަކުގެ ތެރެެއިން އެންމެ ބޮޑު ޖަމާޢަތެވެ. ބަލޫޗިސްތާނަކީ ގޭހާއި ޤުރުދަރީ މައުދަނުގެ މުއްސަނދި ކަން ލިބިފައިވާ ސަރަޙައްދަކަށްވާއިރު، އެއިން ލިބޭ ނަފާގެ ޙައްޤު، އެ ސަރަޙައްދުގެ ޢާންމު ރައްޔިތުންނަށް ލިބެމުން ނުދާ ކަމުގައި ބީއެލްއޭން ތުހުމަތު ކުރެއެވެ.