މިއަހަރުގެ ތެރޭގައި ރާއްޖޭގެ އެކި ރަށްރަަށަށް 4809 ޓަނުގެ ފެން ފޯރުކޮށްދެވިފައިވާކަމަށް ޑިޒާސްޓަރ މެނޭޖްމެންޓުން ވިދާޅުވެއްޖެއެވެ. މިގޮތުން 88 ރަށެއް ފެނަށް ޖެހިގެން ފެން ފޯރުކޮށްދެވިފައިވާކަމަށް ނެޝަނަލް ޑިޒާސްޓަރ މެނޭޖްމަންޓް ސެންޓަރުން ހާމަކުރައްވައެވެ.
ޑިޒާސްޓަރ މެނޭޖްމެންޓު ސެންޓަރ ހިންގެވުމާއި ހަވާލުވެ ހުންނެވި ފާޠިމަތު ތަސްނީމް ވިދާޅުވީ މިއަހަރުގެ ތެރޭގައިވެސް ރަށްރަށަށް ފެން ފޯރުކޮށްދިނުމަށް މިހާތަނަށް 10 މިލިޔަން ރުފިޔާ ޚަރަދުވެފައިވާކަމަށެވެ. އަދި ތަކުރާރުކޮށް މިއަހަރު 14 ރަށަކަށް ފެން ފޯރުކޮށްދެއްވާފައިވާކަމަށް ވެސް ތަސްނީމް ވިދާޅުވިއެވެ. ތަސްނީމް ވިދާޅުވީ ގާތްގަޑަކަށް ކޮންމެ އަހަރަކުވެސް ފެން ފޯރުކޮށްދޭން ޖެހެނީ ހަމަ އެއްރަށްތަކަކަށް ކަމަށާއި އެއީ ފެނުގެ ނިޒާމް އަދި ގާއިމްކުރެވިފައިވާނުވާ ރަށްތައްކަމަށް ތަސްނީމް ފާހަގަކުރެއްވިއެވެ.
ބޯފެން ސަޕްލައި ކުރުމަކީ ވަރަށް ބޮޑު ޚަރަދެއް ހިނގާކަމެއްކަމަށާއި، އެއީ އެކަން ކޮށްދޭ ކުންފުނިތައް މަދުކަމުންކަމަށް އެސެންޓަރުން ވިދާޅުވިއެވެ. ފެން ސަޕްލައި ކުރުމުގައި ވަކި ކޮލިޓީއެއް ހިފަހައްޓަން ވަރަށް މަސައްކަތް ކުރައްވާކަމަށް ޑިޒާސްޓަރ މެނޭޖްމެންޓުން ވިދާޅުވެއެވެ. ފެން ގަންނަން މާ ބޮޑު ހޭދައެއް ކުރަން ނުޖެހޭކަމަށާއި ، މާލެއާ، ބައެއް ރަށްރަށުންވެސް ފެންގަންނަކަމަށް ޑިޒާސްޓަރ މެނޭޖްމަންޓުން ފާހަގަކުރައްވައެވެ.
ޑިޒާސްޓަރ މެނޭޖްމަންޓު ސެންޓަރުން ވަނީ މިދިޔަ އަހަރު، 77 ރަށަކަށް ފެން ފޯރުކޮށްދީފައެވެ. އޭގެ ތެރެއިން ގިނައީ އުތުރުގެ ރަށްތައްކަމަށް ޑިޒާސްޓަރ މެނޭޖްމަންޓުން ވިދާޅުވިއެވެ.