ދައުލަތުން ބަލަހައްޓަވަމުން ގެންދަވާ ކުދިންނާއެކު، މިނިސްޓަރ އޮފް ޖެންޑަރ އެންޑް ފެމިލީ، ޒެނީޝާ ޝަހީދު ޒަކީ، މިއަހަރުގެ ފިތުރު ޢީދު ދުވަސް ފާހަގަކުރައްވައިފިއެވެ.
އީދު އުފަލުގައި ބައިވެރިވެލެއްވުމުގެ ގޮތުން ދައުލަތުގެ ބައްލަވަމުން ގެންދަވާ ބައެއް ކުދިންނާއެކު ކުޑަކުދިންގެ ކާރޓޫން ފިލްމެއްގެ ޚާއްސަ ޝޯއެއް ޝްވެކް ސިނަމާގައި ޒެނީޝާ ޝަހީދު ޒަކީ ވަނީ މިއަދު ބައްލަވައިލައްވާފައެވެ.
މިއަދު ހަވީރު އޮތް މި ހަރަކާތުގައި، ފިޔަވަތީގައި ދިރިއުޅެމުންދާ ކުދިންގެ ތެރެއިން ޖުމްލަ 67 ކުދިންނާއި ފިޔަވަތީގައި މަސައްކަތްކުރާ ކުދިން ބަލަހައްޓާ މުވައްޒަފުންގެ އިތުރުން މިނިސްޓްރީގެ ބައެއް މުވައްޒަފުންނާއި އެ މުވައްޒަފުންގެ އާއިލާތަކުން ބައިވެރިވިއެވެ. ފިޔަވަތީގައި ތިބި ކުދިންނަށް ފިލްމް ބެލުމުގެ އިންތިޒާމް ހަމަޖައްސަވައިދެއްވީ ޝްވެކް ސިނަމާއިންނެވެ. އެ ކުދިންގެ ދަތުރުފަތުރުގެ އިންތިޒާމް ހަމަޖައްސަވައިދެއްވި މޯލްޑިވްސް ނެޝަނަލް ޑިފެންސް ފޯސް، ހައުސިންގ ޑިވެލޮޕްމަންޓް ކޯޕަރޭޝަން އަދި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކުންފުނިން ކަމަށް ޖެންޑަރ މިނިސްޓްރީން ވިދާޅުވެއެވެ.
މި އަހަރުގެ ފިތުރު ޢީދުގެ މުނާސަބުގައި، ހުޅުމާލޭގެ ފިޔަވަތި އިތުރުން، ވިލިމާލޭގައި ހުންނަ ކުޑަކުދިންގެ ހިޔާގައި ދިރިއުޅެމުންދާ ކުދިންނަށް އަމާޒުކޮށްގެން ޚާއްސަ ހަރަކާތެއް މާދަމާ ބާއްވަން ރާއްވަވާފައިވާކަމަށްވެސް ޖެންޑަރ މިނިސްޓްރީން ވިދާޅުވެއެވެ.
އެކި ސަބަބުތަކާހުރެ ސަރުކާރުގެ ބެއްލެވުމުގެ ދަށުގައި މިވަގުތު ޖުމްލަ 153 ކުދިން ވިލިމާލޭގައި ހުންނަ ކުޑަކުދިންގެ ހިޔާ އާއި އަމާން ހިޔާ އަދި ހުޅުމާލޭގައި ހުންނަ ފިޔަވަތީގައި ދަނީ ބަލަހައްޓަވަމުންނެވެ.