ނިއުކްލިޔަރ ހަތިޔާރު އުފެއްދުމަށް އީރާނުން ކުރަމުންދާ މަސައްކަތްތަކަށް ހުރަސް އަޅައި، މެދުއިރުމަތީގައި ބާރާއި ނުފޫޒު ގަދަ ކުރަން ކުރަމުންދާ މަސައްކަތްތައް އެމެރިކާއާ ގުޅިގެން ހުއްޓުވާނެ ކަމަށް ބުނެ، ޒަޔަނިސްޓުންގެ ހައްދުފަހަނަ އެޅި ބޮޑުވަޒީރު ބެންޖަމިން ނަތަންޔާހޫ އީރާނަށް އިންޒާރު ދީފިއެވެ. އޭނާ މި މޭރުމުން ވާހަކަ ދައްކާފައި ވަނީ، ޔަހޫދީން ވެރިވެގަނެފައިވާ ފަލަސްޠީނުގެ ޤުދުސަށް ވަޑައިގެން އުޅުއްވާ އެމެރިކާގެ ޚާރިޖީ ވަޒީރު މާކޯ ރޫބިޔޯއާ އެކު ބޭއްވި ބައްދަލުވުމަކަށް ފަހުއެވެ.
އެމެރިކާއަކީ ޔަހޫދީންގެ އެންމެ ބޮޑު މަދަދުގާރެވެ. އަދި، މެދުއިރުމަތީގެ ޤައުމުތަކުގެ މުސްލިމުންނާ ދެކޮޅަށް ޔަހޫދީން ހިންގަމުންދާ ލާއިންސާނީ ޖަރީމާތަކުގެ އެންމެ ބޮޑު ބައިވެރިޔާއެވެ. އެމެރިކާއާއި އިސްރާއީލުން ޤަބޫލު ކުރާ ގޮތުގައި އީރާނަކީ ޔަހޫދީންގެ ދެމިއޮތުމަށް އޮތް ބޮޑު ހުރަހެކެވެ. އަދި، ނުރައްކަލެކެވެ. ރޫބިޔޯއާ އެކު ބޭއްވި ބައްދަލުވުމުގައި މަޝްވަރާ ކޮށްފައިވާ އެންމެ މުހިންމު ކަމަކީ އީރާނުގެ މައްސަލަ ކަމުގައި އަނިޔާވެރި ނަތަންޔާހޫ ބުންޏެވެ.
ރޫބިޔޯ ވެސް ވަނީ އީރާނަށް ފާޑުވިދާޅުވެ، އިންޒާރު ދެއްވާފައެވެ. "ކޮންމެ ނިރުބަވެރި ޖަމާޢަތެއްގެ ފަހަތުގައި، ކޮންމެ އަނިޔާވެރި ޖަރީމާއެއްގެ ފަހަތުގައި، މަސްރަޙު ނަގައިލަން ހިންގާ ކޮންމެ އަމަލެއްގެ ފަހަތުގައި، އެތަކެއް މިލިޔަން ބަޔެއްގެ ސުލްޙައާއި ހަމަޖެހުމަށް އޮތް ކޮންމެ ހުރަހެއްގެ ފަހަތުގައި އޮތީ އީރާން،" އޭނާ ވިދާޅުވިއެވެ. އޭނާ މި މޭރުމުން ވިދާޅުވި ނަމަވެސް، އެ ފަދަ ހުރިހާ އަމަލެއްގެ ފަހަތުގައި އޮތީ ޔަހޫދީން ކަން މުޅި ދުނިޔެ ވެސް ދެކޭ ކަމުގައި މަސްރަޙު ދިރާސާ ކުރާ ފަރާތްތަކުން ޤަބޫލު ކުރެއެވެ.
ހުޅަނގާއި އީރާނާ ދެމެދު މި ވަގުތު އުފެދިފައި އޮތް އެންމެ ހައްސާސް މައްސަލައަކީ، އީރާނުން ކުރިއަށް ގެންދާ ނިއުކްލިޔަރ ޕުރޮގުރާމެވެ. އެއީ، މަދަނީ ބޭނުންތަކަށް ހަކަތަ އުފެއްދުމަށް ހިންގާ ޕުރޮގުރާމެއް ކަމުގައި އީރާނުން ބުނަމުން ދިޔަ ނަމަވެސް، ޔަހޫދީންނާއި ހުޅަނގުން ޤަބޫލު ކުރާ ގޮތުގައި އީރާނުން މަސައްކަތް ކުރަމުން ދަނީ ނިއުކްލިޔަރ ހަތިޔާރެއް އުފެއްދުމަށެވެ. މިއީ، އީރާނުން ދޮގު ކުރާ ތުހުމަތެކެވެ.
މެދުއިރުމަތީގެ ޤައުމުތަކުގައި ހަރަކާތްތެރިވާ މުޖާހިދުންގެ ޖަމާޢަތްތަކާއި ހަތިޔާރު އެޅި ޖަމާޢަތްތަކަށް އީރާނުން ދަނީ އެހީތެރިކަން ފޯރުކޮށްދެމުންނެވެ. 'އެކްސިސް އޮފް ރެސިސްޓެންސް'ގެ ނަމުގައި ހަރަކާތްތެރިވަމުންދާ ޖަމާޢަތްތަކުގެ ތެރޭގައި ފަލަސްޠީނުގެ މިނިވަން ކަމަށް ޖިހާދު ކުރާ ޙަމާސް ޖަމާޢަތާއި، ލުބްނާންގެ މުޖާހިދުންގެ ޖަމާޢަތް ޙިޒްބުاللهގެ އިތުރުން ޔަމަންގެ ޙޫޘީ ޖަމާޢަތް ހިމެނެއެވެ.
މީގެ އިތުރުން، ސޫރިޔާއާއި ޢިރާޤުގައި ހަރަކާތްތެރިވާ ބައެއް ހަތިޔާރު އެޅި ޖަމާޢަތްތަކަށް ވެސް އީރާނުން ދަނީ ވާގިވެރިވަމުންނެވެ. މިއީ، އެމެރިކާއާއި ޔަހޫދީންގެ އިތުރުން ހުޅަނގުގެ ބާރުތަކަށް ހަޖަމު ކުރެވޭ ގުޅުމެއް ނޫނެވެ. އެ ޖަމާޢަތްތަކަށް އީރާނުން ހަތިޔާރު ފޯރުކޮށްދެމުންދާ ކަމަށާއި، އެ ޖަމާޢަތްތަކުގެ އަމަލުތައް ބައްޓަންކޮށް ރާވަނީ އީރާނުން ކަމަށް ބުނެ ހުޅަނގުން ކުރާ ތުހުމަތުތަކަށް އެ ޤައުމު އިންކާރު ކުރެއެވެ.
ރޫބިޔޯ ޤުދުސަށް ދަތުރުފުޅެއް ކުރައްވާފައި މި ވަނީ، ފަލަސްޠީނުގެ ޣައްޒާގެ މުސްލިމުންގެ ނަސްލުހޭދު ކުރުމަށް ޔަހޫދީ ފައުޖުން ހިންގަމުން ދިޔަ ޤަތުލުޢާންމު މެދުކަނޑައިލާފައިވާ ދަނޑިވަޅެއްގައެވެ. އެ ޤަތުލުޢާންމު ހިންގާފައި ވަނީ އެމެރިކާގެ އެހީތެރިކަމާ އެކު، އެމެރިކާއިން ފޯރުކޮށްދެމުންދާ ނުރައްކާތެރި އަދި ފަނާކުރަނިވި ހަތިޔާރުތައް ބޭނުން ކޮށްގެންނެވެ. އެ ޢުދުވާނުގައި ޝަހީދު ކޮށްލާފައިވާ މީހުންގެ އަދަދު 61,700ށް އުފުލިފައިވާއިރު، ޒަޚަމު ކޮށްލާފައިވާ މީހުންގެ އަދަދު 111,000ށް އަރައެވެ.
ޖަނަވަރީ 20ވަނަ ދުވަހު އެމެރިކާގެ ރައީސް ކަމުގެ މަޤާމާ ޙަވާލުވެ ވަޑައިގެންނެވި ޑޮނަލްޑް ޓްރަމްޕަކީ ޔަހޫދީންގެ އެންމެ ބޮޑު މަދަދުގާރެވެ. ވެރިކަމާ ޙަވާލުވެ ވަޑައިގެންނެވުމަށް ފަހު، އެމެރިކާއިން ހިފަހައްޓާފައިވާ ޔަހޫދީންގެ ހަތިޔާރުތައް އޭނާ ވަނީ ދޫކުރަން އަމުރު ކުރައްވާފައެވެ. އޭނާގެ އެންގެވުމަށް އެމެރިކާއިން ޔަހޫދީންނަށް އަލުން ފޯރުކޮށްދޭން ފަށާފައިވާ ނުރައްކާތެރި އަދި ފަނާކުރަނިވި ހަތިޔާރުތަކުގެ ތެރޭގައި އެމްކޭ-84 މަރުކާގެ 900 ކިލޯގެ ބޮން ހިމެނެއެވެ.