އިންޑިޔާގެ ސަލާމަތީ ބާރުތަކުން ހިންގި ޚާއްޞަ އޮޕަރޭޝަނެއްގައި، އެ ޤައުމުގައި ހަރަކާތްތެރިވާ މާއޮއިސްޓު ޖަމާޢަތަށް ނިސްބަތްވާ ހަނގުރާމަވެރިންގެ 31 މީހުން މަރައިލައިފިއެވެ. ޗަންތީސްގާ ސްޓޭޓްގެ ޖަންގަލި ބޯ ސަރަޙައްދެއްގައި ސަލާމަތީ ބާރުތަކުން ހިންގި އޮޕަރޭޝަނުގައި އެ ބާރުގެ ދެ މީހުން މަރުވެ، އިތުރު ދެ މީހަކު ޒަޚަމުވިއެވެ. ކުރިމަތިލުންތައް ހިނގާފައި ވަނީ ޗައްތީސްގާގެ އިންދްރާވަތީ ސަރަޙައްދުގައެވެ.
މަާއޮއިސްޓުން، ނުވަތަ ނޮކްޝަލްރާނުންނަކީ ޗައިނާގެ ބާނީގެ ގޮތުގައި ބެލެވޭ ކޮމިޔުނިސްޓު ވެރިޔާ މަާއޮ ޒޭދޮންގގެ ސިޔާސީ އަދި އަސްކަރީ ފިކުރަށް ބޯލަނބާ ހަނގުރާމަވެރި ޖަމާޢަތެކެވެ. އިންޑިޔާގެ އިތުރުން ނޭޕާލާއި ފިލިޕީންސްގެ ބައެއް ސަރަޙައްދުތަކުގައި ހަރަކާތްތެރިވާ މަާއޮއިސްޓުންގެ އަމާޒަކީ، އެ ޤައުމުތަކުގެ އިންތިޚާބީ ސަރުކާރުތައް ވައްޓައިލައި، ކޮމިޔުނިސްޓު ވެރިކަމެއް ޤާއިމު ކުރުމެވެ. އިންޑިޔާގައި މަާއޮއިސްޓުން ހަރަކާތްތެރިވަމުން ދަނީ އެ ޤައުމުގެ މެދުތެރެއާއި އިރުމަތީ ސަރަޙައްދުތަކުގައެވެ. ޗައްތީސްގާއަކީ އިންޑިޔާގެ މެދުތެރޭގައި އޮތް ސްޓޭޓެކެވެ.
އިންދްރާވަތީގައި އިންޑިޔާގެ ސަލާމަތީ ބާރުތަކާއި މަާއޮއިސްޓު ހަނގުރާމަވެރިންނާ ދެމެދު ހިނގާފައިވާ ކުރިމަތިލުންތަކަކީ މި އަހަރުގެ ތެރޭގައި ހިނގާފައިވާ މި ފަދަ އެންމެ ލޭއޮހޮރުވުން ބޮޑު ކުރިމަތިލުންތެކެވެ. އަދި، މިއީ މަާއޮއިސްޓުންނާއި އިންޑިޔާގެ ސިފައިންނާ ދެމެދު މި އަހަރުގެ ތެރޭގައި ނުރައްކާތެރި ކުރިމަތިލުންތަކެއް ހިނގާފައިވާ ދެވަނަ ފަހަރެވެ.
ޗައްތީސްގާގެ ފުލުހުންގެ ވެރިޔާ، އިންސްޕެކްޓަރ ޖެނެރަލް ޕައްޓިލިންގަމް ސުންދަރްރާޖް ވިދާޅުވީ، އިންދްރާވަތީގައި ޚާއްޞަ އޮޕަރޭޝަނެއް ހިންގާފައި ވަނީ، އެ ސަރަޙައްދުގައި މައިއޮސްޓު ހަނގުރާމަވެރިން ހަރަކާތްތެރިވަމުންދާ ކަމުގެ ޖާސޫސީ މަޢުލޫމާތަށް ބަލައި ކަމުގައެވެ. އަދި، އޮޕަރޭޝަނުގައި އެތަކެއް ސަތޭކަ ފުލުހުންނާއި ޕެރެމިލިޓަރީ ސިފައިން ބައިވެރިވި ކަމުގައެވެ.
ކުރިމަތިލުންތަކުގައި މަރައިލާފައިވާ މަާއޮއިސްޓު ހަނގުރާމަވެރިން އަދަދު އިތުރުވާނެ ކަމަށް ބެލެވޭ ކަމުގައި ވެސް ސުންދަރްރާޖް ވިދާޅުވިއެވެ. "އަޅުގަނޑުމެން މި ދަނީ އިތުރު ސިފައިންނާއި ފުލުހުން އެ ސަރަޙައްދަށް ފޮނުވުމުގެ މަސައްކަތް ކުރަމުން،" އޭނާ ވިދާޅުވިއެވެ. ކުރިމަތިލުންތައް ހިނގާފައިވާ ސަރަޙައްދުން މަާއޮއިސްޓު ހަނގުރާމަވެރިން ރައްކާކޮށްފައިވާ ގިނަ އަދަދެއްގެ ހަތިޔާރު ފެނިފައިވާ ކަމުގައި ވެސް ފުލުހުން ހާމަކުރިއެވެ. އޭގެ ތެރޭގައި އޮޓޮމެޓިކް ހަތިޔާރާއި ގްރިނޭޑް ނުވަތަ ބޮން ލޯންޗު ކުރުމަށް ބޭނުން ކުރާ އާލާތްތައް ހިމެނެއެވެ.
"މިއީ، މަާއޮއިސްޓުންގެ ކިބައިން އިންޑިޔާ ސަލާމަތް ކުރުމަށް ކުރަމުންދާ މަސައްކަތުގެ ދަށުން ލިބުނު ވަރަށް ބޮޑު ކާމިޔާބީއެއް،" ދާޚިލީ ވަޒީރު އަމިތު ޝާހް ވިދާޅުވިއެވެ. 2026ވަނަ އަހަރުގެ ކުރިން މާއޮއިސްޓު ހަނގުރާމަވެރިން ބަލިކޮށް، އެ މީހުންގެ ކިބައިން ޤައުމު ސަލާމަތް ކުރާނެ ކަމުގައި އޭނާ ކުރިން ވިދާޅުވެފައިވެއެވެ.
ހުސްވި ޖަނަވަރީ މަހުގެ 23ވަނަ ދުވަހު ވެސް އިންޑިޔާގެ ސަލާމަތީ ބާރުތަކުން ވަނީ ޗައްތީސްގާގެ ގަރީބްބަންދު ސަރަޙައްދުގައި މާއޮއިސްޓުންނާ ދެކޮޅަށް ޚާއްޞަ އޮޕަރޭޝަނެއް ހިންގާފައެވެ. އެ އޮޕަރޭޝަނުގެ ތެރެއިން އެ ޖަމާޢަތަށް ނިސްބަތްވާ 16 މީހުން މަރައިލިއެވެ. މީގެ އިތުރުން، ޖަނަވަރީ 31ވަނަ ދުވަހު ބީޖާޕޫރް ސަރަޙައްދުގައި ހިންގި އޮޕަރޭޝަނެއްގައި މާއޮއިސްޓުންގެ އަށް މީހުން ވަނީ މަރައިލާފައެވެ.
އިންޑިޔާގެ ސަރުކާރުން 'ރެޑް ކޮރިޑޯ'ގެ ނަން ދީފައިވާ ސަރަޙައްދުގައި މި ވަގުތު ދަނީ މާއޮއިސްޓުންނާ ދެކޮޅަށް ބޮޑު އޮޕަރޭޝަނެއް ހިންގަމުންނެވެ. އެ އޮޕަރޭޝަނުގެ ދަށުން ހުސްވި އަހަރު މާއޮއިސްޓު ޖަމާޢަތަށް ނިސްބަތްވާ 287 ހަނގުރާމަވެރިން މަރައިލިއެވެ. އޭގެ ތެރެއިން ގިނަ އަދަދެއްގެ ބަޔަކު މަރައިލާފައި ވަނީ ޗައްތީސްގާގައި ހިންގި އޮޕަރޭޝަންތަކުގައެވެ.
އިންޑިޔާގައި މާއޮއިސްޓު ހަނގުރާމަވެރިން ހަރަކާތްތެރިވާން ފަށާފައި ވަނީ 1967ވަނަ އަހަރުން ފެށިގެންނެވެ. މާއޮއިސްޓުންގެ ޑިމާންޑުތަކުގެ ތެރޭގައި އިންޑިޔާގެ އާބާދީ މަދު އަދި ފަގީރު ދަރިކޮޅުތަކަށް ނިސްބަތްވާ މީހުންނަށް ވަޒީފާގެ ފުރުޞަތުތަކާއި، ބިމާއި، މުދަލާއި ޤުދުރަތީ މުއްސަނދި ކަމުން ނަފާ ލިއްބައިދިނުން ހިމެނެއެވެ. ޗައްތީސްގާއަކީ ޤުދުރަތީ މައުދަނުގެ ގޮތުން އިންޑިޔާގެ އެންމެ މުއްސަނދި އެއް ސްޓޭޓެވެ. ނަމަވެސް، އެއީ އެ ޤައުމުގެ އެހެން ސްޓޭޓްތަކާ އަޅައިބަލާއިރު އެންމެ ފަގީރު އެއް ސްޓޭޓް ވެސް މެއެވެ.