އިނގިރޭސި އެފްއޭ ކަޕްގައި ރޭ ވަރުގަދަ ލިވަޕޫލް އާއި ދެކޮޅަށް ޕްލައިމަތު ކުޅުނު މެޗުން 1-0 ގެ ނަތީޖާއަކުން ލިވަޕޫލް ބަލިވެ މުބާރާތުން ކަޓައިފި އެވެ.
އިނގިރޭސި ޗެމްޕިއަންޝިޕްގެ ފުލުގައި މިވަގުތު އޮތް ޕްލައިމަތުން ޕްރިމިއާ ލީގުގެ އެއްވަނައިގައި އޮތް ލިވަޕޫލް ބަލިކޮށްފައިވާއިރު މިއީ މި އަހަރުގެ އެފްއޭ ކަޕްގައި އަދި މިހާތަނަށް ފެނިގެން ގޮސްފައިވާ އެންމެ ހައިރާންކުރުވަނިވި ނަތީޖާ އެވެ.
މި މެޗަށް ލިވަޕޫލް ނިކުތްއިރު އެ ޓީމުގެ ކޯޗު ސްލޮޓް ވަނީ ކަރަބާއޯ ކަޕްގައި ޓޮޓްނަމް އާއި ދެކޮޅަށް ކުޅުނު މެޗަށް ނިކުތް ޓީމަށް 10 ބަދަލު ގެނެސްފަ އެވެ. ނަމަވެސް ޕްލައިމަތު އިން ވަނީ އޭގެ ފައިދާ ނަގާ މުބާރާތުގެ ފަސްވަނަ ބުރުގެ ޖާގައެއް ހޯދާފަ އެވެ.
ލިވަޕޫލް އިން ރަގަޅު ކުޅުމެއް ދައްކާ އިދިކޮޅު ޓީމުގެ ގޯލަށް ނުރައްކާތެރި ގިނަ ހަމަލަތަކެއް ފޮނުވާލި ނަމަވެސް ޕްލައިމަތުގެ ގޯލުކީޕަރު ކޮނޯ ހަޒާޑު ވަނީ މި މެޗުގައި މޮޅު ކުޅުމެއް ދައްކާ ގިނަ ހަމަލަތަކެއް ދިފާއުކޮށްފަ އެވެ.
މި މެޗުގައި ފެނިގެންދިޔަ ހަމައެކަނި ލަނޑު މެޗުގެ 53 ވަނަ މިނިޓުގައި ޕްލައިމަތު އަށް ލިބުނު ޕެނަލްޓީ އަކުން އެ ޓީމަށް ކާމިޔާބު ކޮށްދީފައިވަނީ ރަޔާން ހާޑީ އެވެ. މި ޕެނަލްޓީ އަކީ ލިވަޕޫލްގެ އޭރިޔާ ތެރެއިން ހާވޭ އެލިއޮޓްގެ އަތުގައި ބޯޅަ ޖެހުމާއި ގުޅިގެން ރެފްރީ ދީފައިވާ ޕެނަލްޓީ އެކެވެ.
ލިވަޕޫލް އިން މެޗުގެ ފަގު ވަގުތު ޓީމަށް ބަދަލުތަކެއް ގެނެސް މެޗުން މޮޅުވާން މަސައްކަތް ކުރިތަން ވަނީ ފެނިގެންގޮސްފަ އެވެ. އެގޮތުން ޕްލައިމަތު އިން ލީޑު ނެގިތާ ގިނައިރުތަކެއް ނުވަނީސް ސްލޮޓް ވަނީ ޑާވިން ނޫނޭޒް ކުޅެން އަރުވާފަ އެވެ. އަދި އެ ބަދަލާއެކު ލިވަޕޫލްގެ ހަމަލަތައް އިތުރަށް ވަރުގަދަވި ނަމަވެސް ޕްލައިމަތުގެ ޑިފެންޑަރުންގެ ފަރާތުންވެސް ވަނީ ތަފާތު މޮޅު ކުޅުމެއް ފެނިގެންގޮސްފަ އެވެ.
ޕްރިމިއާ ލީގުގެ އެއްވަނައިގައި ލިވަޕޫލް މިވަގުތު އޮތްއިރު އެ ޓީމުންވަނީ ކަރަބާއޯ ކަޕްގެ ފައިނަކުގެ ޖާގައެއް ހޯދާފަ އެވެ. އަދި ޔޫއެފާ ޗެމްޕިއަންސް ލީގުގެ ދެވަނަ ބުރުގެ ޖާގައެއް ލިވަޕޫލް އަށް ލިބިފައިވާއިރު ލިވަޕޫލް އާއި ސްލޮޓް ހަވާލުވުމަށްފަހު މިއީ އޭނާއަށް ކުރިމަތިލާން ޖެހުނު އެންމެ ލަދުވެތި ނަތީޖާ އެވެ.
ލިވަޕޫލްގެ މުހިންމު ކުޅުންތެރިން ކަމުގައިވާ މުހައްމަދު ސަލާ އާއި ޑިފެންޑަރ ވެންޑައިކް ފަދަ ކުޅުންތެރިން މި މެޗުގައި ބެންޗުން ވެސް ފެނިގެން ގޮސްފައިނުވާއިރު ސްލޮޓް ވަނީ ޒުވާން ކުޅުންތެރިންނަށް ފުރުސަތު ދީފަ އެވެ.
ޕްރިމިއާ ލީގުގައި އަންނަ ބުދަ ދުވަހު ލިވަޕޫލް ނިކުންނާނީ އެވަޓަން އާއި ދެކޮޅަށެވެ.