ނިމިގެންދިޔަ 2024 ވަނަ އަހަރު ދުނިޔޭގެ ފުޓްބޯޅައިގައި ރެކޯޑް އަދަދެއްގެ ޓްރާންސްފަރ ތަކެއް ހަދާފައިވާ ކަމަށް ދުނިޔޭގެ ފުޓްބޯޅައިގެ މައި އިދާރާ ފީފާ އިން ހާމަކޮށްފި އެވެ.
ފީފާ އިން ހާމަކޮށްފައިވާ ގޮތުގައި ނިމިގެންދިޔަ އަހަރު ފީފާގައި ރަޖިސްޓަރ ކުރެވިގެން ޕްރޮފެޝަނަލް އަދި އެމެޗާ މެޗުތަކަށް ޖުމްލަ 78742 ކްރޮސް ބޯޑަރ ޓްރާންސްފަރ ވަނީ ހަދާފަ އެވެ.
އޭގެ ތެރެއިން ޕްރޮފެޝަނަލް ލީގުތަކުގައި ކުޅޭ ފިރިހެން ކުޅުންތެރިންގެ ބާވީސް ހާސް ހަތް ސަތޭކަ ހަތްދިހަ ނުވަ ޓްރާންސްފަރ ހަދާފައިވާއިރު މި ޓްރާންސްފަރ ތަކުގެ ފީގެ ގޮތުގައި ޖުމްލަ 8.59 ބިލިއަން އެމެރިކާ ޑޮލަރު ވަނީ ހޭދަކޮށްފަ އެވެ. މިއީ ފާއިތުވެދިޔަ ދިގު ތާރީޚުގައި މިހާތަނަށް ކުޅުންތެރިން ގަނެވިއްކުމުގައި ދެވަނަ އަށް އެންމެ ބޮޑު ހޭދައެއް ކޮށްފައިވާ އަހަރެވެ.
މިހާތަނަށް ރެކޯޑް ކުރެވިފައިވާ ގޮތުގައި ކުޅުންތެރިން ގަނެވިއްކުމުގައި މިހާތަނަށް އެންމެ ބޮޑު ހޭދައެއް ކޮށްފައިވަނީ 2023 ވަނަ އަހަރު އެވެ. އެ އަހަރު ވަނީ 9.66 ބިލިއަން އެމެރިކާ ޑޮލަރު ކުޅުންތެރިން ހޯދުމަށް ހޭދަކޮށްފަ އެވެ.
އަންހެން ކުޅުންތެރިން ގަނެވިއްކުމުގައި މިދިޔަ އަހަރު 2284 ޓްރާންސްފަރ ހަދާފައިވާއިރު އެ ކުޅުންތެރިންނަށް 15.6 މިލިއަން އެމެރިކާ ޑޮލަރު ވަނީ ހޭދަކޮށްފަ އެވެ.
2024 ވަނަ އަހަރު ކުޅުންތެރިން ގަނެވިއްކުމުގައި އެންމެ ބޮޑު ހޭދައެއް ކޮށްފައިވަނީ އިނގިރޭސި ޕްރިމިއާ ލީގުގެ ކްލަބްތަކުންނެވެ. އެ ގޮތުން ޕްރިމިއާ ލީގުގެ ކްލަބްތަކުން ކުޅުންތެރިން ހޯދުމަށް 1.88 ބިލިއަން އެމެރިކާ ޑޮލަރު ހޭދަކޮށްފައިވާއިރު ކުޅުންތެރިން ވިއްކައިގެން އިނގިރޭސި ކްލަބްތަކަށް ވަނީ 1.34 ބިލިއަން އެމެރިކާ ޑޮލަރު ލިބިފަ އެވެ.
މިދިޔަ އަހަރު އެންމެ އަގު ބޮޑު ޓްރާންސްފަރ އެއް ހަދާފައިވަނީ ސްޕެއިންގެ އެތްލެޓިކޯ މެޑްރިޑް އިންނެވެ. އެއީ މެންޗެސްޓަރ ސިޓީ އަށް ކުޅެމުންދިޔަ އާޖެންޓީނާގެ ފޯވަޑް ހޫލިއަން އަލްވަރޭޒް ހޯދުމަށް އެކްލަބުން ހޭދަކުރި 95 މިލިއަން ޔޫރޯ އާއިއެކުގަ އެވެ.