އަޑިގުޑަންތަކުން އަރައިގަނެ ލަނޑުދަނޑިތަކަށް ވާޞިލުވުމަށް އެހީތެރިވެދޭ ސެޝަނެއް

ދިރިއުޅުމުގައި ދިމާވާ ކަންކަމުން އަރައިގަނެ ތިމާގެ ލަނޑުދަނޑިތައް ޙާސިލުކުރުމަށް އެހީތެރިވެދޭ ކޯޗިންގ ކޯހެއް ފެށުމަށް ތައްޔާރުވެއްޖެއެވެ.

"ދަ ކޯޗިން"ގެ ފަރާތުން "މޮމެންޓަމް އިން މޯޝަން"ގެ ނަމުގައި ގްރޫޕްތަކަށް އަމާޒުކޮށް ކުރިއަށްގެންދާ މިކޯޗިންގ ސެޝަން ކުރިއަށްގެންދިޔުމަށް ހަމަޖެހިފައިވަނީ ޒޫމް މެދުވެރިކޮށް އޮންލައިންކޮށެވެ.

ދިރިއުޅުމުގައި ދިމާވާ ދަތިކަންކަމުން އަރައިގަނެ ކުރިއަށްދިޔުމަށާއި، އެމީހަކު ކަނޑައަޅާ ލަނޑުދަނޑިތަކަށް ވާޞިލުވުމަކީ ނަފްސާނީގޮތުން މީހާ އެކަމަށް ތައްޔާރުކުރަންޖެހޭކަމެކެވެ. މިކަންކަމަށް ވާޞިލުވުމަށް އެހީތެރިވެދިނުމަށް މީހުން ހޭލުންތެރިކުރުވުމުގެ އެކި ސެޝަންތައް ދަ ކޯޗިންގެ ފަރާތުން ގެންދަނީ އިންތިޒާމުކޮށް ބާއްވަމުންނެވެ.

އާއްމުގޮތެއްގައި ދަ ކޯޗިންގއިން ވިޔަފާރި އުސޫލުން ސެޝަންތައް ބޭއްވި ނަމަވެސް މީހުން ހޭލުންތެރިކުރުމަށްވެސް މިފަދަ ސެޝަންތަކެއް އެކުންފުނިންދަނީ ބާއްވަމުންނެވެ.

ދަ ކޯޗިންގ އިން ބުނީ މި ސެޝަން ކުރިއަށްގެންދިޔުމަށް ހަމަޖެހިފައިވަނީ ފެބްރުއަރީ މަހުގެ 15 ވަނަ ދުވަހުގެ ރޭ 8 އިން 10އަކަށްކަމަށެވެ. މި ސެޝަން ނަންގަވައިދެއްވާނީ އައިސީއެފް ސެޓިފައިޑް ކޯޗެއްކަމުގައިވާ މަރްޔަމް މުޙައްމަދު ކަމަށް ދަ ކޯޗިންގއިން ބުނެއެވެ. އަދި މިސެޝަންގެ ތެރެއިން، ދިރިއުޅުމުގައި ދިމާވާ އެކި ކަންކަމުން އަރައިގަނެ ތިމާގެ ލަނޑުދަނޑިތައް ޙާސިލުކުރުމުގައި އެހީތެރިވުމަށް ބޭނުންވާ ހުނަރުތައް ކިޔައިދެއްވުމަށްވަނީ ހަމަޖެހިފައެވެ.

މި ސެޝަންގައި މީހާގެ ވިސްނުމާއި ފިކުރަށް ހެޔޮ ބަދަލުތަކެއް ގެނައުމުގެ ފުރުސަތު ހުޅުވިގެންދާނެކަމަށާއި، ގްރޫޕްކޮށް ކުރިއަށްގެންދާ މިސެޝަންގައި ބައިވެރިންގެ ފަރާތުންވެސް އައު ކަންކަން ދަސްކުރުމުގެ ފުރުސަތު އޮންނާނެކަމަށް ދަ ކޯޗިންގ އިން ބުނެއެވެ. މިސެޝަންގައި ބައިވެރިވުމަށް ދަ ކޯޗިންގެ ވެބްސައިޓުގައި ހިމެނޭ ލިންކު މެދުވެރިކޮށް ފުރުސަތު އޮންނާނެކަމަށް އެފަރާތުން ބުނެއެވެ.