ޗެމްޕިއަންސް ލީގުގައި މިރޭ ދަންވަރު ފްރާންސްގެ ޕީއެސްޖީ އާއި ޖަރުމަނުގެ ސުޓުޓްގާޓް ބައްދަލުކުރާ މެޗުގެ ކުރިން މިހާތަނަށް 59 މީހަކު ހައްޔަރުކޮށްފި އެވެ.
އަހުލާގީ މިންގަނޑުން ބޭރުވެ، ސަލާމަތީ ބާރުތަކާއި އާއްމުންނަށް އުނދަގޫވާނެހެން އުޅުނު ޒުވާނުންތައް ހައްޔަރު ކުރަން ޖެހުނީ މެޗުގައި ހަމަނުޖެހުން ހިންގަފާނެ ކަމަށް ގަބޫލުކުރެވިގެން ކަމަށް ޖަރުމަނުގެ ފުލުހުން ބުންޏެވެ.
"ސުޓުޓްގާޓަށް އަންނަ ޓްރޭންތަކާއި ދަތުރުވެރިންގެ ކަންކަން މިދަނީ ވަރަށް ބޮޑަށް ބަލަމުން. ހައްޔަރު ކުރަން ޖެހުނީ ގާނޫނާ ގަވާއިދުތަކާ ހިލާފުވާ މީހުން. މެޗު ހިނގަމުންދާއިރު ވެސް ހަމަނުޖެހުން ހިންގާ މީހުން ވަގުތުން ދަނޑުން ނެރޭނެ" ފުލުހުން ބުންޏެވެ.
ޖަރުމަނުގެ ފުލުހުން ބުނީ ބަލާ ފާސްކުރާއިރު ހަމަނުޖެހުން ހިންގާނެ ކަމަށް ބެލެވޭ މީހުންނާއި މޫނު ނިވާކޮށް ތިބޭ މީހުންނާ މެދު ހަރުކަށި އަދަބުދޭނެ ކަމަށެވެ.
މިރޭގެ މެޗަކީ މި ދެ ޓީމު މޮޅުވާންޖެހޭ މެޗެކެވެ. ސަބަބަކީ މުބާރާތުގެ ގަދަ 16 އަށް ދިއުމަށް ކުޅެން ޖެހޭ ޕްލޭއޯފް މެޗު ކުޅުމުގެ ފުރުސަތު މި މެޗުން މޮޅުވުން ނޫން ގޮތަކަށް ލިބެން ނެތުމުންނެވެ.