ޢާންމުކޮށް ހުޅުވާލުމެއް ނެތި ރަށްރަށް ކުއްޔަށްދޭ ގޮތަށް ޓޫރިޒަމް ޤާނޫނުގެ 5ވަނަ މާއްދާއަށް ރައްޔިތުންގެ މަޖިލީހުން ގެންނެވި އިޞްލާޙަކީ ރާއްޖޭގައި ނުހެދި ހުރި ރިސޯޓްތަކާއި ހުއްޓިފައިވާ ރަށްތައް އަޕްގްރޭޑްކުރުމަށް ގެނެނެވި އިޞްލާޙެއްކަމަށާއި، މިއީ ކަމާގުޅު ހުރި އިދާރާތަކާ މަޝްވަރާކުރައްވައިގެން ގެންނެވި އިޞްލާޙެއްކަމަށާއި ރަށްތައް ދޫކޮށްގެން ލިބޭ ފައިސާ ސީދާ ދައުލަތަށް ވަންނާނެ އިޞްލާޙެއް ކަމަށް ޓޫރިޒަމް މިނިސްޓަރ މޫސާ ޒަމީރު ވިދާޅުވެއްޖެއެވެ.
ނޫސްވެރިންނަށް މަޢުލޫމާތު ދެއްވަމުން ޓޫރިޒަމް މިނިސްޓަރ މޫސާ ޒަމީރު ވިދާޅުވީ، 1994 ން ފެށިގެން 2016 އާ ހަމައަށް 88 ރަަށް ބިޑް ކުރެވިފައިވާކަމަށެވެ. އަދި އޭގެ ތެރެއިން 40 ރަށެއް އަދިވެސް ހަދައިނިމިފައި ނުވާކަން މިނިސްޓަރ ވަނީ ފާހަގަކުރައްވާފައެވެ. މީގެ އިތުރުން 2014 އަދި 2016 ގައިވެސް 9 ރަށެއް ދެފަހަރަށް ބިޑުކޮށްފައިވާ ކަމަށާއި ނަމަވެސް އެއްވެސް ހުށައެޅުމެއް އައިސްފައި ނުވާކަން ފާހަގަކުރައްވާ، މިނިސްޓަރ ވަނީ ޓޫރިޒަމާބެހޭ ޤާނޫނުގައި ކުރިން އޮތްގޮތަށް ރަށްތައް ދޫކުރެއްވި ޖޭ.ވީ މޮޑެލްގެ ދަށުން އަދިވެސް ގިނަ ރަށްތަކެއް ހަދަމުންދާކަމަށެވެ.
މިނިސްޓަރ ޒަމީރު ވިދާޅުވީ، ސަރުކާރުގެ އިޤްތިޞާދީ އެޖެންޑާގެ ދަށުން ގިނަ ކަންކަން ފުރިހަމަ ކުރެވެމުންދާއިރު، ޕީ.ޕީ.އެމުން ނިންމަވާ ގޮތްތަކެއްގެ ސަބަބުން އިޤްތިޞާދީ އެޖެންޑާ ކުރިއަށް ނުގެންދެވިއްޖެނަމަ އެކަމުގެ ޒިންމާ ޕީ.ޕީ.އެމްގެ ކައުންސިލުން އުފުލަން ޖެހޭނެކަމަށެވެ.
މި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ބަންޑާރަ ނައިބު އަލްއުސްތާޛް މުޙައްމަދު އަނިލް ވިދާޅުވީ، ޓޫރިޒަމް ޤާނޫނުގެ 5 ވަނަ މާއްދާއަށް ގެނެވުނު އިޞްލާޙަކީ، ޤާނޫނު އަސާސީއާ ޚިލާފަށް ގެނެވުނު އިޞްލާޙެއް ނޫންކަމަށެވެ. އަނިލް ވިދާޅުވީ، ފަޅުރަށްރަށާ ގުޅޭ ޤާނޫނޫ، ޤާނޫނު އަސާސީއާ ޚިލާފު ނުވެފައި، ބިޑްނުކޮށް ރަށްރަށް ދޫކުރާގޮތަށް ޓޫރިޒަމް ޤާނޫނަށް ގެނެވުނު އިޞްލާޙް ޤާނޫނުއަސާސީއާ ޚިލާފުވާނެ އެއްވެސް ގޮތެއް ނޯންނާނެ ކަމަށެވެ. އެގޮތުން ޓޫރިޒަމްގެ ޤާނޫނަށް ގެންނެވި އިސްލާހަކީ ފަޅުރަށްރަށް ކުއްޔަށް ދިނުމާބެހޭ ޤާނޫނުގައި މިހާރުވެސް ބަޔާންކޮށްފައިވާ ކަމެއް ކަން ބަންޑާރަ ނައިބް ފާހަގަކުރެއްވިއެވެ.
ބަންޑާރަނައިބުގެ ވާހަކަފުޅުގައި ޤާނޫނަށް ގެނެވުނު އިޞްލާޙަކީ، ކުރިން ފަޅުރަށްރަށް ދޫކުރަމުން އައި ގޮތަށްވުރެ މާބޮޑަށް ދެފުން ފެންނަ، ރައްޔިތުންނާއި ދައުލަތަށް ފައިދާ ހުރި އަދި ރާއްޖޭގެ އިޤްތިޞާދަށްވެސް ފައިދާ ބޮޑު އުޞޫލެއްކަމަށް ވިދާޅުވިއެވެ. އަދި މިކަން ރައްޔިތުންގެ މަޖިލީހުން ފާސްކުރައްވާފައިވާ ޤާނޫނެއްގެ ތަރަޙައިގެ ތެރެއިން ކުރެއްވުމުން، މީގެ ކުރިން ބިޑްނުކޮށް، އެހެން ބައެއް ކަންކަން ޝަރުޠުކުރުމަށްފަހު ދޫކޮށްފައި ހުރި ރަށްރަށް ދޫކުރުމުގައި ދިމާވި މައްސަލަތަކާއި އަދި ފަހުން ޖެހޭ މައްސަލަތައް ޙައްލުކުރުމަށް ކުރިމަތިވެފައިވާ ޤާނޫނީ ހުރަސްތައް ދިމާނުވާނެކަން އެޓާރނީ ޖެނެރަލް އަލްއުސްތާޛު މުޙައްމަދު އަނިލް ފާހަގަކުރެއްވިއެވެ.