މަގޭ ސޯލާ ޕްރޮގްރާމުގެ ދަށުން ގޭބިސީތަކުގައި ސޯލާ ހަރުކުރުމުގެ މަސައްކަތް ރައީސް ފައްޓަވައިދެއްވައިފި

މަގޭ ސޯލާ ޕްރޮގްރާމުގެ ދަށުން ގޭބިސީތަކުގައި ސޯލަރ ސިސްޓަމް ހަރުކުރުމުގެ ޢަމަލީ މަސައްކަތް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފައްޓަވައިދެއްވައިފިއެވެ.

ހއ. އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން މިމަސައްކަތް ރައީސުލްޖުމްހޫރިއްޔާ ފައްޓަވައިދެއްވީ ހއ. ފިއްލަދޫގައެވެ. ފިއްލަދޫގައި ސޯލަރ ސިސްޓަމް ހަރުކޮށްފައިވަނީ އެރަށު "ކެތިގެ" ނަމަކަށް ކިޔާ ގޭގައެވެ

މަގޭ ސޯލަރ ޕްރޮގްރާމް ފެށުމާއި ގުޅޭގޮތުން ޕީއެސްއެމް ނިއުސްއަށް ދެއްވި އިންޓަރވިއުއެއްގައި މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވަޒީރު ޠާރިޤް އިބްރާހިމް ވިދާޅުވީ ގޭގޭގައި ސޯލަރ ހަރުކުރުމަށް ހަމަޖެހިފައިވަނީ އެގެތަކުގެ 6 މަސްދުވަހުގެ ކަރަންޓު ބިލަށް ބެލުމަށްފަހުކަމަށެވެ. އެގޮތުން 3 އެއް ނުވަތަ 5 ކިލޯވޮޓުގެ ސޯލަރ ސިސްޓަމްހަރުކުރާނެކަމަށެވެ. ވަޒީރު ވިދާޅުވީ ފުރަތަމަ ފިޔަވަހީގެ ދަށުން 750 ސޯލަރ ސިސްޓަމް ގެނެސްފައިވާކަމަށާއި ދެވަނަ ފިޔަވަހީގެ ދަށުން 7 މެގަވޮޓުގެ ސޯލަރ ސިސްޓަމްތައް ގެނައުމަށް މަސައްކަތް ކުރައްވަމުން އަންނަކަމަށެވެ. މިމަސައްކަތަކީ ރާއްޖެއިން ތެލަށް ކުރާ ޚަރަދު ކުޑަކުރުމަށްޓަކައި އެޅުނު މުހިންމު ފިޔަވަޅެއްކަން ފާހަގަކުރައްވާ ވަޒީރު ވިދާޅުވީ ސޯލަރ ހަރުކުރުމުގެ ފުރުޞަތު ކޮންމެ މީހަކަށްވެސް އޮންނާނެކަމަށެވެ.

"މިގޭގެ ކަރަންޓު ބިލަށް ބެލުމަށްފަހު މި ހަރުކުރަނީ 3 ކިލޯވޮޓުގެ ސޯލަރ ޕެނަލް ސިސްޓަމެއް. މިގޭގެ ބިލަށް މިސާލަކަށް 700 އާއި 850 ދެމެދުގެ އަގެއް. މި ސޯލަރއިން ރަނގަޅަށް ކަރަންޓު އުފައްދާކަމުގައި ވަނީނަމަ މަހެއްގެ މައްޗަށް ކަރަންޓު ބިލު ޒީރޯ ވެގެންދާނެ." މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވަޒީރު ޠާރިޤް އިބްރާހިމް ވިދާޅުވިއެވެ.

ފެނަކައިން ކަރަންޓުގެ ޚިދުމަތްދޭ ހުރިހާ ގޭބީސީތަކަށް ހުޅުވާލައިގެން ކުރިއަށްގެންދާ މަގޭ ސޯލަރ ޕްރޮގްރާމްގެ ދަށުން، ދޫކުރުމަށް ހަމަޖެހިފައިވަނީ، 3 ކިލޯ ވޯޓުގެ ސިންގަލް ފޭސް އަދި ތްރީ ފޭސް އާއި 5 ކިލޯވޮޓުގެ ސިންގަލް ފޭސް އަދި ތްރީ ފޭސް ސިސްޓަމްތަކެވެ. ގޭބީސީތަކަށް ދޫކުރެވޭ ސިސްޓަމްތަކުގެ ސައިޒް ކަނޑައަޅާނީ، ނެޓް މީޓަރިން އުސޫލުގެ ދަށުން އަދި ފެނަކަ ކޯޕަރޭޝަނަށް ހުށައަޅާ ގޭބީސީތައް ސާރވޭ ކުރުމަށް ފަހުގައެވެ. ފެނަކައިގެ އިތުުރުން ކުރިއަށް އޮތްތަނުގައި ސްޓެލްކޯއިން ޚިދުމަތް ދޭ ރަށްރަށުގެ ގޭބިސީތަކުގައިވެސް ސޯލަރ ހަރުކުރުމުގެ ފުރުޞަތު ދިނުމަށް ވަނީ ނިންމާފައެވެ.

މޫސުމީ ބަދަލުތަކާއި ތިމާވެށްޓާއި ހަކަތައާ ބެހޭ ވުޒާރާއިން ވިދާޅުވެފައިވަނީ މިޕްރޮގްރާމުގެ ދަށުން ފޯރުކޮށްދޭ ސޯލަރ ޕީވީ ސިސްޓަމަކަށް އެޑްވާންސް ޕޭމަންޓެއް ނުނަގާނެކަމަށެވެ. މި ޕްރޮގްރާމްގެ ދަށުން ދޫކުރާ ސޯލަރގެ އަގުތަކަކީ، 3 ކިލޯވޮޓު ސިސްޓަމެއް 45,000 ރުފިޔާއަށް އަދި 5 ކިލޯވޮޓު ސިސްޓަމެއް 75,000 ރުފިޔާއެވެ. މި ޕްރޮގްރާމްގައި ހަރުކޮށްދޭ ސޯލަރ ސިސްޓަމްތަކަށް ފައިސާ ދެއްކުމަށް ދެ ގޮތެއް ކަނޑައެޅިފައިވެއެވެ. އެއީ، އެއްފަހަރާ ފައިސާ ދައްކާ ޚަލާސްކުރާ ގޮތަށް ނުވަތަ އިންސްޓޯލްމަންޓް އުސޫލުން 5 އަހަރަށް ބަހާލައިގެންނެވެ.

މިޕްރޮގްރާމުގެ މަޤުސަދަކީ އާންމު ރައްޔިތުން ކަރަންޓަށް ކުރާ ހޭދަ ކުޑަކުރުމާއި، ދިވެހިރާއްޖޭގައި ލިބެންހުރި ހަކަތައިގެ ވަސީލަތްތަކުގެ ބޭނުން އިތުރުކުރުމެވެ. މަގޭ ސޯލަރ ޕްރޮގްރާމަކީ، ރާއްޖޭގައި
ބޭނުންކުރާ ކަރަންޓުގެ %33 އަކީ، އިއާދަކުރަނިވި ހަކަތައިގެ ވަސީލަތްތައް ބޭނުންކޮށްގެން އުފައްދާ ކަރަންޓަށް ހެދުމަށް ސަރުކާރުން ކަނޑައަޅާފައިވާ ލަނޑުދަނޑިއަށް ވާސިލްވުމަށް އެޅުނު މުހިންމު ފިޔަވަޅެކެވެ.