ސަރުކާރުން އިސްނަންގަވައިގެން ސިޔާސީ ޕާޓީތަކާއެކު ކުރިޔަށް ގެންދަވާ މަޝްވަރާތަކަށް އދއިން ކަނޑައަޅުއްވާފައިވާ މަންދޫބަށް މަޝްވަރާގައި ބައިވެރިވުމަށް އެދިވަޑައިގެން، ދިވެހި ސަރުކާރުން ދައުވަތު އަރުވައިފިއެވެ.
ދިވެހި ސަރުކާރުގެ ފަރާތުން އދ ގެ މަންދޫބަށް މަޝްވަރާގައި ބައިވެރިވުމުގެ ދައުވަތު އެރުވީ ޚާރިޖީ ވަޒީރު ދުންޔާ މައުމޫނެވެ. މައްލޫމާތު ލިބިފައިވާ ގޮތުގައި ޚާރިޖީ ވަޒީރު މި ދައުވަތު އެރުވީ އިއްޔެ، ސްވިޓްޒަލޭންޑްގެ ޖެނީވާގައި އދ ގެ އެސިސްޓެންޓް ސެކްރެޓަރީ ޖެނެރަލް މިރޯސްލާފް ޖެންކާއާއި އދ އިން ސިޔާސީ ޕާޓީތަކުގެ މަޝްވަރާއަށް ކަނޑައަޅުއްވާފައި ހުންނަވާ މަންދޫބް ތަމްރާތު ސެމުއެލްއާއެކު ބޭއްވި ބައްދަލުވުމެއްގައެވެ. މިބައްދަލުވުމާއި ބެހޭ އިތުރު ތަފްޞީލް ދިވެހި ޚާރިޖިއްޔާއިން އަދި ހާމަކުރައްވާފައެއް ނުވެއެވެ. އެހެންނަމަވެސް ސަރުކާރުގެ ފަރާތުން މަޝްވަރާތަކުގައި އިސްކޮށް ހަރަކާތްތެރިވެވަޑައިގަންނަވާ ފިޝަރީޒް މިނިސްޓަރ ޑރ. މުހައްމަދު ޝައިނީ އިއްޔެ ވިދާޅުވެފައިވަނީ، އަންނަ މަހުގެ ތެރޭގައި އަނެއްކާވެސް މަޝްވަރާ ކުރިޔަށް ގެންދަވާނެކަމަށެވެ. އޭނާ ވިދާޅުވެފައިވަނީ، އ.ދ ގެ އެހީތެރިކަމާއެކު ކުރިޔަށް ގެންދަވާ މަޝްވަރާތައް ފައްޓަވަނީ އދ. ގެ މަންދޫބް ތަމްރަތު ސެމިއުލް ރާއްޖެ ވަޑައިގަތުމުން ކަމަށެވެ.
ސަރުކާރުން އިސްނަންގަވައިގެން ފައްޓާވާފައިވާ ސިޔާސީ ޕާޓީތަކުގެ މަޝްވަރާތައް އަންނަ މަހު އަލުން ފެއްޓެވުމަށް ތައްޔާރުވަމުންދާއިރު އިދިކޮޅު ފަރާތްތަކުން ބުނަނީ އެ މަޝްވަރާތަކުގައި ދެން ބައިވެރިވާނީ އިދިކޮޅު ފަރާތްތައް ގުޅިގެން ހަދާފައިވާ މޯލްޑިވްސް ޔުނައިޓެޑް އޮޕޮޒިޝަން އިއްތިހާދުން ކަމަށެވެ.
އޭނާ ވިދާޅުވެފައިވަނީ، މަޝްވަރާތައް ފައްޓަވާއިރު ހުރިހާ ސިޔާސީ ޕާޓީތަކެއް މަޝްވަރާތަކުގައި ބައިވެރިވާނެކަށާއި މަޝްވަރާތައް ކާމިޔާބުވާނެކަމުގެ އުއްމީދު ބޮޑުކަމަށެވެ.