ކުދި ޖަޒީރާ ޤައުމުތަކުން، އދ.ގެ އިންސާނީ ހައްޤުތަކާބެހޭ ކައުންސިލުގައި އަދާކުރަންޖެހޭ ދައުރު އޭގެ އެންމެ ފުރިހަމަ ގޮތުގައި އަދާކުރުމަށްޓަކައި ބޭނުންވާ ފަންނީ އެހީއާއި، އިންސާނީ ވަޞީލަތްތައް ބިނާ ކުރުމަށް އެހީތެރިވެދިނުމަށް ޚާރިޖީ ވަޒީރު ދުންޔާ މައުމޫން ބައިނަލްއަޤްވާމީ މުޖުތަމަޢަށް ގޮވާލައްވައިފިއެވެ.
އެކަމަނާ މިކަމަށް ގޮވާލެއްވީ މިހާރު ސްވިޓްޒަލެންޑްގެ ޖެނީވާގައި ކުރިޔަށްދާ އދ.ގެ އިންސާނީ ޙައްޤުތަކާބެހޭ ކައުންސިލްގެ 32 ވަނަ ބައްދަލުވުމުގައި، ކުދި ޖަޒީރާ ޤައުމުތަކުގެ ފަރާތުން ދެއްވި ގުޅިފައިވާ ބަޔާނުގައެވެ. ރާއްޖެ، އޮސްޓްރޭލިޔާ، ބަހާމާސް، މޮރޮކޯ އަދި ސިންގަޕޫރު ފަދަ އދ.ގެ އިންސާނީ ޙައްޤުތަކާބެހޭ ކައުންސިލްގައި ހިމެނޭ ކުދި ޖަޒީރާ 80 ޤައުމުގެ ފަރާތުން ކައުންސިލްގައި ދެއްވި ގުޅިފައިވާ ބަޔާނުގައި ޚާރިޖީ ވަޒީރު ދުންޔާ މައުމޫން ވިދާޅުވީ، މާލީ ފުދުންތެރިކަން ދަށްކަމުންނާއި، އެކަށީގެންވާ މިންވަރަށް އިންސާނީ ވަޞީލަތްތައް ތަރައްޤީވެފައި ނެތުމުގެ ސަބަބުން، ކުދި ޖަޒީރާ ޤައުމުތަކަށް އދ.ގެ ސެޝަންތަކުގައި އެޤައުމުތައް ތަމްސީލު ކުރަން ލިބޭ ފުރުޞަތުތަކާއި، ކަންކަމުގައިބައިވެރިވުމުގެ ފުރުޞަތު ގެއްލެމުންދާކަމަށެވެ. މިކަމުގެ ސަބަބުން އދ.ގެ ތެރޭގައި ޙަރަކާތްތެރިވެވޭ މިންވަރު ކުޑަވެ، މެމްބަރު ޤައުމެއްގެ ޙައިޞިއްޔަތުން އަދާކުރަންޖެހޭ ދައުރު، ފުރިހަމަކުރުމުގައި ޤައުމުތަކަށް ބޮޑެތި ދަތިތަކާއި ކުރިމަތިވެފައިވާކަމަށް އެކަމަނާ ވިދާޅުވިއެވެ.
އެހެންކަމުން މިކަމުން އަރައިގަތުމަށް ބައިނަލްއަޤްވާމީ އެހީ ބޭނުންވާކަމަށް ވިދާޅުވެ، ކުދި ޖަޒީރާ ޤައުމުތަކައް މިކަމުގައި ބޭނުންވާ ފަންނީ އަދި މާލީ އެހީތެރިކަން ފޯރުކޮށްދެއްވުމަށް ބައިނަލްއަޤްވާމީ މުޖުތަމަޢަށް އެކަމަނާ ގޮވާލެއްވިއެވެ. އަދި މިހާރު ކުދި ޖަޒީރާ ޤައުމުތަކުގެ ދައުރު އދ.ގެ އިންސާނީ ހައްޤުތަކާއި ބެހޭ ކައުންސިލްގައި ފުޅާވެފައިވާކަމަށް ވިދާޅުވެ، ކުޑަކޮށް ތަރައްޤީވެފައިވާ ޤައުމުތަކާއި، ކުދި ޖަޒީރާ ޤައުމުތަކުގެ އަންހެނުންނާއި، ފިރިހެނުން ހަމަހަމަ ގޮތެއްގައި ޙަރަކާތްތެރިވެވޭނޭ މަގު ފަހިކޮށްދެވުމަށް އދ.ގެ ހިއުމަން ރައިޓްސް ކޮމިޝަނަރަށް ގޮވާލެއްވިއެވެ. ހަމަ އެއާއިކު ކުދި ޖަޒީރާ ޤައުމުތަކުން އެކުލަވާލާފައި "ޓްރަސްޓް ފަންޑް"އަށް މާލީ ގޮތުން އެހީތެރިކަން ފޯރުކޮށްދިނުމަށް، ޚާރިޖީ ވަޒީރު ދުންޔާ މައުމޫންއދ.ގެ އިންސާނީ ހައްޤުތަކާބެހޭ ކައުންސިލުގެ މެމްބަރު ޤައުމުތަކަށް ހިތްވަރުދެއްވިއެވެ.
ދުންޔާގެ ބަޔާނުގައި،އިންސާނީ ޙައްޤަކީ، އދ.ގެ މައި 3 އަސާސްގެ ތެރޭގައި ހިމެނޭ ކަމެއްކަން ފާހަގަ ކުރައްވާ، އދ.ގެ އިންސާނީ ޙައްޤުތަކާއި ބެހޭ ކައުންސިލްގެ ޒިންމާތަކުގެ ތެރޭގައި އިންސާނީ ހައްޤުތައް މެއިންސްޓްރީމް ކުރުމުގެ ޒިންމާ ކައުންސިލްގެ ކޮމިޝަނަރުގެ މައްޗަށް މަތިކޮށްފައިވާކަން ފާހަގަކުރެއްވިއެވެ. އަދި މިޒިންމާ އުފުއްލަވަމުން ގެންދަވާ އިރު، ހަމައެކަނި އދ.ގެ ނިޒާމުގެ ތެރޭގައި އިންސާނީ ހައްޤުތައް މެއިންސްޓްރީމް ކުރުމުގެ ބަދަލުގައި، މެމްބަރު ޤައުމުތަކުގައި ޤައުމީ ފެންވަރެއްގައި އިންސާނީ ހައްޤު މެއިންސްޓްރީމް ކުރުމަށް ބާރުއެޅުމަށް ހައިކޮމިޝަނަރަށް ގޮވާލެއްވިއެވެ. އަދި ހުރިހާ ޤައުމެއްގައިވެސް އިންސާނީ ހައްޤުތައް ހަމަހަމަކަމާއި، އިންސާފުވެރިކަމާއިއެކު ޕްރޮމޯޓްކުރުމަށް ދުންޔާ ގޮވާލެއްވިއެވެ.