ސްޕޭނުގެ ބާސެލޯނާގެ ދެ ކީޕަރުން އެއްވަނަ ކީޕަރުގެ މަގާމު ނުލިބިގެން ކޯޅެން ފަށައިފި އެވެ.
އެއްވަނަ ކީޕަރު އަދި ކެޕްޓަން މާކް އަންދްރޭ ޓާސްޓެގަން އަށް އަނިޔާވެ މި ސީޒަނުގައި ނުކުޅެވޭނެކަން ޔަގީންވުމުން ބާސެލޯނާގެ އެއްވަނަ ކީޕަރުކަން ކުރަމުން އައީ ސްޕޭނުގެ ޒުވާން ކީޕަރު އިކާނީ ޕެންޔާ އެވެ. ނަމަވެސް މައްސަލަ ބޮޑުވީ ޕެންޔާގެ ތަޖުރިބާ މަދުވުމުން ރިޒާވް ކީޕަރަކަށް ގެނައު ޕޮލެންޑްގެ ތަޖުރިބާކާރު ކީޕަރު ވޮޝްނިއާ ޝެޒްނީ މޮޅަށް ކުޅެން ފެށުމުންނެވެ.
ބާސެލޯނާއިން މިހާރު ނިންމާފައިވަނީ ޕެންޔާ ލައްވައި ލީގު މެޗުތައް ކުޅުވުމަށެވެ. ޗެމްޕިއަންސް ލީގާއި ކޮޕާ ޑެލްރޭގެ މެޗުތަކުގައި ކުޅޭނީ އުމުރުން 34 އަހަރުގެ ޝެޒްނީ އެވެ. ނަމަވެސް މައްސަލަ ގޯސްވީ ސްޕެނިޝް ލީގުގައި އިއްޔެ ރޭ ވެލެންސިއާ އަތުން ބާސެލޯނާ މޮޅުވި މެޗަށް ޝެޒްނީ ނެރުމުންނެވެ.
ސްޕޭނުގެ މީޑިއާތަކުން ބުނަނީ މިކަމާ ގުޅިގެން ޕެންޔާ ބާސެލޯނާ ދޫކޮށްލުމުގެ ހިޔާކު ގެންގުޅޭ ކަމަށެވެ. އަދި މިއީ ކޯޗު ހަންސީ ފްލިކް ކީޕަރާ މަޝްވަރާ ކުރުމެއް ނެތި ގެނައި ބަދަލަކަށްވުމުން ޕެންޔާ ހުރީ ވަރަށް ބޮޑަށް މާޔޫސް ވެފައި ކަމަށެވެ.
މީޑިޔާގައި މި ވާހަކަ ފެތުރެން ފެށުމާއެކު ބާސެލޯނާއާ ގުޅުން އޮންނަ ނޫސްވެރިން ވަނީ ކަމުގެ ހަގީގަތް ހާމަކުރަން ފަށައިފަ އެވެ. ވެލެންސިއާ މެޗަށް ޝެޒްނީ ނެރުނީ އެ މެޗުގައި ކުޅެން ނެރުނީ ވަރަށް ޒުވާން ޓީމަކަށްވުމުން ތަޖުރިބާކާރު ކީޕަރަކު ބެހެއްޓުމުގެ ގޮތުންނެވެ. މިކަމުގައި ޕެންޔާގެ އެންމެ ބޮޑު ކަންބޮޑުވުމަކީ ޓާސްޓެގަން ފިޓްވެ ކުޅެން ނުކުތުމުން އޭނާ ތިން ވަނަ ކީޕަރަކަށްވާން ޖެހިދާނެތީ އެވެ.
ޝެޒްނީ ބާސެލޯނާ އަސް މި ސީޒަނުގެ ނިޔަކަށް ސޮއިކުރީ ރިޓަޔާ ކޮށްގެން ހުރުމަށްފަހު އެވެ. އޭނާ އަށް ކުޅެން ލިބުނު މަދު މެޗުތަކުގައި ވަނީ މޮޅު ކުޅުމެއް ދައްކައިފަ އެވެ.