ލޯންޗު އެކްސިޑެންޓެއްގައި މީހަކު ނިޔާވި މައްސަލައިގައި ދެ ލޯންޗުގެ ކެޕްޓަނުންނަށް ދަޢުވާކުރަން ފޮނުވައިފި

2023ވަނަ އަހަރު ލޯންޗް އެކްސިޑެއްގައި އަނިޔާވި މީހަކަށް ފަރުވާދެމުން ދަނިކޮށް ނިޔާވި މައްސަލައިގައި، އެކްސިޑެންޓް ހިނގި ދެ ލޯންޗު ދުއްވި މީހުންނަށް ދަޢުވާކުރުމަށް ފުލުހުން ޕީޖީއަށް ހުށައަޅައިފިއެވެ.

މި ޙާދިސާ ހިނގާފައިވަނީ 2023 އޭޕްރީލް 29 ވަނަ ދުވަހުގެ ހަވީރު 16:42 ހާއިރު "ސަސް އީ ސްޕީޑް" ލޯންޗާއި "އެމްޑަބްލިޔުއެސްސީ މެރިން 2" ލޯންޗު ޖެހިގެންނެވެ. މި އެކްސިޑެންޓްގައި ނިޔަވެފަވަނީ އެތަނުން އެއް ލޯންޗުން ދަތުރުކުރި 52 އަހަރުގެ ދިވެހި ފިރިހެނެކެވެ. އޭނާ ނިޔާވެފައިވަނީ އެކްސިޑެންޓްގައި ލިބުނު އަނިޔާތަކަށް އޭޑީކޭ ހޮސްޕިޓަލްގައި ފަރުވާދެމުން ދަނިކޮށް އެދުވަހުގެ 18:15 އެހާ ކަންހާއިރެވެ.

މި މައްސަލާގައި ދައުވާ ކުރުމަށް ފޮނުވާފައިވާ ދެ މީހުންނަކީ ކ. ކާށިދޫ / ހީނާވިލާ، ޔާނިސް ޙަމީދު (35އ) އާއި ހދ. ނޮޅިވަރަން / ގްރީންހައުސް، މުޙައްމަދު ޖަމީލް (43އ) އެވެ. މި ދެ މީހުންނަކީ އެދުވަހު އެކްސިޑެންޓް ހިނގި ވަގުތު އެ ދެ ލޯންޗު ދުއްވަން ތިބި މީހުންނެވެ.

މިމައްސަލައިގެ ތަހުގީގު ނިންމައި އެ ދެމީހުންގެ މައްޗަށް ޖިނާއީ ދައުވާކޮށްދިނުމަށް އެދި ޕްރޮސިކިއުޓަރ ޖެނެރަލްގެ އޮފީހަށް އެންމެ ފުރަތަމަ މައްސަލަ ފޮނުވީ 04 ޖޫން 2023 ގައެވެ. ނަމަވެސް މައްސަލަ އިސްލާހުކުރުމަށް އަނބުރާ ފޮނުުވުމަށްފަހު ދެވަނަ ފަހަރަށް މައްސަލަ ޕީޖީ އޮފީހަށް ފޮނުވާފައި މިވަނީ މިމަހުގެ 15 ވަނަ ދުވަހުކަމަށް ފުލުހުން ވިދާޅުވިއެވެ.