އިނގިރޭސި ޕްރިމިއާ ލީގުގައި ފުލަމް އާއި ދެކޮޅަށް މެންޗެސްޓަރ ޔުނައިޓެޑް ކުޅުނު މެޗުން 1-0 ގެ ނަތީޖާއަކުން ޔުނައިޓެޑް މޮޅުވެއްޖެ އެވެ.
ފުލަމްގެ ކްރެވަން ކޮޓޭޖް ގައި ހަތާވީސް ހާސް މީހުންގެ ކުރިމަތީގައި ކުޅުނު މި މެޗުގެ ފުރަތަމަ 75 މިނިޓު ނިމިގެންދިޔަ ދެ ޓީމުގެ ފަރާތުންވެސް ފެނިގެން ގޮސްފައިވަނީ ވަރަށް އާދައިގެ ކުޅުމެކެވެ. އަދި ދެ ޓީމުންކުރެ އެއްވެސް ޓީމަކަށް ނުރައްކާތެރި ހަމަލައެއްވެސް އުފެއްދިފައެއް ނުވެއެވެ.
މި މެޗުގައި ފެނިގެން ދިޔަ ހަމައެކަނި ލަނޑު މެޗުގެ 78 ވަނަ މިނިޓުގައި ފެނިގެން ގޮސްފައިވަނީ މެންޗެސްޓަރ ޔުނައިޓެޑްގެ ލިސަންދްރޯ މާޓިނޭޒްގެ ފަރާތުންނެވެ.
މެންޗެސްޓަރ ޔުނައިޓެޑް އިން މި ލަނޑު ޖެހުމުގެ ކުރިން ފުލަމް އަށް ވަނީ ލަނޑު ޖަހަން ރަގަޅު ފުރުސަތުތަކެއް ލިބިފަ އެވެ. އެގޮތުން އެ ޓީމުން ރައުލް ޖިމިނޭޒް ފޮނުވާލި ހަމަލާ ގޮސްފައިވަނީ ގޯލުގެ ހުރަސް ދަނޑި މަތިން ބޭރަށެވެ.
މި މެޗުގައި މެންޗެސްޓަރ ޔުނައިޓެޑްގެ އަމަދް ދިއާލޯ ގޯލަށް ބޯޅަ ފޮނުވާލި ނަމަވެސް ވީޑިއޯ ބެލުމަށްފަހު ރެފްރީ ވަނީ އެއީ އޮފްސައިޑް ލަނޑެއް ކަމަށް ނިންމާފަ އެވެ.
މި މެޗުން މޮޅުވުމާއެކު މެންޗެސްޓަރ ޔުނައިޓެޑަށް ވަނީ 23 މެޗުން ލިބިފައިވާ 29 ޕޮއިންޓާއެކު ތާވަލުގެ 12 ވަނަ މަގާމް ލިބިފަ އެވެ. ފުލަމް އޮތީ 33 ޕޮއިންޓާއެކު ތާވަލުގެ 10 ވަނައިގަ އެވެ.
އަދި މިދިޔަ ހަފްތާގައި ޔޫރޮޕާ ލީގުގައި ރޭންޖަރސް އަތުން މޮޅުވުމަށްފަހު މި މެޗުން މެންޗެސްޓަރ ޔުނައިޓެޑް މޮޅުވުމާއެކު އެ ޓީމު އެންމެ ފަހުން ކުޅުނު ދެ މެޗުންވެސް ވަނީ މޮޅުވެފަ އެވެ.
މި މެޗުގައިވެސް މެންޗެސްޓަރ ޔުނައިޓެޑްގެ ފޯވަޑް މާކަސް ރަޝްފޯޑް އަށް ކުޅެން ފުރުސަތު ދީފައިނުވާތީ އެކަމާއި ގުޅޭ ގޮތުން ނޫސްވެރިން ސުވާލު ކުރުމުން ކޯޗު ރުބެން އަމޮރިމް މެޗަށްފަހު ބުނެފައިވަނީ ރަޝްފޯޑް އަށް ބެންޗުންވެސް ފުރުސަތު ދިނުމުގެ ބަދަލުގައި އެ ޖާގަ އެ ޓީމުގެ 63 އަހަރުގެ ގޯލުކީޕަރު ޓްރޭނަރު އަށް ދިނުންވެސް މާ ރަގަޅު ކަމަށެވެ.
އަދި ރަޝްފޯޑްގެ ފަރާތުން މަސައްކަތް ކުރުމުގެ އެއްވެސް ކަމެއް ނުފެންނަ ކަމަށާއި ޓީމުން ފުރުސަތު ހޯދުމަށް އޭނާ މަސައްކަތް ކުރާތަންވެސް ނުފެންނަ ކަމަށެވެ.
އަންނަ ފެބްރުއަރީ މަހުގެ 3 ވަނަ ދުވަހަށް ފިނި މޫސުމުގެ ޓްރާންސްފަރ ބާޒާރު ބަންދުވާއިރު ރަޝްފޯޑްގެ މުސްތަގުބަލާއިމެދު ވަނީ ސުވާލު އުފެދިފަ އެވެ.