ޚަބަރު

ޤައުމީ އަންހެން ވޮލީބޯޅަ ޓީމުގައި ބައިވެރިވުމުގެ ފުރުސަތު ހުޅުވާލައިފި


ޤައުމީ ސީނިއަރ އަންހެން ވޮލީބޯޅަ ޓީމުގެ ފަރިތަކުރުންތަކުގައި އެކަމަށް ޝައުގުވެރިވާ މީހުން ބައިވެރިވުމުގެ ފުރުސަތު ހުޅުވާލައިފިއެވެ.

ވޮލީ ބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން ބުނީ މިއީ ޤައުމީ ޓީމަށް ފެންވަރު ރަނގަޅު ކުޅުންތެރިން ހޯދުމުގެ ގޮތުން ހުޅުވާލާފައިވާ ފުރުސަތެއް ކަމަށެވެ. މާލޭގެ އިތުރުން ރާއްޖޭގެ އެކި ރަށްރަށުގައި ހުނަރުވެރި ވޮލީ ކުޅުންތެރިން އެބަތިބި ކަމަށާއި، ފަރިތަކުރުންތަކުގައި ބައިވެރިވުމުގެ ފުރުސަތު ހުޅުވާލާފައިވަނީ އެފަދަ ކުޅުންތެރިންނަށް ފުރުސަތުދިނުމުގެ ގޮތުންކަމަށް ވީއޭއެމްއިން ބުނެއެވެ.

ޤައުމީ އަންހެން ވޮލީބޯޅަ ޓީމުގެ ފަރިތަކުރުންތަކުގައި ބައިވެރިވާން ބޭނުންވާ ކުޅުންތެރިންނަށް، މި މަހުގެ 26 އަދި 27 ވަނަ ދުވަހު ހެނދުނު 8 އިން 11 އަށް ސޯޝަލް ސެންޓަރުގެ އިންޑޯރ ހޯލުގައި އޮންނަ ފަރިތަކުރުންތަކުގައި ބައިވެރިވެވޭނެއެވެ. ރާއްޖޭގެ އަންހެން ވޮލީ ކުޅުންތެރިންނަކީ ބައިނަލްއަގްވާމީ މުބާރާތްތަކުގައި ސަރަހައްދީ ފެންވަރުގައި ކުރިއަރަމުން އަންނަ ކުޅުންތެރިންތަކެވެ.

ވީއޭއެމްއިން އަންނަނީ ރާއްޖޭގެ ކުޅުންތެރިންނަށް އިތުރު ފުރުސަތުތައް ފަހިކޮށްދިނުމާއި، ކުޅުންތެރިންގެ ފެންވަރު މަތިކުރުމަށް ބައިނަލްއަގްވާމީ މުބާރާތްތަކުން އަންހެން ކުޅުންތެރިންނަށް ވީހާވެސް ގިނަ ފުރުސަތުތައް ހޯދައިދިނުމަށް މަސައްކަތް ކުރަމުންނެވެ.

ރާއްޖޭގެ އެކި ރަށްރަށުގައި ގިނަ އަދަދެއްގެ އަންހެނުންގެ މެދުގައި ވޮލީ އަކީ މަގްބޫލު ކުޅިވަރަކަށް ވެފައިވާއިރު ކުންފުނިތަކާއި އޮފީސް މުބާރާތްތައް އަދި ކައުންސިލްތަކާއި ޖަމްއިއްޔާތަކުގެ މުބާރާތްތަކުންވެސް ހުނަރުވެރި ކުޅުންތެރިން ފެނިގެންދެއެވެ.