މެންޗެސްޓާ ޔުނައިޓެޑަށް މާލީ މައްސަލަތައް ކުރިމަތިވެ، މެޗު ޓިކެޓުގެ އަގުބޮޑު ކުރަން ނިންމާފައިވާކަން އެ ކުލަބުގެ ސަޕޯޓަރުންނަށް އަންގައިފިއެވެ.
ޔުނައިޓެޑްގެ ސަޕޯޓަރުންގެ ގްރޫޕަށް ފޮނުވާފައިވާ ސިޓީއެއްގައި ބުނެފައިވަނީ އިނގިރޭސި ޕްރިމިއަރ ލިގުގައި ކުލަބުތަކުން ޚަރަދުކުރަން އޮންނަ އުސޫލާ އެ ކުލަބުން ޚިލާފުވުމުގެ ބިރު އެބައޮތް ކަމަށާއި، އެއީ ކްލަބަށް ލިބޭ އާމްދަނީ އާއި ކުރެވޭ ޚަރަދުތަކާ ނުބައްދަލުވުމުގެ ބިރު ހީވެފައިވާ ކަމަށެވެ. އެހެންކަމުން އެކަމަށް އަވަސް ހައްލެއް ހޯދުމުގެ ގޮތުން ޓިކެޓުތަކުގެ އަގުބޮޑު ކުރުމަށް ނިންމާފައިވާ ކަމަށް ވަނީ ބުނެފައެވެ.
ޕްރިމިއަރ ލީގުގެ ގަވާއިދު ބުނާ ގޮތުން ކްލަބަކަށް ގެއްލުމުގެ ގޮތުގައި ތިން އަހަރުގެ ތެރޭގައި 105 މިލިޔަން ޕައުންޑަށްވުރެ އިތުރުވާނަމަ، އެކަމަށް ދާއިމީ ހައްލެއް ހޯދަން ޖެހޭނެއެވެ. ޔުނައިޓެޑުން ބުނެފައިވާ ގޮތުގައި ފާއިތުވެދިޔަ ތިން އަހަރުގެ ތެރޭގައި އެ ކްލަބަށް ވަނީ 300 މިލިއަން ޕައުންޑަށްވުރެ ބޮޑު ގެއްލުމެއް ވެފައެވެ. އެހެންކަމުން މިއީ އަވަސް ހައްލެއް ބޭނުންވާ ކަމެއް ކަމަށްވެސް ޔުނައިޓެޑްގެ ސިޓީގައި ވަނީ ބުނެފައެވެ.
އެ ސިޓީގައި އިތުރަށް ބުނެފައިވަނީ ޚަރަދު ކުޑަކޮށް އާމްދަނީ އިތުރުކުރުމުގެ ގޮތުން މަސައްކަތް ކުރާ މުވައްޒަފުން މަދުކުރުމުގެ މަސައްކަތް ފަށާފައިވާ ކަމަށާއި، އަދި ސަޕޯޓަރުންނަށް ބުރަ ނުވާ ގޮތަށް ޓިކެޓުތަކުގެ އަގުތައް އަލުން ބަދަލުކުރުމުގެ މަސައްކަތްވެސް ކުރިއަށްދާ ކަމަށެވެ.
މިދިޔަ ސެޕްޓެމްބަރ މަހު ޔުނައިޓެޑުން ވަނީ އެ ކްލަބަށް މިދިޔަ އަހަރު 113.2 މިލިއަން ޕައުންޑުގެ ގެއްލުމެއް ވެފައިވާކަން އިއުލާން ކޮށްފައެވެ. މި އަދަދާއެކު ފާއިތުވެދިޔަ ފަސް އަހަރުގެ ތެރޭގައި އެ ކްލަބަށް ވަނީ 370 މިލިއަން ޕައުންޑުގެ ގެއްލުމެއް ވެފައެވެ.
ޔުނައިޓެޑުން މެޗު ޓިކެޓުގެ އަގު 66 ޕައުންޑަށް ބޮޑު ކުރުމަށް ނިންމާފައިވާކަމަށް އަޑު ފެތުރިފައިވާއިރު, މިދިޔަ މަހެއްހާ ދުވަހުގެ ތެރޭގައި އެ ކްލަބަށް ވަނީ ބޮޑު ހޭދައެއް ކުރަން ޖެހިފައެވެ. އެގޮތުން ކުރިން އެ ޓީމުގެ ކޯޗަކަށް ހުރި އެރިކް ޓެންހާގް މަގާމުން ވަކިކުރުމުން އޭނާއަށް ބަދަލުގެ ގޮތުގައި 10.4 މިލިއަން ޕައުންޑް ދޭން ޖެހުނުއިރު، އަލަށް ކޯޗު ކަމަށް ގެނައި ރުބެން އަމޮރިމް ޕޯޗުގަލްގެ ސްޕޯޓިން އާއެކު ހަދާފައިވާ އެއްބަސްވުން އުވާލުމަށް އެ ކްލަބަށް ޔުނައިޓެޑުން ވަނީ 11 މިލިއަން ޕައުންޑް ދީފައެވެ.
ޕްރިމިއަރ ލީގުގައި ފައިނޭންޝަލް ފެއާޕްލޭއާ ޚިލާފުވާނަމަ ކްލަބްތަކަށް ވަނީ މީގެ ކުރިންވެސް ފިޔަވަޅު އަޅާފަ އެވެ. އެގޮތުން 22-2021 ވަނަ އަހަރުގެ ސީޒަނުގައި ޕްރިމިއަރ ލީގުން ވަނީ އަދަބެއްގެ ގޮތުގައި އެވަޓަންގެ 10 ޕޮއިންޓް އުނިކޮށްފައެވެ. އަދި މިދިޔަ ސީޒަނުގައި ނޮޓިންހަމް ފޮރެސްޓް އަތުންވެސް ވަނީ ހަތަރު ޕޮއިންޓް އުނިކޮށްފައެވެ.