ކުރިއަށް އޮތް ހަފްތާއެއްހާ ދުވަހުގެ ތެރޭގައި އައްޑުއާއި ފުވައްމުލަކުގައި ބަސްދަތުރުގެ ޚިދުމަތް ފެށޭނެކަމަށް މޯލްޑިވްސް ޕޯޓްސް ލިމިޓެޑުން ހާމަކޮށްފިއެވެ.
މޯލްޑިވްސް ޕޯޓްސް ލިމިޓެޑުން މިއަދު ވަނީ ބަސް ދަތުރުގެ ޚިދުމަތް ދޭން ފެށުމަށް ބޭނުންވާ ބަސްތައް އެ ދެރަށަށް ފޮނުވާފައެވެ.
އައްޑޫ އާއި ފުވައްމުލަކުގައި ބަސް ދަތުރުގެ ޚިދުމަތް ދިނުމަށް ސަރުކާރުން ހަވާލުކޮށްފައިވަނީ މޯލްޑިވްސް ޕޯޓްސް ލިމިޓެޑު، އެމްޕީއެލްއާއެވެ. އަދި އެ ޚިދުމަތް ދިނުމަށްޓަކައި އެކުންފުނިން ވަނީ އަށްސަތޭކަ ހާސް ޑޮލަރު ހޭދަކުރައްވައިގެން ސްރީލަންކާއިން ރާއްޖެއަށް ޒަމާނީ ފެންވަރުގެ 13 ބަސް ގެނެސްފައެވެ.
ބަސްދަތުރުގެ ޚިދުމަތް ދިނުމަށް ދެސައިޒެއްގެ ބަސް ބޭނުން ކުރާނެ. އެއީ 50 މީހުންގެ ޖާގައިގެ ބަހާއި 30 މީހުންގެ ޖާގައިގެ ބަހެވެ. މި ބަސްތައް މިހާރު އެދެރަށަށް ފޮނުވާލާފައިވާއިރު، އޭގެ ތެރެއިން ދެ ބަސް ބޭނުންކުރުމަށް ހަމަޖެހިފައިވަނީ ފުވައްމުލަކުގައި ބަހުގެ ޚިދުމަތް ދިނުމަށް ކަމަށާއި ދެން ހުރި ބަސްތައް ބޭނުންކުރާނީ އައްޑޫ ސިޓީގައި ޚިދުމަތް ދިނުމަށް ކަމަށް އެމްޕީއެލްގެ، އޮޕަރޭޝަންސް ޑިވިޝަންގެ ހެޑް، އިބްރާހިމް ރަޝީދު ވިދާޅުވިއެވެ.
އިބްރާހިމް ރަޝީދު ވިދާޅުވީ ބަސް ދަތުރުގެ ޚިދުމަތަށް ނަގާނެ އަގެއް ކަނޑައެޅުމުގެ މަސައްކަތް ކުރަމުންދާ ކަމަށާއި، ހެޔޮ އަގެއްގައި އެ ޚިދުމަތް ދިނުމަކީ އެ ކުންފުނީގެ އަމާޒުކަމަށެވެ. ދެކުނުގެ ދެއަތޮޅުގައި ބަސްދަތުރުގެ ޚިދުމަތް ފެށުމަށް އެމްޕީއެލުން ތައްޔާރުވެފައި ވާއިރު، އެކުންފުނިން މިހާރު ގެންދަނީ އެ ދެއަތޮޅުގައި ފެރީގެ ޚިދުމަތްވެސް ދެމުންނެވެ.