ޕީ.އެސް.އެމް މަދަހަ މުބާރާތް 2016 އިން މުޅި މުބާރާތުން އެއްވަނައަށް ހޯދި އާމިނަތު ސައިނާ މުޙައްމަދު ރަޝީދަށް ޕީ.އެސް.އެމުން ހަދިޔާއެއްގެ ގޮތުގައި އުފެއްދި މަދަޙަ ސީ.ޑީ މިއަދު އިފްތިތާޙް ކޮށްފިއެވެ.
ޖުމްލަ 6 މަދަޙަ ހިމެނޭ މިސީޑީ އިފްތިތާޙް ކުރުމުގެ ރަސްމިއްޔާތު އޮތީ މިއަދު މެންދުރު ޖަމާލުއްދީން ސްކޫލްގައި ބޭއްވި ޚާއްސަ އެސެމްބްލީއެއްގައެވެ. ޕީ.އެސް.އެމްގެ ސްކޫލް ކުދިންގެ ހަތްވަނަ މަދަޙަ މުބާރާތުގައި ޖަމާލުއްދީން ސްކޫލްގެ ފަރާތުން ވާދަކުރި ކުދިންގެ ތެރެއިންއެސްކޫލްގެ ދަރިވަރު އާމިނަތު ސައިނާ މުޙައްމަދު ރަޝީދު ވަނީ މުޅި މުބާރާތުންނާއި ސީނިއަރ ގްރޫޕުން އެއްވަނަ ޙާޞިލްކޮށްފައެވެ. މުބާރާތުގެ ނަތީޖާ ފާޅުކުރުމަށް މިދިޔަ މޭއި މަހު ބޭއްވި ޙަފްލާގައި ޕީ.އެސް.އެމް އިން ވަނީ އޭނާއަށް ހަދިޔާއެއްގެ ގޮތުގައި ސޯލޯ މަދަޙަ އަލްބަމެއް ރިކޯޑްކޮށްދިނުމުގެ ފުރުޞަތުވެސް ދީފައެވެ.
ޖަމާލުއްދީން ސްކޫލްގައި ބޭއްވި ޚާއްޞަ ޙަފްލާގައި ، މަދަހަ ސީ.ޑީ ނެރެދެއްވީ ،ތަޢުލީމާބެހޭ ވަޒީރު ޑރ.އާއިޝަތު ޝިހާމެވެ. މިބައްދަލުވުމުގައި ވާހަކަފުޅު ދައްކަވަމުން ޕީ.އެސް.އެމް ގެ ޑެޕިއުޓީ މެނޭޖިންގް ޑިރެކްޓަރ މުޙައްމަދު އިކްރާމް ޢަބްދުއްލަޠީފް ވިދާޅުވީ، ޕަބްލިކް ސާވިސް މީޑިއާއިން ސްކޫލްތަކުގެ ދަރިވަރުންގެ ތަފާތު އެކި ހުނަރުތައް ތަރައްޤީކޮށް ކުރިއެރުވުމަށް، ތަފާތު އެކި މުބާރާތްތައް ކުރިމަގުގައިވެސް ކުރިޔަށްގެންދަވާނޭކަމަށެވެ. އަދި ސައިނާ ނަމޫނާއަކަށް ބަލައިގެން ހުރިހައި ކުދިންވެސް، ޕީ.އެސް.އެމުން ހުޅުވާލާފައިވާ ފުރުޞަތުގެ ބޭނުން ހިފައިގެން ހުނަރުތައް ތަރައްޤީކުރުމަށް މަސައްކަތް ކުރުމަށް އިލްތިމާސް ކުރެއްވިއެވެ.
img:http://s1.psmnews.mv/images/660x400/14672818277150.jpg|މަދަހަ ސީޑީ އިފްތިތާޙުކުރުމަށް ބޭއްވި ރަސްމިއްޔާތުގައި ޕީއެސްއެމްގެ ޑީއެމްޑީ މުހައްމަދު އިކްރާމް ވާހަކަފުޅުދައްކަވަނީ / ފޮޓޯ: ޕީއެސްއެމް
އިކްރާމް ވިދާޅުވީ، އާއްމުންނަށް ޑައުންލޯޑްކޮށްގެން މިސީޑީގައި ހިމެނޭ މަދަހަ އަޑު އެހޭނޭ އިންތިޒާމް ހަމަޖައްސަވާނޭކަމަށާއި، އަދި ކޮންމެވެސް އަދަދަކަށް މިސީޑީގެ ކޮޕީ އާއްމުންނަށް ހިލޭ ބެހުމަށް ހަމަޖެހިފައިވާކަމަށެވެ.ހަމަ އެއާއެކު ސައިނާގެ ސީޑީގައި ހިމެނޭ މަދަހައަށް ވީޑިއޯ އުފައްދާ ޓީވީގައި ދެއްކުމާއި އަދި، އުރީދޫއާއި، ދިރާގުން މި މަދަހަތައް ޑައުންލޯޑްކޮށްގެން ލިބޭ ފައިސާ ސައިނާގެ ހުނަރު ތަރައްޤީ ކުރުމަށް ބޭނުންކުރުމަށް ޕީ.އެސް.އެމް އިން ސައިނާއަށް ހަދިޔާ ކުރާނޭކަމަށް އިކްރާމް ވިދާޅުވިއެވެ.
img:http://s3.psmnews.mv/images/660x400/14672819286554.jpg|މަދަހަ މުބާރާތުން އެއްވަނަ ހޯދި ސައިނާ މުހައްމަދު
ޕީ.އެސް.އެމްއާއި ވާހަކަ ދައްކަމުން ޖަމާލުއްދީން ސްކޫލްގެ ޕްރިންސިޕަލް ވިދާޅުވީ، މިއީ ސްކޫލްތަކަށް ހުޅުވިގެން ދިޔަ ވަރަށް ރަގަޅު ފުރުޞަތެއްކަމަށާއި، މިފުރުޞަތުގެ ބޭނުންކޮށް ކުދިންގެ ހުނަރުތައް ތަރައްޤީ ކުރުމަށް ހުރިހައި ސްކޫލަކުންވެސް މަސައްކަތް ކުރުން މުހިންމުކަމަށެވެ. ސައިނާއާއި ސައިނާގެ އާއިލާއިން ބުނީ، ޕީ.އެސް.އެމް އިން ލިބުނު ފުރުޞަތަކީ ސައިނާގެ މުސްތަޤްބަލަށް ލިބިގެން ދިޔަ ވަރަށް ބޮޑު ކުރިއެރުމެއް ކަމަށާއި، މިކަމާއި ވަރަށް ބޮޑަށް އުފާކުރާކަމަށެވެ. އަދި މިއީ އާއިލާއަށް ވަރަށް އުފާވެރި އަދި ފަޚްރުވެރި ދުވަހެއްގެ ގޮތުގައި ސައިނާގެ އާއިލާއިން ފާހަގަކުރެއެވެ.
ޕީ.އެސް.އެމްގެ 7 ވަނަ މަދަހަ މުބާރާތުން އެއްވަނަ ހޯދި ސައިނާގެ ވީޑިއޯ ސީޑީ ހެދުމުގެ މަސައްކަތް ވަރަށް އަވަހަށް ފެށުމަށް ޕީ.އެސް.އެމުން ތައްޔާރުވަމުންދާއިރު، މިއަންނަ މަދަހަ މުބާރާތަށްވެސް،ތައްޔާރު ވުމުގެ މަސައްކަތް މިހާރުވަނީ ފަށާފައެވެ. އެހެން އަހަރުތަކާއި ޚިލާފަށް އަންނަ މުބާރާތް ބޭއްވުމަށް ހަމަޖެހިފައިވަނީ އަތޮޅުތެރޭގައި އޮޑިޝަން ބާއްވައިގެނެވެ.