ކްރިކެޓް ބޯޑް އޮފް މޯލްޑިވްސް (ސީބީއެމް) އިން އިންތިޒާމުކޮށްގެން ފުރަތަމަ ފަހަރަށް އާންމުންނަށް ހުޅުވާލައިގެން އިންޑޯ ކްރިކެޓު މުބާރާތަކާއި ޓޭޕްބޯލް ކްރިކެޓު މުބާރާތެއް ބާއްވަން ނިންމައި، މި ދެ މުބާރާތް ރާވާ ހިންގައިދޭނެ ފަރާތެއް ހޯދުމަށް އިއުލާނުކޮށްފިއެވެ.
މިއަހަރު ސީބީއެމް އިން ރާވާ ހިންގާ މުބާރާތްތަކުގެ ތެރެއިން މި ދެ މުބާރާތަކީ ހާއްސަ އިސްކަމެއްދޭ ދެ މުބާރާތެވެ. އާންމުންނަށް ހުޅުވާލައިގެން ކުރިއަށްގެންދާ މި ދެ މުބާރާތުގެ ތެރެއިން އިންޑޯ ކްރިކެޓު މުބާރާތް އިންތިޒާމުކުރުމުގެ ފުރުސަތު ހުޅުވާލާފައިވަނީ ރާއްޖޭގައި ތިބި ކޮލިފައިޑް އޯގަނައިޒޭޝަންތަކުން ނުވަތަ އަމިއްލަ ފަރުދުންނަށެވެ.
ސީބީއެމްގެ "ކްރިކެޓް ފޯ އޯލް ޕްރޮގްރާމް" ގެ ދަށުން ބާއްވާ އިންޑޯ ކްރިކެޓު މުބާރާތަކީ ސީބީއެމްގެ ކަލަންޑަރުގައި ހިމެނޭ މުހިންމު މުބާރާތެކެވެ. މި މުބާރާތް ބޭއްވުމުގެ މަގުސަދަކީ އިންޑޯ ކްރިކެޓް ކުރިއެރުވުމާއި ކްރިކެޓް ކުޅުމުގެ އިތުރު ފުރުސަތުތައް ތަނަވަސްކޮށްދިނުން ކަމަށް އެ ބޯޑުން ބުނެއެވެ. އަދި ވީހާވެސް ގިނަ އާންމުންނަށް ކްރިކެޓު ކުޅުމުގެ މަގު ފަހިކޮށްދިނުންވެސް ހިމެނޭކަމަށް އެސޯސިއޭޝަނުން ބުނެއެވެ.
ގައުމީ ފެންވަރުގައި ބާއްވާ ފުރަތަމަ ޓޭޕްބޯލް މުބާރާތް ހިންގުމުގެ ފުރުސަތުވެސް ހުޅުވާލާފައިވަނީ އެކަމަށް ގާބިލު ޖަމުއިއްޔާތަކާއި އަމިއްލަ ފަރުދުންނަށް ކަމަށް ކްރިކެޓު ބޯޑުން މައުލޫމާތުދެއެވެ. މި މުބާރާތަކީ ރާއްޖޭގެ އެކި ކަންކޮޅުތަކުގައި ކްރިކެޓް މަގުބޫލުކޮށް، މުޖުތަމައުގެ ބައިވެރިވުން އިތުރުކޮށް، ކްރިކެޓަށް އިތުރު ކުޅުންތެރިން ގެނައުމުގެ މަގްސަދުގައި ބާއްވާ ބޮޑު މުބާރާތެއްގެ ގޮތުގައި ސީބީއެމް އިން ދެކެއެވެ.
އިންޑޯ ކްރިކެޓު މުބާރާތް ބާއްވާނެ ތާރީހެއް އަދި ހާމަކޮށްފައެއް ނުވެއެވެ. ނަމަވެސް ގައުމީ ޓޭޕްބޯޅަ ކްރިކެޓު މުބާރާތް ބާއްވަން ތާވަލުކޮށްފައިވަނީ މިއަހަރުގެ ސެޕްޓެމްބަރު މަހުގެ ތެރޭގައެވެ.