ޢާންމު ފަރާތްތަކުގެ މަޤުބޫލުކަމާއި ޤަދަރު އެކި މީހުންނަށް ލިބެނީ އެޝަޚުސިއްޔަތަކަށް ލިބިފައިވާ ހުނަރެއް ތަރައްޤީކުރުމަށް މުރާލިކަމާއެކު ކުރާ މަސައްކަތުންނާއި އެ ހުނަރެއް، މުޖުތަމަޢުގައި ނުވަތަ އޭނާ މަސްއޫލިއްޔަތު އަދާކުރުމުގައި ދައްކައިދޭ ގޮތާއި މިންވަރެއްގެ ސަބަބުންނެވެ. އިސްލާމީ މުޖުތަމަޢުތަކުގައި ދީނީ މަސައްކަތްތަކުގައާއި އިޖްތިމާޢީ މަސައްކަތްތަކުގައި ޙަރަކާތްތެރިވާ މީހުންނަކީ، އެމީހަކު އެކަމެއް ރަނގަޅަށް ކުރާނަމަ އެ މުޖުތަމަޢުގެ މަތީ ޤަދަރެއް ލިބޭ ބައެކެވެ. މީގެ ތެރޭގައި ވާޢިޒުންނާއި ޤާރީންނާއި އިމާމުން ހިމެނެއެވެ.
ކީރިތި ޤުރުއާނުގެ ޢިލްމު ޙާޟިލްކުރައްވައި، އެ ހުނަރު ތަރައްޤީކުރައްވައި އަދި ހެޔޮގޮތުގައި ބޭނުންކުރެއްމުގައި ފާހަގަކޮށްލެވޭ ޤާރީން އަދި އިމާމުންގެ ތެރޭގައި، މަސްޖިދުލް ޙަރަމްގެ އިމާމުން ކަމުގައިވާ ޢަބްދުއްރަޙްމާން ސުދައިސްއާއި، ސަޢޫދު އަލް ޝުރައިމް ފަދަ ބޭފުޅުން ހިމެނިވަޑައިގަންނަވައެވެ. މި އިމާމުންނަކީ ކީރިތި ޤުރުއާން ކިޔަވާ ވިދާޅުވާ ރާގާއި ރީތިކަމާއި ކިޔަވާވިދާޅުވުމުގެ ފުރިހަމަކަމުން ފަހުގެ ތާރީޚުގައި މުޅި އިސްލާމީ ދުނިޔެއިންވެސް ބަލައިގެންފައިވާ، އަދި އެބޭފުޅުންގެ ކިޔަވާ ވިދާޅުވުމަށް މީހުން ވަރަށް ތަރުޙީބުދޭ އިމާމުންނެވެ.
އަޅުގަނޑުމެންގެ މި ކުޑަކުޑަ ރާއްޖޭގައިވެސް ވަރަށް ރީތި ރާގުތަކަށް ޤުރުއާން ކިޔަވާވިދާޅުވާ ޙާފިޡުން އެބަތިއްބެވެ. ޓީވީއެމްއެމުން ގެނެސްދޭ ދިވެހިރާއްޖޭގެ އެންމެ އަލިގަދަ ތަރި ޕްރޮގްރާމުންވެސް މިފަދަ ބޭފުޅުން އަންނަނީ ފާހަގަކުރެވެމުންނެވެ.
ރާއްޖޭގައި އިމާމުވެ، ވަރަށް ފުރިހަމައަށް ނަމާދުކުރައްވާ އަދި ނަމާދުގައިވެސް ވަރަށް ރީތިކޮށް ކިޔަވާވިދާޅުވާ އެއްބޭފުޅަކީ ޑރ. މުޙައްމަދު ޝަހީމް ޢަލީ ސަޢީދުއެވެ. ޑރ. ޝަހީމަކީ ދީނީ ޢިލްމުވެރިއެކެވެ. ޙާފިޡެކެވެ. ޤާރީއެކެވެ. އަދި މަޤްބޫލް އިމާމެކެވެ. ޑޮކްޓަރ ޝަހީމަށް މި ހުރިހާ ރޮނގަކުން މަތިވެރި ޤަދަރާއި އިޙްތިރާމް ލިބިވަޑައިގެންފައި ވީނަމަވެސް ކޮންމެ ރަމަޟާންމަހަކު ޝަހީމްގެ އެންމެ މުހިންމު އެއް ޚިދުމަތެއްގެ ގޮތުގައި ފާހަގަކުރެވެނީ ތަރާވީޙު ނަމާދު އިމާމުވެ ކުރެއްވުމާއި ދަމުނަމާދު އިމާމުވެ ކުރެއްވުމެވެ.
img:http://s1.psmnews.mv/images/660x400/14672723055250.jpg|ޑރ ޝަހީމް، އިމާމްވެ ދަމު ނަމާދު ކުރައްވަނީ
މި ރަމަޟާނަމަހުގެ ފަހުދިހައިގައިވެސް އިސްލާމީ މަރުކަޒުގައި ކުރެވޭ ދަމުނަމާދު އިމާމުވެ ކުރައްވަނީ ޑރ. ޝަހީމްއެވެ. މިނަމާދުގެ ޖަމާޢަތަށް ކޮންމެ ރެއަކު އެތައްހާސް ބަޔަކު ޖަމާވެ، ޝަހީމްގެ އިމާމުކަމުގައި ނަމާދުކުރެއެވެ.
ޑރ. ޝަހީމް ވަނީ ގާތްގަނޑަކަށް ވޭތުވެދިޔަ 25 އަހަރު ރާއްޖޭގެ މިސްކިތްތަކުގައި ރަމަޟާންމަހު އިމާމްވެ ތަރާވީޙް ނަމާދާއި، ދަމުނަމާދު ކުރައްވަމުންނެވެ.
ޑޮކްޓަރ ޝަހީމް ސީރިއަސްކަމާއެކު ދީނީ ޢިލްމާއި ކީރިތި ޤުރުއާންގެ ޢިލްމުގެ ތެރެއަށް ދެވެވަޑައިގަތީ، 1994 ގައި ޤުރުއާނާބެހޭ މަރުކަޒުގެ ޤާރީކޯހެއްގެ ތެރެއިންނެވެ. އޭގެ ފަހުން ޕާކިސްތާނުގައި ތަޢުލީމު ޙާޞިލުކުރައްވަން ލިބިވަޑައިގެންނެވި ފުރުޞަތުގެ ތެރެއިން އެއްއަހަރާއި ތިން މަސްދުވަހުގެ ތެރޭގައި ޝަހީމް ވަނީ ކީރިތި ޤުރުޢާން ހިތުދަސް ކުރައްވައި ޙާފިޡަކަށް ވެވަޑައިގެންފައެވެ. ޑރ. ޝަހީމް، ޕާކިސްތާނުގެ އިތުރަށް ދީނީ ޢިލްމާއި ޤުރުއާންގެ ޢިލްމު ހޯއްދެވީ މިސްރާއި، ސަޢޫދީ ޢަރަބިއްޔާގެ މަދީނާއާއި، އަދި މެލޭޝިޔާގައެވެ.
މި ހުރިހާ ޤައުމެއްގައިވެސް ކޮލެޖް ޔުނިވަރސިޓީތަކުގެ މިސްކިތްތަކުގައި އޭނާ ވަނީ އިމާވެ އެތައް ދުވަހަކު ނަމާދުކުރައްވާފައެވެ. އަދި އެތަންތާގައި ހޭދަކުރެއްވި ރަމަޟާންމަހު ތަރާވީޙްނަމާދު އިމާމުވެ ކުރައްވާފައިވެއެވެ. އަދި ބައެއް ޤައުމުތަކުގައި އޭނާ ދިރިއުޅުއްވި ހިސާބުގައި ހުންނަ މިސްކިތުގައި އިމާމްވެ ތަރާވީޙް ނަމާދުކުރެއްވިއެވެ. މިއިން ކޮންމެ ތަނެއްގައިވެސް އިމާމުވެ ނަމާދުކުރެއްވުމުގެ ފުރުޞަތު ލިބިވަޑައިގެންފައިވަނީ، ކީރިތި ޤުރުއާން ކިޔަވާ ވިދާޅުވާލެއް ރީތިކަމާއި ފުރިހަމަކަން އެތަންތާނގެ ވެރިންނަށް ފާހަގަކުރެއްވިގެނެވެ.
މަތީ ތަޢުލީމަށްފަހު މާލެ ވަޑައިގަތުމުން ފަނޑިޔާރުކަމުގެ މަޤާމު ހުށައެޅުނުނަމަވެސް ޝަހީމް އިޙްތިޔާރުކުރެއްވީ ޤުރުއާންގެ ޢިލްމު ފެތުރުއްވުމާއި އެ ޢިލްމުގެ ބޭނުން ދިވެހިރާއްޖޭގައި އެންމެ ރަނގަޅަށް ހިއްޕެވުންނެވެ. އެކަމަށް ޢަދަދުކުރަން ދަތި ގިނަ މަސައްކަތްކެއް ވަނީ ކުރައްވާފައެވެ. އަދި އެ މަސައްކަތް ދަމަހައްޓަވައެވެ. އިސްލާމިކް ޔުނިވަރސިޓީ އޮފް މޯލްޑިވްސްގެ ވައިސް ޗާންސެލަރުގެ މަޤާމުގެ މަސްއޫލިއްޔަތު އަދާކުރައްވަމުން ގެންދަވާ ޑރ. ޝަހީމަކީ އިސްލާމީ ޝަރީޢާގެ އުސޫލުލް ފިޤުހުން ޕީ.އެޗް.ޑީ ހައްދަވައިގެން ހުންނެވި ޢިލްމުވެރިއެކެވެ.
img:http://s2.psmnews.mv/images/660x400/14672724280648.jpg|ޝަހީމް އިމާމުވެ ނަމާދުކުރުމަށް ގިނަ ބަޔަކު އެދޭ، އަދި ޤުރުއާން ކިޔަވާ ވިދާޅުވާލެއް ރީތިކަން އާއްމުން ފާހަގަކުރޭ
ޝަހީމް އެންމެ ފުރަތަމަ ރަސްމީކޮށް އިމާމެއްގެ ގޮތުގައި ނަމާދުކުރައްވަން ފެއްޓެވީ ތާއިބާ މިސްތުގައެވެ. 2008 ވަނަ އަހަރުން ފެށިގެން އެންމެ އަހަރެއް ފިޔަވައި އޭނާ ގެންދަވަނީ އިސްލާމީ މަރުކަޒުގައި ދަމުނަމާދު ކުރައްވަމުންނެވެ. ތަފާތު 9 ވަރަކަށް ރާގަށް ޤުރުއާން ކިޔެވުމުގެ ހުނަރު ލިބިވަޑައިގެންފައިވާ، ޑރ .ޝަހީމް އެންމެ ރީއްޗަށް ކިޔަވާ ވިދާޅުވާ ރާގު ވިދާޅުވެދެއްވިއެވެ.
" މިހާރު ދަސްވެފައި ހުރި ރާގުތައް ދަސްވެފައި ހުރީ ބޭރުގައި ކިޔަވަން އުޅުނު ދުވަސްވަރު، ބޭރުގައި ކިޔަވަން އުޅުނުއިރު އަޑު އަހައިގެން ހަމަ ދަސްކުރަނީ .އާއްމު ގޮތެއްގައި ރާއްޖޭގައި ނަމާދު ކުރާއިރު މީހުން އަޑުއަހާ ހިތްވަނީ ސުދެއިސްމެން ކިޔަވާ ރާގުތައް، ނޫނީ ޝުވެއިންމެން ކިޔަވާ ރާގުތައް. ދެން އަމިއްލަ ރާގުވެސް ގެންގުޅެން. އެހެންނަމަވެސް މީހުންނަށް އުފާވެރިކަން ލިބޭ ޙަރަމްފުޅުގެ އިމާމުގެ ކިޔެވުމާއި އެއްކޮށް އަޑުއެހީމަ. އާއްމުގޮތެއްގައި ނަމާދުގައި އަޅުގަނޑަށްވެސް ފަޞޭޙަ އެ ރާޤުތައް. އެހެންވީމަ އެރާގުތައް ގިނައިން ބޭނުންކުރަނީ". ޝަހީމް ވިދާޅުވިއެވެ
ރަމަޟާންމަހު މިސްކިތްތަކުގައި އިމާމުވެ ދަމުނަމާދާއި ތަރާވީޙް ނަމާދުކުރެއްވުމަކީ، އެކަމަށް ވަރަށް ތައްޔާރުވެވަޑައިގެން ކުރެއްވޭނެ އަޅުކަމަކަށްވީއިރު، ޝަހީމް ވިދާޅުވީ އެކަމުގައި ޢާއިލާގެ އެއްބާރުލުންވެސް ލިބިވަޑައިގަންނަވާ ކަމަށެވެ. އަދި އެކަމަށް ތައްޔާރުވެވަޑައިގަންނަވާ ގޮތް ޝަހީމް ވިދާޅުވެދެއްވިއެވެ.
"ގިނަ ވަގުތު މިކަމަށް ދީގެން، މިކަން ކުރެވޭނީ ހަޤީޤަތުގައި. ދަމު ނަމާދަށްވެސް ކުރިއާލާ ހޭލައިގެން، ތައްޔާރުވެގެން، ކުރިން މިސްކިތަށް ގޮސް، އިތުރަށް މުރާޖާކޮށް، މިކަންކަން ކޮށްގެން ހިތްހަމަ ޖެހޭ މިންވަރަށް އެކަން ކުރެވޭނީ، އަޅުގަނޑު ނަމާދުކުރަމުންދާއިރު ބޭނުންވަނީ މުރާޖާކުރާއިރުވެސް، ވަރަށް ރަނގަޅަށް މުރާޖާކުރެވިފައި ހުންނަން". ޝަހީމް ވިދާޅުވިއެވެ.
img:http://s4.psmnews.mv/images/660x400/1749.jpg|ޑރ. މުޙައްމަދު ޝަހީމް އަލީ ސަޢީދު ދިވެހި ޙައްޖާޖީންނަށް އެހީތެރިވެދެއްވުމުގައި - ފޮޓޯ: އިސްލާމިކް މިނިސްޓްރީ
ރޯދަ މަހަކީ ޙާފިޡުންނަށް ވަރަށް ޚާއްޞަ މޫސުމެއްކަމަށާއި، އެމަހު ޤުރުއާން މުރާޖާކުރުމަށް އިތުރަށް މަގުފައި ވެގެންދާނެކަން ފާހަގަކުރައްވަމުން ޝަހީމް ވިދާޅުވީ އިމާމުވެ ދަމު ނަމާދުކުރެއްވުމާއި ތަރާވީސް ކުރެއްވުމަކީ، މާތް ﷲ ގެ ވާގިފުޅާއެކު ވަރަށް ޝައުޤުވެރިކަމާއެކު ކުރައްވާ ކަމެއްކަމަށާއި އެންމެފަހު ވަގުތާ ހަމައަށްވެސް އެކަން ދޫނުކުރައްވާނެކަމަށެވެ. އަދި ޝަހީމް ވަނީ ވީހާވެސް ގިނަ ޙާފިޡުން މިސްކިތްތަކުގައި އިމާމްވެ ނަމާދުކުރެއްވުމަށް އެދިވަޑައިގެންފައެވެ.
" އަޅުގަނޑު ހަޔާތުގައި ދޫނުކޮށްލިކަމެއް މިކަމަކީ. ސިޔާސީ ކަންކަމުގައި އުޅުނުއިރުވެސް، މިނިސްޓްރީގައި އުޅުނުއިރުވެސް، ޔުނިވަރސިޓީގައި އުޅުނުއިރުވެސް، ކިޔަވަން އުޅުނުއިރުވެސް، އެންމެ ހާލުގައި އުޅުނުއިރުވެސް. ހަމަ އެއްވެސް އިރެއްގައި މިކަން އަޅުގަނޑު ދޫކޮށެއް ނުލަން. ހަޤީޤަތުގައި މިކަމުގައި އިރާދަކުރެއްވިއްޔާ އަޅުގަނޑު އެންމެ ފަހު ވަގުތާއި ޖެހެންދެންވެސް ދެމި ހުންނާނަން. އަޅުގަނޑު ބޭނުންވަނީ ޢިމާމުވެ ނަމާދުކުރުމަށާއި ޤުރުއާންކިޔެވުމާއި ޤުރުއާނުގެ މަސައްކަތުގައި އުޅުމާއި، އިލްމީ މަސައްކަތްތަކުގައި ވަރަށް ބޮޑަށް އުޅޭ ހިތްވޭ. އެހެންވީމާ އިތުރަށް ބޭފުޅުންނަށް ހިތްވަރުދެން މިކަމުގައި އުޅެންވެސް" ޝަހީމްގެ އުއްމީދުތައް ހިއްސާކޮށްދެއްވަމުން ވިދާޅުވިއެވެ.
ވޭތުވެދިޔަ އަށެއްކަ އަހަރުގެތެރޭގައި ރާއްޖޭގެ އެންމެ ބޮޑު މިސްކިތުގައި ޝަހީމް އިމާވެ، ނަމާދު ކުރައްވަމުން ގެންދަވާއިރު، ޝަހީމްގެ އިމާމުކަމުގައި ދަމުނަމާދުކުރަން ބޭނުންވާ ފަރާތްތައް ނުހަނު ގިނައެވެ. އެކަން އެނގެނީ މިފަދަ ނަމާދުތަކުގައި މުޅި އިސްލާމީ މަރުކަޒު ފުރިގެން ދާތީއެވެ.
މި ރަމަޟާންމަހުގެ ފަހުދިހައިގެ ރޭތަކުގައިވެސް ދަމުނަމާދު ކުރައްވަމުން ގެންދެވުމާ ގުޅޭގޮތުން ބައެއް ޝައިޚުންނާއި އިމާމުންގެ އިތުރުން ޢާންމު ފަރާތްތަކުންވެސް އޭނާއަށް ތަޢުރީފްގެ ބަސްތައް އޮހެމުންދެއެވެ. ރާއްޖޭގެ މިސްކިތްތަކުގައި ޝަހީމް އިމާމްވެ ނަމާދުކުރައްވައި އެތަކެއް ދިވެހިންގެ ހިތް އަތުލައްވައި ޝައުޤިވެރިކަން ހޯއްދަވާފައިވާއިރު، ޝަހީމްގެ އުންމީދަކީ، މާތްވެގެންވާ ތިން ހަރަމުންކުރެ ޙަރަމެއްގައި އިމާމްވެ ނަމާދުކުރެއްވުމުގެ ފުރުޞަތު ލިބިވަޑައިގަންނަވާނެ ދުވަހެއްގެ މިންވަރުކުރެއްވުމެވެ.