ދެބަސްވުންތަކެއް އޮތް ނަމަވެސް ޣައްޒާ ޢުދުވާން މެދުކަނޑައިލާނެ: ބްލިންކަން

ފަލަސްޠީނުގެ ޣައްޒާގެ މުސްލިމުންގެ ނަސްލުހޭދު ކުރަން ޔަހޫދީން ހިންގަމުންދާ ލާއިންސާނީ ޖަރީމާތައް މެދުކަނޑައިލުމަށް ވެފައިވާ އެއްބަސްވުމާ މެދު ޚިޔާލު ތަފާތުވުންތަކެއް ހުރި ނަމަވެސް، އެއްބަސްވުމުގައިވާ ގޮތަށް ޖަނަވަރީ 19ވަނަ ދުވަހު ޢުދުވާންތައް މެދުކަނޑައިލާނެ ކަމުގެ ޔަގީން ކަން އެމެރިކާގެ ޚާރިޖީ ވަޒީރު އެންތަނީ ބްލިންކަން އަރުވައިފިއެވެ. އޭނާ މި މޭރުމުން ވިދާޅުވެފައި މި ވަނީ، އެއްބަސްވުން ފާސް ކުރުމަށް ތާވަލު ކޮށްފައި އޮތް ޒަޔަނިސްޓު އިސްރާއީލުގެ ކެބިނެޓުގެ ބައްދަލުވުން ފަސްކޮށް، އެ ކަމަށް ހުރަސް އަޅަން ޔަހޫދީން މަސައްކަތް ކުރަމުންދާ ދަނޑިވަޅެއްގައެވެ.

މީޑިޔާ ރިޕޯޓުތައް ބުނީ، ޖަނަވަރީ 17 ނުވަތަ 18ވަނަ ދުވަހު ޔަހޫދީ ސަރުކާރުގެ ކެބިނެޓު ބައްދަލުވުމެއް ބާއްވައި، ޢުދުވާން ހުއްޓުވުމާ ގުޅޭ އެއްބަސްވުން ފާސް ކުރާނެ ކަމަށް ބެލެވޭ ކަމުގައެވެ. އެއްބަސްވުން ފާސް ކުރުމާ މެދު ޚިޔާލު ތަފާތުވުން އުފެދިފައި ވަނީ ޒަޔަނިސްޓުންގެ ހައްދުފަހަނަ އެޅި ކެބިނެޓުގެ މިނިސްޓަރުންގެ މެދުގައެވެ. އަނިޔާވެރި ބެންޖަމިން ނަތަންޔާހޫގެ ކެބިނެޓުގައި ހިމެނޭ ހައްދުފަހަނަ އެޅި ވަޒީރުން ދަނީ ޣައްޒާ ޢުދުވާން މެދުކަނޑައިލަން ދެކޮޅު ހަދަމުންނެވެ.

"

މި ފަދަ ހައްސާސް ކަމަކާ މެދު މަޝްވަރާ ކުރުމުގައި ގިނަ ދެބަސްވުންތަކެއް އަދި ޚިޔާލު ތަފާތުވުންތަކެއް ހުންނާނެ ކަމީ ހައިރާންވާން ޖެހޭ ފަދަ ކަމެއް ނޫން. އެ ކަންކަން ޙައްލު ކުރަން އަޅުގަނޑުމެން މިހާރު ވެސް މި ދަނީ މަސައްކަތް ކުރަމުން،"

އެމެރިކާގެ ޚާރިޖީ ވަޒީރު އެންތަނީ ބްލިންކަން

މި ކަމުގެ ޒިންމާ ޔަހޫދީ ސަރުކާރުން އަޅުވަމުން ދަނީ ޣައްޒާގައި ވެރިކަން ކުރާ ޙަމާސް ޖަމާޢަތުގެ ކޮނޑުގައެވެ. ނަމަވެސް، ސުލްޙައިގެ އެއްބަސްވުމަކަށް އާދެވިފައިވާ ކަން އިޢުލާނު ކުރުމާ އެކު، ޒަޔަނިސްޓު ނަތަންޔާހޫގެ އަމުރަށް ޔަހޫދީ ފައުޖުން ވަނީ ޣައްޒާއަށް ދެމުން ދިޔަ ޢުދުވާނީ ޙަމަލާތައް އެތަކެއް ގުނައަކަށް އިތުރުކޮށް ފުޅާކޮށްފައެވެ.

އެންމެ ފަހުގެ ޙަމަލާތަކުގައި 21 ކުޑަކުދިން ޝަހީދުކޮށްލުން

އެއްބަސްވުމުގެ ޚަބަރު އިޢުލާނު ކުރި ފަހުން ޔަހޫދީ ފައުޖުން ދީފައިވާ ނިރުބަވެރި ޙަމަލާތަކުގައި ޝަހީދު ކޮށްލާފައިވާ މީހުންގެ އަދަދު ވަނީ 87އަށް އުފުލިފައެވެ. އޭގެ ތެރޭގައި މައުސޫމު 21 ކުޑަކުދިންނާއި ކުށެއް ނެތް 25 އަންހެނުން ހިމެނެއެވެ. ޔަހޫދީންގެ ތުހުމަތުތައް ދޮގު ކުރައްވައި ޙަމާސްގެ އިސް އޮފިޝަލެއް ކަމުގައިވާ ޢިއްޒަތު އަލް-ރަޝަޤު ވިދާޅުވީ، އެއްބަސްވުން ތަންފީޒު ކުރުމަށް އެ ޖަމާޢަތުން ތައްޔާރަށް އޮތް ކަމުގައެވެ.

"މި ފަދަ ހައްސާސް ކަމަކާ މެދު މަޝްވަރާ ކުރުމުގައި ގިނަ ދެބަސްވުންތަކެއް އަދި ޚިޔާލު ތަފާތުވުންތަކެއް ހުންނާނެ ކަމީ ހައިރާންވާން ޖެހޭ ފަދަ ކަމެއް ނޫން. އެ ކަންކަން ޙައްލު ކުރަން އަޅުގަނޑުމެން މިހާރު ވެސް މި ދަނީ މަސައްކަތް ކުރަމުން،" ބްލިންކަން ވިދާޅުވިއެވެ. އެމެރިކާ ސަރުކާރުގެ މަޞްދަރުތަކުން ވެސް ބުނީ، ޙަމާސާއި ޔަހޫދީންނާ ދެމެދު އުފެދިފައިވާ ދެބަސްވުންތައް ޙައްލު ކުރަން މެދުކެނޑުމެއް ނެތި މަސައްކަތް ކުރަމުންދާ ކަމުގައެވެ.

"އަޅުގަނޑަށް ހީވަނީ ހުރިހާ ކަމެއް ވެސް ދާނީ ރަނގަޅަށް ހެން،" ނަން ހާމަކޮށްފައި ނުވާ އެމެރިކާ ސަރުކާރުގެ މަޞްދަރަކުން ބުންޏެވެ. މިޞްރާއި ޤަޠަރުން މެދުވެރިންގެ ގޮތުގައި ވިލަރެސް ކުރަމުންދާ މަޝްވަރާތަކުގައި މި ވަގުތު ދެބަސްވުންތައް އުފެދިފައި އޮތީ، އެއްބަސްވުމުގެ ފުރަތަމަ މަރުޙަލާގައި ޙަމާސުން މިނިވަން ކުރާނެ އަސީރުންގެ ވަނަވަރާ ގުޅޭ ގޮތުންނެވެ.

ޔަހޫދީންގެ ލާއިންސާނީ ޢުދުވާން މެދުކަނޑައިލުމަށް ޒަޔަނިސްޓުންގެ ނިރުބަވެރި ނަތަންޔާހޫ އެއްބަސްވެފައި ވަނީ އެމެރިކާގެ ރައީސް ޖޯ ބައިޑަނާއި އިންތިޚާބީ-ރައީސް ޑޮނަލްޑް ޓްރަމްޕްގެ މަންދޫބުންގެ ބާރު އެޅުމާއި، އެހީތެރިކަމާ އެކުގައެވެ. މަޝްވަރާތައް ކުރިއަށް ދަނީ ޤަޠަރުގެ ވެރިރަށް ދަވްޙާގައެވެ. ޙަމާސާއި ޔަހޫދީންނާ ދެމެދު އެއްބަސްވުމަކަށް އާދެވިފައިވާ ކަން ޖަނަވަރީ 15ވަނަ ދުވަހު އިޢުލާނު ކުރުމަށް ފަހު، ޔަހޫދީންގެ ނިރުބަވެރި ޙަމަލާތައް އިތުރުކޮށް ފުޅާ ކުރުމާ ގުޅިގެން ޣައްޒާގެ ރައްޔިތުންނަށް ވަނީ އިތުރު މޮޅިވެރިކަމާއި ހިތާމައާ ކުރިމަތިލާން ޖެހިފައެވެ.

15 މަހުގެ ޢުދުވާނަށް ފަހު ޣައްޒާގެ ނިކަމެތީންނަށް އެހީވާން ފަށަނީ

ޙަމާސާއި ޔަހޫދީންނާ ދެމެދު ވެފައިވާ އެއްބަސްވުމުގެ ދަށުން ޤަތުލުޢާންމު ހިންގުން ހުއްޓައިލުމަށް ފަހު ޣައްޒާއިން ޔަހޫދީ ފައުޖުގެ ނިރުބަވެރި ސިފައިން ފައިބަން ފަށާނެއެވެ. އަދި، 2023 އޮކްޓޫބަރު 7ވަނަ ދުވަހު ޙަމާސުން ރަހީނު ކޮށްފައިވާ އަސީރުން މިިނިވަން ކުރަން ފަށާނެއެވެ. އޭގެ ބަދަލުގައި ޔަހޫދީންގެ ޖަލުތަކުގައި ތިބި ފަލަސްޠީނުގެ ރައްޔިތުންގެ ތެރެއިން އެތަކެއް ސަތޭކަ ބަޔަކު މިނިވަން ކުރާނެއެވެ.

އެއްބަސްވުމުގެ އެންމެ މުހިންމު ކަމަކީ، ޢުދުވާނީ ޙަމަލާތައް ހުއްޓައިލުމަށް ފަހު، ފާއިތުވި 15 މަސް ދުވަހުގެ ތެރޭގައި ޣައްޒާގައި ނިކަމެތި ކޮށްލާފައިވާ 2.3 މީހުންނަށް ކާބޯތަކެއްޗާއި އިންސާނީ އެހީގެ ސާމާނު ފޯރު ކޮށްދިނުމުގެ މަސައްކަތް ހަރުދަނާ ކުރުމަށް ޔަހޫދީން ވަޢުދުވުމެވެ. ޣައްޒާއަށް ކާބޯތަކެތި ފޯރު ކޮށްދިނުން އިތުރު ކުރުމަށް މިޞްރުން މިހާރު ވެސް ދަނީ ތައްޔާރުވަމުންނެވެ.

ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ ޢުދުވާނުގައި ޝަހީދުކޮށްލާފައިވާ މީހުންގެ ޢަދަދު ވަނީ 46,788އަށް އުފުލިފައެެވެ. އޭގެ ތެރޭގައި 17,000އެއްހާ ކުޑަކުދިން ހިމެނޭއިރު, އިތުރު 10,000އެއްހާ މީހުންގެ ހަށިތައް ސުންނާފަތި ކޮށްލާފައިވާ އިމާރާތްތަކުގެ ދަށުގައި ތާށިވެފައިވާ ކަމަށް ޣައްޒާގެ އޮފިޝަލުން ޤަބޫލު ކުރެއެވެ. ޣައްޒާ ޢުދުވާނުގައި ޔަހޫދީ ފައުޖުން ވަނީ 110,453 މީހުން ޒަޚަމު ކޮށްލާފައެވެ.