އައު ބޮޑީބޯޑަރުން އުފެއްދުމަށް ކުރިއަށްގެންދާ ގްރާސްރޫޓް ފެންވަރުގެ ގައުމީ ޓްރޭނިން ޕްރޮގްރާމް މި އަހަރު މާލޭގެ އިތުރުން 6 ރަށެއްގައި ކުރިއަށްގެންދަން ނިންމައި، މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ) ގެ އަހަރީ ކަލަންޑަރު އިއުލާންކޮށްފިއެވެ.
ހުދު ފޮނުގެ ނަމުގައި ކުރިޔަށް ގެންދާ ބޮޑީބޯޑިން ޕްރޮގްރާމް ކުރިޔަށް ގެންދަން ކަނޑައަޅާފައިވަނީ އަންނަ ފެބުރުއަރީ މަހުގެ 6 ން 8 ވަނަ ދުވަހުގެ ނިޔަލަށް ށ. ކަނޑިތީމުގަ، އޭޕްރީލް މަހުގެ 17 ން 19 އަށް ނ. ޅޯހީގައި، މޭ މަހުގެ 24 ވަނަ ދުވަހު ކ. މާލޭގައެވެ. އަދި ޖޫން 19 ން 21 ށް ބ. މާޅޮހުގައިވެސް ހުދުފޮނު ޕްރޮގްރާމް ބާއްވަން ނިންމާފައިވާއިރު ޖުލައި 30 ން 31 އަށް ފުވައްމުލައް ސިޓީގައިވެސް މި ޕްރޮގްރާމް ކުރިޔަށްދާނެއެވެ. އޭގެ އިތުރުން 13 ސެޕްޓެމްބަރުގައި މާލޭގައި، އޮކްޓޫބަރު 23ން 25 ށް ދ. ކުޑަހުވަދޫގައި އަދި ނޮވެމްބަރު 20. 22 ށް ތ. ހިރިލަންދޫގައި ހުދުފޮނު ޕްރޮގްރާމް ކުރިޔަށް ގެންދިއުމަށް ވަނީ ތާވަލުކޮށްފައެވެ.
ބޮޑީބޯޑިން އެސޯސިއޭޝަނުން ބުރާސްފަތިދުވަހު އާންމުކުރި ކަލަންޑަރުގައިވާ ގޮތުން މޯލްޑިވްސް ނޭޝަނަލް ބޮޑީ ބޯޑިން ލީގާއި، ހުދުފޮނު މޯލްޑިވްސް ނޭޝަނަލް ބޮޑީބޯޑިން ޕްރޮގްރާމްގެ އިތުރުން މޯލްޑިވްސް ޕްރޯ ބޮޑީބޯޑިން ވޯލްޑް ޓުއަރ މިއަހަރުވެސް ބާއްވާނެއެވެ.
އެމްބީބީއޭގެ މީޑިއާ އޮފިޝަލް، "ޕީއެސްއެމް ސްޕޯޓްސް" އަށް މައުލޫމާތު ދެއްވަމުން ވިދާޅުވީ އިން ހުދުފޮނު މޯލްޑިވްސް ނޭޝަނަލް ބޮޑީބޯޑިން ޕްރޮގްރާމަކީ ގުރާސްރޫޓްގެ ކުދިންނަށް ބޮޑީބޯޑިންގެ ހުނަރުތަކާއި އުކުޅުތައް ދަސްކޮށްދެވޭއިރު، މި ކުޅިވަރުގެ ތެރެއަށް ވެއްދުމަށް ހިންގާ ތަމްރީނު ޕްރޮގްރާމެއް ކަމަށެވެ. އޭގެތެރޭގައި ބޭސިކް ބޮޑީބޯޑިން ސްކިލްސް އާއި، ހެލްތް އެންޑް ފިޓްނެސް ގެ އިތުރުން 'ކެރިއާސް އިން ސާފް އިންޑަސްޓްރީ' އަށް ފޯކަސްކޮށްގެން ކުރިޔަށް ގެންދާ ބައިތައް މި ޕްރޮގްރަމްގައި ހިމެނޭނެ ކަމަށް ވިދާޅުވިއެވެ.
އަހަރީ ކަލަންޑަރުގައިވާ ގޮތުން އެމްބީބީއޭގެ އަހަރީ އާންމު ޖަލްސާ ބާއްވާނީ އަންނަ ފެބުރުއަރީ މަހުގެ 21 ގައެވެ. މީގެ އިތުރުން ރާއްޖޭގެ ބޮޑީބޯޑިންގެ އެންމެ ޝަރަފުވެރި މުބާރާތްތަކުގެ ތެރޭގައި ހިމެނޭ ބުރުނު ޝިކާރު ބޮޑީބޯޑިން ޗެލެންޖް 2025 ބާއްވަން ތާވަލުކޮށްފައިވަނީ މޭ މަހުގެ 25 ން 29 ގެ ނިޔަލަށެވެ. މީގެ އިތުރުން ފުވައްމުލަކުގައި ބާއްވަން ހަމަޖެހިފައިވާ ބޮޑީބޯޑިން ޗެލެންޖް 2025 ބާއްވާން ތާވަލުކޮށްފައިވަނީ އޮގަސްޓް 1 ން 7 ގެ ނިޔަލަށެވެ. ނޭޝަނަލް ބަނޑުފިލާ ޗެލެންޖް 2025 ބާއްވާނީ ސެޕްޓެމްބަރު 14 ން 18 އަށެވެ.
ބޮޑީބޯޑިން އެސޯސިއޭޝަނުން ވަނީ ފައިތުވި އަހަރުގެ މުބާރާތްތަކުގެ ނަތީޖާތަކަށް ބަލާ ގައުމީ ރޭންކިންވެސް އިއުލާނުކޮށްފައެވެ. ބުދަ ދުވަހު އިއުލާނުކުރި ގައުމީ ރޭންކިންގެ އެއްވަނައިގައި އޮތީ މިދިޔަ އަހަރުގެ ގައުމީ މުބާރާތް ކާމިޔާބު ކުރި އަލީ ޖާވިދު (ޖާއްޓޭ) އެވެ. ރޭންކިންގެ ދެ ވަނައިގައި އަލީ ހުޝްރުވާ އަހުމަދު (ކުޑަ އައްޔަ) ހިމެނޭއިރު ތިން ވަނައިގައި އޮތީ އިޔަން އަހުމަދެވެ. ހަތަރުވަނައިގައި އަޝްރަފް ހުސެއިން ހިމެނޭ އިރު ރޭންކިންގެ ފަސް ވަނައިގައި އޮތީ އާމިން އުމަރު މޫސާއެވެ.