ދެކުނު އެފްރިކާގެ ބާރު އުކުންތެރިޔާ އެންރިޗް ނޯޗާގެ އުނަގަނޑަށް ތަދުވެ، ޗެމްޕިއަންސް ޓްރޮފީގައި ނުކުޅެވޭނެކަން ކަށަވަރުވެއްޖެ އެވެ.
ޓީމުގައި ހިމެނިތާ 24ގަޑިއިރު ފަހުން އޭނާގެ ނަން ލިސްޓުން މިހާރު ވަނީ އުނިކޮށްފަ އެވެ. ބަދަލުގައި ނަގާނީ ކޮން ކުޅުންތެރިއެއްކަން ޔަގީނެއްނޫނެވެ. ބޮޑަށް ބެލެވެނީ އެ މަގާމަށް ދެން ނަގާނީ ޖެރަލްޑް ކަމަށެވެ. މީގެ އިތުރުން 18 އަހަރުގެ ބާރު އުކުންތެރިޔާ ކްވެނާ މަފާކާ އަކީ ވެސް ޓީމަށް ނަގާފާނެ ކުޅުންތެރިއެކެވެ.
ނޯޗާ އަކީ މޮޅު ކުޅުންތެރިއެއް ނަމަވެސް އަނިޔާއިން އަރައިނުގަނެވި އޭނާ އުޅޭތާ އަހަރުތަކެއް ވެއްޖެ އެވެ. 2023 ގެ މާޗު މަހުގެ ފަހުން އޭނާ ޓެސްޓް މެޗެއް ވެސް ކުޅެފައިނުވެ އެވެ. ނަމަވެސް މިދިޔަ އަހަރުގެ ޓުވެންޓީ20 މުބާރާތުގައި އިންޑިޔާ އަތުން ފައިނަލްގައި ބަލިވި ދެކުނު އެފްރިކާ ޓީމުގައި އޭނާ ވަނީ މޮޅު ކުޅުމެއް ދައްކައިފަ އެވެ.
ދެކުނު އެފްރިކާ ޓީމުން ބުނީ އަންނަ މަހު ޕާކިސްތާނުގައި ފަށާ ޗެމްޕިއަންސް ޓްރޮފީ މުބާރާތުގައި ނޯޗާ ނުހިމަނަން ނިންމީ މުބާރާތުގެ ފުރަތަމަ މެޗު ކުޅެންވާއިރަށް އޭނާ ފިޓްވާނެ ކަމަށް ނުބެލެވޭތީ ކަމަށެވެ. ފެބްރުއަރީ 21 ވަނަ ދުވަހު ދެކުނު އެފްރިކާ އެންމެ ފުރަތަމަ ނުކުންނާނީ އަފްގާނިސްތާނާ ދެކޮޅަށެވެ. މި ގްރޫޕުގައި ދެން ހިމެނެނީ އިންގްލޭންޑާއި އޮސްޓްރޭލިޔާ އެވެ.