އިނގިރޭސި ޕްރިމިއަރ ލީގުގެ ކުރީގައި އޮތް ދެ ޓީމު ކަމަށްވާ ލިވަޕޫލް އާއި ނޮޓިންހަމް ފޮރެސްޓް ބައްދަލުކުރި މެޗު 1-1 ގެ ނަތީޖާއަކުން އެއްވަރުވެއްޖެއެވެ.
ނޮޓިންހަމް ފޮރެސްޓްގެ ދަ ސިޓީ ގްރައުންޑުގައި ތިރީސް ހާހަށްވުރެ ގިނަ މީހުންގެ ކުރިމަތީގައި ކުޅުނު މި މެޗުގެ އަށްވަނަ މިނިޓުގައި ނޮޓިންހަމް ފޮރެސްޓްގެ ކްރިސް ވުޑް ވަނީ ލަނޑެއް ޖަހައި އެ ޓީމަށް ކުރި ހޯދަދީފަ އެވެ.
ދެ ޓީމުގެ ފަރާތުންވެސް ވާދަވެރި ކުޅުމެއް ފެނިގެން ގޮސްފައިވާ މި މެޗުގައި ލިވަޕޫލްއަށް އެއްވަރުކޮށްދިން ލަނޑު މެޗުގެ 66 ވަނަ މިނިޓުގައި އެ ޓީމަށް ކާމިޔާބުކޮށްދީފައިވަނީ ބަދަލު ކުޅުންތެރިއެއްގެ ގޮތުގައި ދެވަނަ ހާފުގައި ކުޅެން އެރި ޑިއޭގޯ ޖޮޓާއެވެ. އޭނާ މި ލަނޑު ޖަހާފައިވަނީ ކުޅެން އެރިތާ އެންމެ 22 ސިކުންތުގެ ތެރޭގަ އެވެ.
ޖޮޓާ ކުޅެން އެރުވުމާއެކު ލިވަޕޫލްގެ ހަމަލާތައް ވަނީ އިތުރަށް ވަރުގަދަ ވެގެންގޮސްފައެވެ. އެކަމަކު ލިވަޕޫލްއިން އުފެއްދި ގިނަ ހަމަލަތަކެއް ދިފާއުކުރުމުގައި ނޮޓިންހަމް ފޮރެސްޓްގެ ގޯލްކީޕަރު މެޓްސް ސެލްސް ވަނީ މުހިންމު ދައުރެއް އަދާކޮށްފައެވެ.
މި ސީޒަނުގައި ޕްރިމިއަރ ލީގުގައި ލިވަޕޫލުން މިހާތަނަށް ކުޅުނު މެޗުތަކުގެ ތެރެއިން ބަލިވެފައިވަނީ ނޮޓިންހަމް ފޮރެސްޓާ ދެކޮޅަށް އަމިއްލަ ދަނޑުގައި ކުޅުނު މެޗުން އެކަންޏެވެ.
ރޭގެ ނަތީޖާ އާއެކު ތާވަލުގެ އެއްވަނައިގައި އޮތް ލިވަޕޫލްއަށް 47 ޕޮއިންޓް ލިބިފައިވާއިރު، ދެވަނައިގައި އޮތް ނޮޓިންހަމް ފޮރެސްޓަށް އެއް މެޗު އިތުރަށް ކުޅެގެން ލިބިފައިވަނީ 41 ޕޮއިންޓެވެ.