ޢުމްރާއަށް ނުގެންގޮސް އޮޅުވާލައިގެން ޓިކެޓަށް ޑޮލަރު ހޯދާފައިވާ މައްސަލައެއް ބަލަން ފަށައިފި

ގްރޫޕަކުން ޢުމްރާއަށް މީހުން ގެންދިއުމަށް ދޫކޮށްފައިވާ ރަސްމީ ލައިސަންސް ބޭނުންކޮށްގެން، އެމްއެމްއޭއިން ޓިކެޓަށް ދޫކުރާ ޑޮލަރު އޮޅުވާލައިގެން ހޯދާފައިވާކަމަށް ތުޙުމަތުކުރެވޭ މައްސަލައެއް ބަލަމުންދާކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

ޢުމްރާގެ އަޅުކަމަށް މީހުން ގެންދިއުމާއި ގުޅޭގޮތުން ހުރި މައްސަލަތަކާއި ގްރޫޕްތަކުން އުސޫލާ އެއްގޮތަށް ޢަމަލުކުރަމުންދޭތޯ ބެލުމަށް އިސްލާމީ ކަންތައްތަކާ ބެހޭ ވުޒާރާއިން ވަނީ ގިނަ މަސައްކަތްކަތެއް ފައްޓަވާފައެވެ. މި މަސައްކަތް ހަރުދަނާކޮށްފައިވަނީ، ޢުމްރާއަށް މީހުން ގެންދިއުމުގައި އިޙުމާލުގެ ގިނަ މައްސަލަތަކެއް ފެންމަތިވަމުންދާތީއެވެ.

ވަޒީރު ވިދާޅުވީ، ޢުމްރާއަށް މީހުން ގެންދިއުމަށް އެ ވުޒާރާއިން ދީފައިވާ ރަސްމީ ލައިސަންސް ދައްކައިގެން ޢުމްރާއަށް ފުރަން ކަމަށް ހަދައި އެމްއެމްއޭ އިން ޑޮލަރު ނަގާ، ނަމަވެސް ޢުމްރާއަށް ގޮސްވައި ނުވާކަމަށް ބެލެވޭ ގްރޫޕެއްގެ މައްސަލައެއް ފާހަގަވެފައިވާކަމަށެވެ.

އެކަން އިތުރަށް ބަލައި އެ ވުޒާރާއަށް އެކަން ސާބިތުވެއްޖެނަމަ އެކުންފުނި 30 ހާސް ރުފިޔާއިން ޖޫރިމަނާކޮށް، ހުއްދަ ހިފަހައްޓައި، މައްސަލަ ތަޙްޤީޤުކުރަން ފުލުހުންނަށް ހުށައަޅާނެކަމަށް ވަޒީރު ވިދާޅުވިއެވެ. އެއީ ޑޮލަރު ދޫކުރާނީ ފުރުމުގެ ޓިކެޓާއި ޑޮކިއުމެންޓްސް ހުށަހެޅުމުންކަމުގައި ވެފައި، ފޭކު ޑޮކިއުމެންޓް ހުށަހެޅިކަމަށް ތުހުމަތުކުރެވޭތީކަމަށް އިސްލާމީ ކަންތައްތަކާ ބެހޭ ވަޒީރު ވިދާޅުވިއެވެ.

ޢުމްރާއަށް މީހުން ގެންދިއުމުގައި އަމަލުކުރަން ގެޒެޓް ކޮށްފައިވާ އުޞޫލަށް އަމަލު ނުކުރާ ހުރިހާ ކުންފުނިތަކަށް އެ ވުޒާރާއިން ދަނީ ފިޔަވަޅު އަޅަމުންނެވެ. ވަޒީރު ޙިއްސާކުރެއްވި ތަފްސީލަށް ބަލާއިރު، އުޞޫލާ ޚިލާފުވެގެން، މައްސަލައިގެ ކުޑަބޮޑުމިނަށް ބަލާ، އިތުރު 19 ކުންފުންޏެއް 5000 ރުފިޔާއިން ވަނީ ޖޫރިމަނާކޮށްފައެވެ.

ޢުމްރާއަށް މީހުން ގެންދިޔުމުގެ އުޞޫލްގައިވާގޮތުން އިސްލާމީ ކަންތައްތަކާ ބެހޭ ވުޒާރާއިން ހުއްދަދީފައިވާ ކުންފުންޏާ ދެމެދު ވެފައިވާ އެއްބަސްވުމާ ޚިލާފު ވެއްޖެނަމަ ކުޑަ ބޮޑުމިނަށް ބެލުމަށްފަހު 1،000 ރުފިޔާއާއި 100،000 އާ ދެމެދުގެ އަދަދަކުން ޖޫރިމަނާ ކުރުމުގެ އިޚުތިޔާރު އިސްލާމީ ކަންތައްތަކާ ބެހޭ ވުޒާރާއަށް ލިބެއެވެ. އަދި ޢުމްރާއަށް ގެންދިޔުމުގެ ހުއްދަ ނެތި އެއްވެސް ޢަމަލެއް ކޮށްފިނަމަ އެ ކުންފުންޏެއް 100،000 އާއި 500،000 ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެއެވެ.